‘Taim Yupela i Beten, Yupela i Mas Tok “Papa”’

“Papa.” Dispela tok i kirapim yu long tingim wanem kain man? Wanpela man husat i laikim na tingim tru famili bilong em? O wanpela man husat i no wari liklik long famili bilong em na ating em i save mekim nogut long ol? Pasin bilong papa bilong yu yet bai stiaim tingting bilong yu long ol dispela askim.

“PAPA” em tok we planti taim Jisas i yusim taim em i toktok wantaim God na long taim em i tokim ol narapela long Em. a Taim Jisas i skulim ol disaipel bilong em long beten, em i tok: “Taim yupela i beten, yupela i mas tok: ‘Papa.” (Luk 11:2) Tasol Jehova em i wanem kain papa? Bekim bilong dispela askim i bikpela samting tru. Bilong wanem? Taim yumi save gut long Jehova olsem wanpela gutpela Papa, bai yumi go klostu moa long em na laikim em tru.

I no gat wanpela man inap stori gut long yumi long ol pasin bilong Papa bilong yumi long heven, nogat, Jisas wanpela tasol inap mekim olsem. Em i pas gut wantaim Papa bilong em. Jisas i tok: “I no gat wanpela man i save tru long Pikinini, nogat, Papa tasol i save. Na i no gat wanpela man i save tru long Papa, nogat, Pikinini tasol wantaim ol man em Pikinini i gat laik long soim Papa long ol, ol tasol i  save long Papa.” (Matyu 11:27) Olsem na nambawan gutpela rot bilong save long Papa em long rot bilong Pikinini bilong em.

Yumi inap kisim wanem skul long Jisas long Papa bilong yumi long heven? Tingim tok Jisas i mekim, olsem: “God i laikim tumas olgeta manmeri bilong graun, olsem na em i givim dispela Pikinini tru bilong en long ol bai olgeta man husat i bilip long em ol inap abrusim bagarap na kisim laip oltaim.” (Jon 3:16) Ol tok bilong Jisas long dispela hap i kamapim klia nambawan bikpela pasin bilong Papa bilong yumi long heven—em pasin laikim. (1 Jon 4:8) Jehova i save kamapim klia pasin laikim bilong em long kain kain rot olsem, em i save orait long yumi, sori, lukautim, stretim, na tu, em i save givim yumi ol samting yumi nidim.

Papa i Orait Long Yumi

Taim papamama i orait long samting pikinini i mekim, dispela i save strongim bel bilong pikinini. Jisas i bin kisim bikpela strong taim em i harim Papa bilong em i tok: “Dispela em i Pikinini bilong mi, mi laikim em tumas na mi amamas long em.” (Matyu 3:17) Jisas i strongim yumi tu olsem Papa i laikim yumi na i orait long yumi. Jisas i tok: “Man i laikim mi, Papa bilong mi bai laikim em.” (Jon 14:21) Dispela tok i mekim gut tru bel bilong yumi! Tasol i gat wanpela man husat i no laik bai dispela tok i mekim gut bel bilong yumi.

Satan i laik mekim na bai yumi gat tupela tingting olsem Papa bilong yumi long heven i orait long yumi o nogat. Em i painim rot bilong mekim yumi pilim olsem yumi no gutpela inap long God i ken orait long yumi. Em i save mekim olsem taim yumi no gat strong moa—olsem taim yumi sik, lapun, yumi pilim olsem wok bilong yumi i no kamap gut, o sampela samting i mekim na yumi pilim nogut. Tingim ekspiriens bilong Lucas, em wanpela yangpela man husat i pilim olsem em i no gutpela inap long God i ken orait long em. Lucas i tok, taim em i liklik, pasin bilong papamama bilong em i senis olgeta na ol i no moa bihainim ol samting ol i bin skulim em long en. Olsem na em i pilim olsem i hatwok long pas gut wantaim Papa bilong em long heven. Na tu, Lucas i save hariap long mekim samting na i no skelim gut pastaim. Dispela i mekim na i hatwok long em i pren gut wantaim ol narapela. Tasol isi isi, meri bilong em i helpim em long bosim gut dispela pasin—em i no save les kwik na i strongim bel bilong Lucas, na Lucas i kolim em olsem “spesel blesing na presen i kam long God.” Lucas i luksave olsem “Krais Jisas i bin kam namel long ol manmeri bilong kisim bek ol sinman.” (1 Timoti 1:15) Lucas i tok, taim em i tingim tingim long bel olsem God i laikim em na i orait long em, dispela i mekim em amamas na em i pilim olsem laip bilong em i gat as bilong en.

Sapos sampela taim yu gat tupela tingting olsem Jehova i laikim yu o nogat, o i orait long yu o nogat, i gutpela yu ritim na tingim tingim long bel tok bilong Rom 8:31-39 na dispela bai strongim yu. Long dispela ves, aposel Pol i strongim yumi olsem i no gat wanpela samting “inap tekewe yumi long pasin laikim bilong God, em dispela pasin i stap long Krais Jisas, Bikpela bilong yumi.” b

Papa Bilong Pasin Sori

Papa bilong yumi long heven i tingim tru ol pen na hevi bilong yumi. Em i God bilong “pasin sori.” (Luk 1:78) Jisas i bihainim pasin bilong Papa bilong em long sori long ol sinman. (Mak 1:40-42; 6:30-34) Ol Kristen tru i wok strong long bihainim pasin sori bilong Papa bilong ol long heven. Ol i bihainim tok bilong Baibel long “mekim pasin helpim long narapela narapela, na sori tru long ol.”—Efesus 4:32.

Tingim ekspiriens bilong wanpela man nem bilong em Felipe. Wanpela taim em i laik i go long wok, na long rot em i pilim bikpela pen long baksait bilong em, i olsem wanpela i sutim em long naip. Kwiktaim ol man i bringim em i go long haus sik. Bihain long ol dokta i sekim em inap 8-pela aua, ol i tok olsem wanpela rop insait long lewa bilong em i bruk. Ol i tok em i gat 25 minit tasol bilong i stap laip, olsem na i no gat wok long operetim em.

Sampela wanlotu bilong Felipe i stap wantaim em long dispela taim, na pasin sori i kirapim ol long mekim sampela samting. Kwiktaim ol i stretim rot bilong kisim em i go long narapela haus  sik we ol dokta i mekim imejensi operesen na ol i stap wantaim em inap long operesen i pinis. Dispela i helpim Felipe na em i no dai. Nau, taim Felipe i tingim bek samting i bin painim em, em i tenkyu tru long ol wanbilip bilong em i bin mekim gutpela pasin sori long em. Tasol Felipe i bilip olsem Papa bilong em long heven i bin kirapim ol wanbilip long mekim dispela pasin sori. Felipe i tok: “I olsem God yet, em Papa i gat pasin laikim, i sanap long sait bilong mi na strongim mi.” Tru tumas, Jehova i save soim pasin sori bilong em long rot bilong kirapim ol wokman bilong em long graun long kamapim dispela pasin.

Papa Bilong Yumi i Save Lukautim Yumi

Taim wanpela liklik pikinini i pilim olsem bagarap i laik painim em, em i save ran i go long papa bilong em bilong kisim helpim. Pikinini i save pilim seif taim papa i holim em. Jisas i bilip tru olsem Jehova inap lukautim em. (Matyu 26:53; Jon 17:15) Yumi tu inap i stap gut aninit long lukaut bilong Papa bilong yumi long heven. Long nau, Jehova i lukautim yumi long ol samting bilong helpim yumi long stap strong long bilip. Olsem, em i givim yumi ol samting yumi nidim bambai yumi abrusim ol samting we inap nogutim pasin bilong yumi long pas gut wantaim em. Wanpela rot em i mekim olsem em long rot bilong ol skultok bilong Baibel. Taim yumi kisim ol dispela skultok, i olsem Jehova i wokabaut baksait long yumi na ‘i tokim yumi long rot yumi mas bihainim.’—Aisaia 30:21.

Tingim stori bilong Tiago na tupela brata bilong em Fernando na Rafael, em ol i memba bilong wanpela grup i save pilaim rok musik. Ol i amamas nogut tru taim ol i makim ol long pilaim musik long wanpela musik haus i gat nem long São Paulo, Brasil. I luk olsem gutpela samting bai painim ol. Tasol wanpela wanbilip bilong ol i givim tok lukaut long ol olsem pasin bilong pas tumas wantaim ol man em pasin bilong ol i no stret wantaim ol lo bilong God. (Sindaun 13:20) Em i kamapim wanpela ekspiriens bilong em yet bilong strongim dispela tok lukaut bilong Baibel. Brata bilong em i insait long pasin nogut, long wanem, em i bung wantaim ol poroman nogut. Olsem na Tiago na ol brata bilong em i lusim wok bilong pilaim musik. Long nau, olgeta 3-pela wantaim i mekim wok Kristen bilong autim tok fultaim. Ol i bilip olsem ol i bihainim tok bilong Baibel na dispela i bin lukautim ol na ol i pas gut wantaim God.

Papa Bilong Yumi Long Heven i Save Stretim Yumi

Gutpela papa i save stretim ol pikinini bilong em, long wanem, em i tingim tru ol bai kamap wanem kain man o meri long bihain. (Efesus 6:4) Kain papa olsem i strong long bihainim stretpela pasin, tasol em i no mekim hatpela pasin taim em i stretim ol pikinini. Olsem tasol, sampela taim Papa bilong yumi long heven i lukim olsem i gat wok long em i mas stretim yumi. Tasol taim God i stretim yumi, em i save mekim long pasin laikim na i no long hatpela pasin. Olsem Papa bilong em, Jisas i no save mekim hatpela pasin maski ol disaipel bilong em i no hariap long bihainim tok em i  mekim bilong stretim ol.—Matyu 20:20-28; Luk 22:24-30.

Tingim stori bilong wanpela man nem bilong em Ricardo. Em i tenkyu tru olsem Jehova i bin stretim em long pasin laikim. Papa i bin lusim Ricardo taim em i gat 7-pela mun tasol. Taim Ricardo i kamap tineja, em i bel hevi tru olsem em i no gat papa. Em i insait long ol pasin nogut, na maus bilong bel i wok long kotim em. Em i luksave olsem ol pasin em i wok long bihainim i no stret wantaim ol stretpela lo Kristen, olsem na em i toktok wantaim ol elda long kongrigesen bilong em. Ol elda i givim strongpela tok long em, tasol ol i mekim long pasin laikim na Baibel i as bilong ol dispela tok. Ricardo i tenkyu long ol i stretim em, tasol em i karim yet hevi long ol samting em i bin mekim—long nait em i no save slip, em i save krai, na em i bel hevi tru. Bihain, em i luksave olsem em i bin kisim ol skultok bilong stretim em na dispela i makim olsem Jehova i laikim em. Ricardo i tingim tok bilong Hibru 12:6 olsem: “Jehova i save stretim man em i laikim.”

I gutpela yumi tingim olsem pasin bilong stretim man i no makim tasol pasin bilong givim panismen o stretim tingting bilong man, nogat, i gat sampela samting moa i insait long en. Na Baibel i tok tu olsem pasin bilong stretim man i kain olsem wanpela trening. Olsem na Papa bilong yumi long heven inap stretim yumi long rot bilong larim yumi karim hevi bilong ol popaia bilong yumi inap sampela haptaim. Baibel i soim olsem taim Jehova i givim tok bilong stretim yumi, i olsem em i trenim yumi, na em i helpim yumi long bihainim stretpela rot. (Hibru 12:7, 11) Yes, Papa bilong yumi i laik tru bai yumi gat gutpela sindaun, na em i stretim yumi bilong helpim yumi.

Papa i Save Givim Ol Samting Yumi Nidim

Gutpela papa i save lukautim gut famili bilong em long sait bilong klos, kaikai, na haus samting. Jehova tu i gat kain pasin olsem. Jisas i tok: “Papa bilong yupela long heven i save olsem yupela i nidim ol dispela samting.” (Matyu 6:25-34) Jehova i tok promis olsem: “Mi no inap tru long lusim yu o givim baksait long yu long wanpela samting.”—Hibru 13:5.

Wanpela meri, nem bilong em Nice, i lukim truim bilong dispela tok taim man bilong em i pinis long wok. Nice i bin lusim gutpela wok mani bilong em bambai em inap lusim sampela haptaim moa long lukautim tupela pikinini meri bilong em na mekim wok bilong God. Orait nau, olsem wanem bai ol inap lukautim ol yet? Nice i beten long Jehova. Long neks de, man bilong em i go bek long ples wok bilong em long kisim ol samting bilong em. Em i kirap nogut taim bos i tokim em olsem i gat narapela wok i stap na em inap kisim dispela wok! Maski man bilong Nice i pinis long wok, long neks de stret em i kisim narapela wok. Nice na man bilong em i tok tenkyu long Papa bilong ol long heven long dispela gutpela samting i kamap. Ekspiriens bilong ol i helpim yumi long tingim olsem Jehova em i Man Bilong Givim ol samting, olsem na em i no inap tru long lusim tingting long ol gutpela wokman bilong em.

Tenkyu Long Pasin Laikim Bilong Papa

Tru tumas, i no gat wanpela tok inap long makim stret gutpela pasin laikim bilong Papa bilong yumi long heven! Taim yumi tingim ol kain kain rot em Jehova i soim pasin laikim bilong em olsem wanpela Papa—olsem em i orait long yumi, sori, lukautim, stretim, na tu, em i givim yumi ol samting yumi nidim—yumi ken tok em i nambawan gutpela Papa!

Olsem wanem yumi inap kamapim tenkyu bilong yumi long pasin laikim em Papa bilong yumi long heven i soim long yumi? Yumi ken wok strong long kisim sampela save moa long Em na long samting em i tingting pinis long mekim. (Jon 17:3) Yumi ken bihainim ol pasin i stret wantaim laik na lo bilong em. (1 Jon 5:3) Yumi ken bihainim pasin laikim bilong em long pasin yumi mekim long ol narapela. (1 Jon 4:11) Taim yumi mekim olsem, yumi soim olsem yumi tingim Jehova olsem Papa bilong yumi na yumi tingim olsem em i gutpela samting tru long yumi inap stap olsem ol pikinini bilong em.

[Ol Futnot]

[Rait long pes 19]

Taim yumi save gut long Jehova olsem wanpela gutpela Papa, bai yumi go klostu moa long em na laikim em tru

[Rait long pes 22]

Yumi soim olsem yumi tingim Jehova olsem Papa bilong yumi na yumi tingim olsem em i gutpela samting tru long yumi inap stap olsem ol pikinini bilong em

[Blok/Ol Piksa long pes 21]

JEHOVA I SOIM PASIN LAIKIM OLSEM PAPA LONG KAIN KAIN ROT

ORAIT LONG YUMI

SORI

LUKAUTIM

STRETIM

GIVIM SAMTING