Go Klostu Long Man Bilong Harim Beten

PLANTI man husat i tok ol i bilip long God, ol i no save long as bilong bilip bilong ol. Na tu, ol i no save long as na ol lotu i save mekim ol pasin nogut, na as na God i larim pen na hevi i stap. Wanpela samting tasol ol inap mekim em long beten long God em ol i no save long en.

Maski i olsem, yu inap i go klostu moa long God, na i no olsem yu beten nating tasol. Yu inap bilip long God sapos pastaim yu kisim save long em na dispela save i kirapim yu long laikim em. Bilip tru i gat as bilong en. (Hibru 11:1) Sapos yu kisim stretpela save long God, yu inap save gut long em na toktok long em olsem wanpela pren. Skelim ekspiriens bilong sampela em ol i bin beten maski ol i gat tupela tingting olsem God i stap tru o nogat.

◼ Patricia, yumi bin stori long em long namba 1 atikol. “Wanpela taim mi stap wantaim 10-pela pren bilong mi taim ol i wok long toktok long lotu. Mi tokim ol olsem mi bin lusim haus bambai mi no ken putim yau long toktok bilong papa bilong mi, em man i no bilip long God, na wanpela Witnes Bilong Jehova husat i bin kam long haus bilong mipela. Wanpela pren long dispela grup i tok, ‘Ating tok bilong ol Witnes Bilong Jehova i stret.’

“Narapela pren i tok, ‘I gutpela sapos yumi go long lotu bilong ol na painimaut.’ Na mipela i mekim olsem. Maski sampela bilong mipela i gat tupela tingting, mipela i go yet long lotu bilong ol, long wanem, ol Witnes i gat gutpela pasin pren.

“Tasol long wanpela Sande, mi harim wanpela tok we i senisim tru tingting bilong mi. Man i mekim tok i stori long as na ol manmeri i karim pen na hevi. Mi no bin kliagut olsem bipo God i wokim man i gutpela olgeta, na sin na dai i kirap long wanpela man na i go long olgeta lain man. Na man i mekim tok i stori gut long as na dai bilong Jisas em i bikpela samting bilong helpim ol man long kisim gen laip em namba 1 man i bin lusim. a (Rom 5:12, 18, 19) Nau mi kliagut long olgeta samting. Mi tingting olsem, ‘I gat wanpela God i stap tru na em i save tingim tru yumi.’ Mi wok long stadi yet long Baibel, na em namba 1 taim mi luksave olsem mi inap beten long wanpela man i stap tru.”

 ◼ Allan, yumi bin stori tu long em long namba 1 atikol. “Wanpela taim ol Witnes Bilong Jehova i kam long haus bilong mipela, na meri bilong mi i bringim ol i kam insait long haus, long wanem, em i laikim tok bilong ol olsem ol man inap stap laip oltaim long graun. Mi no laikim ol na mi kros. Olsem na mi lusim ol visita i stap long fran rum na mi kisim meri bilong mi i go long kitsen na tokim em, ‘Yu no ken longlong. Yu no inap bilipim kain tok olsem!’

“Em i tok, ‘Sapos olsem, orait yu go na soim ol olsem tok bilong ol i no stret.’

“Mi go, tasol i no gat wanpela tok mi mekim inap daunim tok bilong ol. Ol i mekim gutpela pasin tru na givim mi wanpela buk i stori long laip i bin kamap olsem wanem—i gat man i bin kamapim laip o laip i kamap long rot bilong evolusen. Tok bilong dispela buk i klia na i stret olgeta, olsem na mi wokim tingting olsem mi mas kisim sampela save moa long God. Mi kirap stadi long Baibel wantaim ol Witnes, na i no longtaim mi luksave olsem tok bilong Baibel i narapela olgeta long ol tingting mi bin gat long lotu. Taim mi kisim save long Jehova, mi kirap long beten long em na kamapim stret ol samting mi pilim long bel na tingting. Sampela pasin bilong mi i no gutpela tumas, olsem na mi beten long kisim helpim. Mi bilip tru olsem Jehova i bin harim na bekim ol beten bilong mi.”

◼ Andrew, em i stap long Inglan. “Maski mi gat ol strongpela tingting bilong mi yet na mi gat laik tru long kisim save long saiens, mi bilipim nating tok bilong evolusen, long wanem, ol man i tok dispela tok i stret. Mi no laik bilip olsem i gat God i stap, long wanem, i gat planti pasin nogut.

 “Tasol sampela taim mi save tingting olsem: ‘Sapos i gat God i stap antap, orait mi laik save long as bilong olgeta pasin nogut. Bilong wanem i gat planti pasin raskol na woa?’ Taim mi bungim hevi, sampela taim mi save beten long kisim helpim, tasol mi no save mi beten long husat.

“Bihain, wanpela man i givim meri bilong mi wanpela liklik nius em ol Witnes Bilong Jehova i wokim, nem bilong en, Ol Man Bilong Graun Bai Abrusim Bagarap o Nogat? Em dispela askim tasol mi laik save long bekim bilong en. Dispela nius i kirapim tingting bilong mi long Baibel na mi ting olsem, ‘Ating i gutpela mi skelim ol bekim bilong en.’ Bihain, taim mi stap long holide, wanpela man i givim mi buk The Bible—God’s Word or Man’s? b Taim mi luksave olsem tok bilong Baibel i stret wantaim save bilong saiens, mi pilim olsem mi mas kisim sampela save moa long Baibel. Olsem na taim wanpela Witnes Bilong Jehova i tok long stadi long Baibel wantaim mi, mi orait long mekim olsem. Bihain long mi kliagut long samting Jehova i tingting pinis long mekim, mi pilim olsem em wanpela man i stap tru na mi inap beten long em.”

◼ Jan, em i kamap bikpela long lotu Protestan long London. “Pasin bilong ol bikman bilong lotu long tupela maus, na planti pen na hevi i stap long nau i mekim na mi lusim lotu. Mi lusim tu skul na mi kirap long singsing na pilaim gita bilong kisim mani. Long dispela taim mi bungim Pat. Em i bin kamap bikpela long Misin Katolik na em tu i lusim lotu wankain olsem mi.

“Mipela i stap long wanpela olpela haus wantaim sampela narapela husat i bin lusim lotu bilong ol na ol i laik save long ol lotu bilong Esia. Mipela i save lusim planti aua long stori long as bilong laip na toktok i go inap long biknait. Maski mitupela Pat i no bilip olsem i gat God i stap, mipela i pilim olsem i mas i gat wanpela kain strong i stap olsem as bilong laip.

“Bihain long mipela i go sindaun long Noten Inglan bilong mekim wok bilong pilaim musik, pikinini man bilong mipela i bon. Long wanpela nait, bebi i sik na mi kirap beten long God em mi no bin bilip olsem em i stap tru. Bihain liklik, mitupela Pat i no stap wanbel moa, olsem na mi kisim bebi na lusim em. Nau mi kirap gen long beten, long wanem, mi tingting olsem ating i gat man i harim beten bilong mi. Mi no bin save, tasol Pat tu i bin mekim wankain samting.

“Long dispela de yet, tupela Witnes Bilong Jehova i go long haus bilong Pat na soim em sampela gutpela tok bilong Baibel. Pat i ringim mi na askim mi sapos i orait long mi ken stadi long Baibel wantaim em na ol Witnes. I no longtaim mipela i kisim save olsem bilong amamasim God, mipela i mas stretim marit bilong mipela. Tasol i hatwok tru long mipela i mekim olsem, long wanem, mipela i no stap wantaim.

“Mipela i laik kisim sampela save moa long truim bilong ol tok profet bilong Baibel, as bilong pen na hevi, na Kingdom Bilong God i makim wanem samting. Isi isi mipela i luksave olsem God i tingim tru mipela, na mipela i laik bihainim tok bilong em. Mitupela i stretim marit. Savetingting i stap long Tok Bilong God i helpim mipela long lukautim gut 3-pela pikinini bilong mipela. Mipela i bilip tru olsem Jehova i bin putim yau long ol beten bilong mipela.”

Yu Yet i Mas Skelim Gut Evidens

Olsem planti milion manmeri i bin mekim, ol dispela manmeri em tok bilong ol i stap long dispela atikol, ol i no larim lotu giaman i paulim ol, nogat, ol i luksave long as na God i larim pen na hevi i stap. Olsem wanem? Yu luksave tu olsem stretpela save bilong Baibel i bin helpim olgeta dispela manmeri long bilip tru olsem Jehova i save harim ol beten?

Olsem wanem? Yu laik skelim ol evidens i kamapim klia olsem God i stap tru? Ol Witnes Bilong Jehova bai amamas long helpim yu long kisim stretpela save long Jehova na long olsem wanem yu ken i go klostu long dispela Man i save “harim beten.”—Song 65:2.

[Ol Futnot]

[Rait long pes 9]

Bilip tru i gat as bilong en na i makim olsem man i laik kisim stretpela save long God

[Piksa long pes 10]

“Bihain long mi kliagut long samting Jehova i tingting pinis long mekim, mi pilim olsem em wanpela man i stap tru na mi inap beten long em”