Baibel i Save Senisim i Stap Bilong Man

BILONG WANEM wanpela man husat i bin kamap bikpela insait long strongpela Katolik famili na holim bikpela wok olsem man bilong karimaut lo, em i kamap wanpela Witnes Bilong Jehova? Wanem samting i kirapim wanpela teroris long lusim pasin bilong pait na em i kamap wanpela wokman bilong lotu? Ritim stori bilong ol.

“Mi kliagut moa long ol samting i stret na ol samting i no stret.”—SEBASTIÃO ALVES JUNQUEIRA

YIA MI BON: 1946

KANTRI: BRASIL

BIPO: JAS

LAIP BILONG MI LONG BIPO: Famili bilong mi i stap long kantri sait inap olsem 6 kilomita longwe long taun Piquete. Papamama bilong mi i gat liklik fam na mipela i save kisim kaikai long dispela fam. Skul mi go long en i stap long Piquete, olsem na mi baim wanpela olpela baisikol na dispela i helpim mi long i go i kam long taun. Ol manmeri long hap mipela i sindaun long en ol i stap rabis, tasol taun i stap klin na i no gat planti pasin raskol. Planti man long dispela taun i save wok long wanpela faktori bilong wokim ol gan samting bilong ami.

Mi gat laik long stadi gut na mi winim mak long go long Aeronautical Military School long wanpela taun i stap klostu, na long 1966 mi grediuet na kamap wanpela sajen. Bihain mi go long skul bilong lo na kisim digri long lo. Na bihain long en mi aplai long kisim wok olsem polis komanda. Long 1976, mi winim wanpela tes bilong gavman na mi kisim dispela wok. Sampela taim mi save mekim wok olsem edministreta bilong haus kalabus. Long dispela taim, ol Witnes i save kam askim mi sapos i orait long ol i ken autim tok long ol kalabusman. Olgeta taim ol i save kamapim wanpela tok bilong Baibel long mi tu. Mi save rispek tru long God. Mi bin amamas long kisim save olsem God i gat nem, em Jehova, na yumi inap kamap pren bilong em.

Isi isi mi wok long kisim ol wok i gat bikpela namba moa. Long 1981, mi winim mak long narapela tes bilong gavman na ol i makim mi i kamap jas bilong kantri. Orait long 2005, ol i makim mi i kamap jas bilong harim ol kot bilong apil long kot bilong São Paulo.

BAIBEL I SENISIM I STAP BILONG MI: Bihain tasol long mi pinisim skul bilong lo, mi kirap long ritim Baibel—em wanpela pasin i senisim tru tingting bilong mi. Mi wanpela strongpela Katolik. Sampela wanblut bilong mi ol i pris na wanpela em i bisop na mi save helpim pris long taim bilong Misa. Paslain long em i givim wanpela tok, mi save ritim sampela hap bilong prea buk. Em i no pasin bilong ol famili Katolik long ritim Baibel. Mama bilong mi i bel hevi tru taim em i painimaut olsem mi wok long ritim Baibel. Em i traim long pasim mi na em i tok mi bai kamap longlong. Maski i olsem, mi ritim yet Baibel na mi no lukim wanpela samting nogut i kamap long dispela.

 Mi laik kisim sampela save moa na dispela i strongim mi long ritim yet Baibel. Mi laik kisim sampela save moa long ol pris na wok bilong ol insait long sios. Na tu, mi kirap long ritim stori long Misin Katolik i mas wok strong long daunim hevi bilong ol man long sait bilong sindaun, wok politik, na mani, tasol mi lukim olsem tok na tingting bilong ol sapota bilong en i kranki olgeta.

Long dispela taim, dentis bilong mi husat i bilong lotu Buda, em i givim mi wanpela buk em ol narapela i bin givim long em. Nem bilong dispela buk em Did Man Get Here by Evolution or by Creation? a Mi kisim dispela buk, long wanem, mi ting em bai gutpela long skelim ol tok bilong en wantaim buk The Origin of Species, em Charles Darwin i bin raitim. Buk Did Man Get Here by Evolution or by Creation? i gat ol strongpela tok, ol tok i stret wantaim, na i kirapim tru tingting. Nau mi klia tru olsem tingting bilong evolusen i no gat as bilong en.

Taim mi ritim long dispela buk olsem God i bin wokim olgeta samting, dispela i mekim na mi laik kisim sampela save moa. Mi laik kisim sampela buk moa em ol Witnes Bilong Jehova i wokim. Wanpela i tokim mi olsem mekenik long skul bilong aeronautics em i wanpela Witnes Bilong Jehova. Mi toktok wantaim em na em i givim mi sampela buk bilong ritim. Long dispela taim, mi no orait long stadi long Baibel wantaim ol Witnes. Mi ting olsem mi yet i ken stadi long Baibel.

Taim mi kirap long ritim Baibel, mi tingting olsem mi marit pinis, olsem na i gutpela mi ritim wantaim famili bilong mi. Long olgeta wik, mipela i save mekim famili stadi na ritim Baibel wantaim. Mipela i Katolik na mipela i bilip moa long ol pris na ol bisop. Olsem na tok mi ritim long Jon 14:6 i kirapim tru tingting bilong mi, em i tok: “Jisas i tokim em [disaipel Tomas]: ‘Mi yet mi rot na tok i tru na laip. I no gat man inap kam long Papa long narapela rot, nogat, long rot bilong mi tasol.’” Bihain long mi skelim gut dispela tok, mi bilip tru olsem Jehova tasol inap kisim bek yumi long rot bilong Jisas. Lotu i skulim mipela long bilip olsem God inap kisim bek mipela long rot bilong ol pris.

Tupela skripsa bilong Baibel i senisim tingting mi gat long Misin Katolik na ol tok Misin i save skulim ol man long en. Wanpela em Sindaun 1:7, em i tok: “Sapos yu laik kisim gutpela save, orait pastaim yu mas aninit long Bikpela. Ol man i no gat gutpela tingting ol i no laik tru long skul na kisim gutpela save.” Na narapela em Jems 1:5, em i tok: “Sapos wanpela bilong yupela i sot long savetingting, orait em i mas wok long askim God, na God bai givim long em. Long wanem, God i save amamas long givim planti samting long ol man na em i no save krosim ol taim em i mekim olsem.” Mi gat strongpela laik tru long kisim save na gutpela tingting, tasol mi no bin inapim dispela laik taim mi go long lotu, olsem na mi lusim lotu.

Long 1980, meri bilong mi i kirap stadi long Baibel wantaim ol Witnes. Taim mi stap long haus mi save sindaun wantaim ol long stadi. I no longtaim, mi orait long stadi long Baibel. Tasol longpela haptaim i lus paslain long mipela i tingting long kisim baptais na kamap Witnes Bilong Jehova. Meri bilong mi i kisim baptais long 1994 na mi long 1998.

GUTPELA SAMTING I PAINIM MI: Mipela i mekim bikpela long 4-pela pikinini bilong mipela na ol tu i bihainim ol lo bilong Jehova long i stap bilong ol. (Efesus 6:4) Mi gat tupela pikinini man em ol i wok strong long mekim wok bilong God na helpim ol narapela Witnes long ol kongrigesen ol i stap long en. Tupela pikinini meri bilong mi i save givim bel tru long autim tok long ol narapela. Meri bilong mi i save lusim planti aua long olgeta mun long helpim ol man long kisim save long Baibel, na mi amamas long mekim wok olsem wanpela elda long kongrigesen bilong mipela.

 Taim mi kamap wanpela Witnes Bilong Jehova, mi kliagut moa long ol samting i stret na ol samting i no stret. Taim mi mekim wok jas long kot, mi traim long bihainim pasin bilong Jehova long skelim gut ol narapela narapela hevi i kamap, wokim gut tingting, na mekim pasin sori sampela taim.

Mi bin harim na skelim planti kot long pasin bilong pait, pasin raskol, bagarapim pikinini, na ol narapela pasin nogut. Maski i olsem, mi no tingting tumas long ol dispela samting. Taim mi lukim nius i stori long pasin nogut na olkain pasin pamuk, dispela i save bagarapim tru bel bilong mi. Tasol mi tenkyu long Jehova olsem mi kliagut long as na ol pasin nogut i go bikpela, na tu, mi tenkyu olsem mi inap wetim gutpela samting i kamap bihain.

“Kalabus i no helpim mi long senisim pasin.”—KEITH WOODS

YIA MI BON: 1961

KANTRI: NOTEN AIALAN

BIPO: TERORIS

LAIP BILONG MI LONG BIPO: Mi bon long 1961, long taun Portadown, long Noten Aialan. Papamama na famili bilong mi ol i bilong lotu Protestan, na mi kamap bikpela long wanpela kompaun we ol neiba bilong mipela ol i bilong lotu Katolik na lotu Protestan. Planti famili i stap rabis. Na planti man i no gat mani, na sampela taim mipela i save go long haus bilong narapela narapela na kaikai.

Mi no amamas long ol samting mi bin mekim long laip bilong mi. Long 1974, mi wok bung wantaim “Troubles,” em wanpela bikhetlain i bin stap long Noten Aialan long dispela taim bipo. Long dispela taim ol samting i go nogut moa. Olsem, wanpela nait papa bilong mi husat i maneja bilong wanpela kampani bilong wokim kapet long Ulster, em i stap long ples wok na i trenim tupela yangpela Katolik mangi em ol i neiba bilong mipela long kompaun. Long dispela nait yet, wanpela man i tromoi bom i go insait long windo bilong living rum long haus bilong dispela tupela Katolik mangi na kilim i dai papa, mama, na brata bilong tupela.

Hevi i go bikpela na woa i kirap. Ol Katolik i kukim haus bilong ol Protestan long komiuniti bilong ol Katolik, na ol Protestan i mekim nogut tru long ol Katolik i sindaun long hap bilong ol Protestan. Kompaun bilong mipela i kamap olsem hap bilong ol Protestan. I no longtaim na polis i arestim mi na putim mi long kalabus inap 3-pela yia, long wanem, mi bin insait long wok bilong bomim ol samting.

Taim mi stap long kalabus, mi pren gut wantaim wanpela man em planti man i save long em, long wanem, em i insait long wanpela lain politik. Mitupela i pas gut wantaim olsem brata tru na bihain mi kamap olsem besmen long weding bilong em. Kalabus i no helpim mi long senisim pasin, na i no helpim em tu. Taim mipela i pinis long kalabus, mitupela i insait moa yet long ol wok politik mipela i bin mekim bipo. Dispela i mekim na ol i kalabusim gen pren bilong mi. Em i stap yet long kalabus na ol man i kilim em i dai.

Ol man i laik kilim mi tu i dai na wanpela taim ol i bomim kar bilong mi. Tasol ol dispela  samting i strongim tingting bilong mi long insait tru long wok bilong sapotim “God na Ulster.”

Long dispela taim mi helpim long kamapim wanpela stori bilong lain “Troubles” na ol i bin soim dispela long TV bilong Briten. Dispela stori long TV i kamapim sampela hevi moa long mi. Olsem, wanpela nait mi go long haus na mi luksave olsem meri bilong mi i lusim mi na i go pinis. Bihain liklik, dispela stori long TV i mekim na ol man i kisim pikinini man bilong mi i go. Mi inap tingim olsem long dispela taim, mi lukluk long mira na tok, “Sapos i gat God i stap, helpim mi.”

Long Sarere long wik antap, mi bungim wanpela pren bilong mi, nem bilong em Paul, em i bin kamap wanpela Witnes Bilong Jehova. Em i kirap toktok wantaim mi long Baibel. Tupela de bihain, Paul i givim wanpela Wastaua long mi. Wanpela atikol long dispela magasin i kamapim tok bilong Jisas long Jon 18:36. Em i tok: “Kingdom bilong mi i no bilong dispela graun. Sapos kingdom bilong mi i bilong dispela graun, orait ol wokman bilong mi bai pait na bai ol man i no ken putim mi long han bilong ol Juda. Tasol kingdom bilong mi i no bilong dispela graun.” Mi pilim tru dispela tok. Kirap long dispela de, laip bilong mi i wok long senis.

BAIBEL I SENISIM I STAP BILONG MI: Paul i kirap stadi long Baibel wantaim mi. Bihain, narapela Witnes i stadi wantaim mi, nem bilong em Bill. Mi save olsem mi save givim hatwok long tisa bilong mi, long wanem, mi save kamapim planti askim! Na tu, mi save bringim planti wokman bilong lotu i kam long haus bilong mi long kamapim olsem tok bilong Bill i no stret. Tasol mi inap luksave long tok i tru i stap long Baibel.

Mi tingim wanpela taim mi tokim Bill olsem em i no ken kam long haus bilong mi long stadi, long wanem, ol man nogut i blokim rot na ol bai kisim kar bilong em na kukim. Tasol Bill i kam long stadi olsem em i save mekim. Em i lusim kar long haus bilong em na kam long baisikol. I no gat man bai i gat laik long kisim baisikol. Long narapela taim, mitupela Bill i sindaun long haus na mekim Baibel stadi taim ol polis na ami i kam bilong arestim mi. Taim ol i kisim mi i go, Bill i singaut long mi na tokim mi olsem mi mas bilip long Jehova. Mi pilim tru ol dispela samting Bill i mekim.

Long namba 1 taim mi go long miting bilong ol Witnes Bilong Jehova long Haus Kingdom, ating sampela bilong ol i bin kirap nogut tru long lukim bilas bilong mi. Mi gat longpela gras na mi werim yauring, na mi pasim saket ol i wokim long skin bilong animal, em mak bilong dispela bikhetlain mi insait long en. Tasol ol Witnes i mekim gutpela pasin tru long mi. Mi pilim tru gutpela pasin bilong ol.

Maski mi stadi long Baibel, mi save bung yet wantaim ol olpela pren bilong mi. Isi isi, mi pilim tru ol tok i tru bilong Baibel mi lainim. Mi luksave olsem sapos mi laik mekim wok bilong Jehova, mi mas senisim tingting bilong mi long wok politik na lusim ol olpela pren bilong mi. Dispela i no isi long mekim. Tasol taim mi wok long kisim sampela save moa long Baibel na larim Jehova i strongim mi, dispela i helpim mi long mekim ol senis. Mi katim gras, rausim yauring, na baim nupela siot na trausis. Samting mi lainim i wok long stiaim tingting mi gat long ol narapela.

GUTPELA SAMTING I PAINIM MI: Mi bin stap olsem raskol man na teroris. Ol lain polis na lain ami long dispela hap ol i save gut long mi. Tasol nau ol samting i senis. Olsem, taim mi laik go long namba 1 kibung bilong ol Witnes Bilong Jehova i kamap long taun Navan, ol polis i eskotim mi i go long Aialan na i go inap long Noten Aialan. Tasol nau mi save go long ol kibung na i no gat wok long polis i eskotim mi. Na tu, nau mi stap fri long mekim wok autim tok wantaim Paul, Bill, na ol narapela bratasista long kongrigesen.

Taim ol samting long laip bilong mi i wok long kamap gutpela, mi mekim ol senis na pas gut wantaim ol bratasista long kongrigesen. Bihain mi bungim wanpela Witnes nem bilong em Louise, na mitupela i marit. Na tu, mi na pikinini man bilong mi i bung na kamap wanbel gen.

Taim mi tingim bek laip bilong mi, mi rigret olsem mi bin nogutim na bagarapim ol narapela. Tasol mi ken tok tru olsem Baibel i save helpim ol kain man olsem mi long senisim ol pasin nogut bilong ol na kisim laip i gat as bilong en na wetim gutpela samting i kamap bihain.

[Futnot]

[Rait long pes 12]

Mama bilong mi i bel hevi tru taim em i painimaut olsem mi wok long ritim Baibel