YUMI ken tok yes. Long ol man em Jehova i orait long ol, em i tok promis olsem: “Bai mi lusim sin bilong ol na mi no ken tingim moa.” (Jeremaia 31:34) Jehova i strongim bel bilong yumi olsem taim em i fogivim ol sinman i tanim bel, em i no inap tingim moa ol sin bilong ol. Tasol yu ting dispela i makim olsem Man Bilong Wokim olgeta samting i no inap tingim gen ol sin em i bin fogivim? Tok bilong Esekiel i helpim yumi long kliagut long olsem wanem God i save fogivim sin bilong man na lusim tingting olgeta long en.—Ritim Esekiel 18:19-22.

Jehova i yusim profet Esekiel olsem mausman na em i tokaut olsem em bai mekim kot long ol manmeri bilong Juda na Jerusalem em ol i no stap gut long em. Olgeta manmeri i no lotu moa long Jehova, na ol i wok long pait na bagarapim man. Jehova i tok profet olsem ol Babilon bai bagarapim Jerusalem. Tasol Jehova i givim tu gutpela tok bilong strongim ol. Olgeta wan wan man i mas makim samting ol i laik mekim; olgeta wan wan man bai karim hevi long pasin ol yet i mekim.—Ves 19, 20.

Tasol olsem wanem sapos wanpela man i lusim ol pasin nogut bilong em na bihainim gutpela pasin? Jehova i tok: “Sapos wanpela man nogut i lusim sin bilong en, na em i bihainim ol lo bilong mi na mekim stretpela pasin tasol, orait bai em i no inap i dai. Nogat. Em bai i stap gut.” (Ves 21) Yes, Jehova i redi long “rausim sin” bilong man i lusim ol pasin nogut bilong em na i soim klia olsem em i tanim bel tru.—Song 86:5.

Olsem wanem long ol sin em i bin mekim? Jehova i tok: “Mi no ken tingim moa ol sin em i bin mekim bipo.” (Ves 22) Tingim, taim man i tanim bel tru, Jehova i “no ken tingim moa” ol sin bilong em na kotim em long dispela, nogat. Bilong wanem dispela em i bikpela samting?

Long Baibel, tok Hibru ol i tanim olsem “tingim” inap makim sampela samting moa na i no pasin bilong tingim tasol ol samting i bin kamap bipo. Wanpela buk i stori long dispela tok olsem: “Planti taim [dispela tok] i makim wanpela wok o ol samting man i mekim bilong kamapim wanpela wok.” Olsem na dispela tok “tingim” inap makim pasin bilong “mekim samting.” Olsem, taim Jehova i tok long wanpela sinman i tanim bel olsem Em i “no ken tingim moa ol sin em i bin mekim,” i olsem Jehova i tok Em bai i no inap mekim wanpela samting nogut, olsem givim strafe long dispela sinman. a

Tok bilong Esekiel 18:21, 22 i helpim yumi long pilim tru gutpela pasin bilong God long lusim sin bilong ol man. Taim Jehova i fogivim ol sin bilong yumi, bihain em i no inap tingim moa ol dispela sin na mekim save long yumi, nogat. Em i save lusim tingting olgeta long sin bilong ol man i tanim bel. (Aisaia 38:17) I olsem em i klinim yumi na rausim ol dispela sin.—Aposel 3:19.

Yumi ol sinman, olsem na i gat wok long God i mas marimari long yumi. Planti taim yumi save mekim sin. (Rom 3:23) Tasol Jehova i laik bai yumi save olsem sapos yumi tanim bel tru, em bai redi long lusim sin bilong yumi. Taim Jehova i fogivim yumi, em bai lusim tingting olgeta long ol sin bilong yumi—em bai i no inap tingim gen ol dispela sin na givim strafe long yumi. Dispela i mekim gut tru bel bilong yumi! Gutpela pasin marimari bilong God i kirapim yumi long i go klostu moa long em, a?

Baibel ritim bilong Julai:

◼ Esekiel 6-20

[Futnot]