Gretiuesen Bilong Klas 132 Bilong Gileat

Sambai Long Tok i Tru

MAS 10, 2012 em wanpela spesel de long ediukesen senta bilong ol Witnes Bilong Jehova long Patterson, New York. Planti tausen manmeri i bilas gut na kam na ol visita long ol narapela kantri tu i kam long dispela gretiuesen bilong klas 132 bilong Wastaua Baibel Skul Bilong Gileat. I gat planti manmeri tru long ples bung long Patterson, ol narapela i bung long ol narapela hap na lukim dispela program long TV. Bungim olgeta wantaim, inap olsem 9,042 manmeri i bin harim dispela program.

Ol sumatin i amamas tru long stap long dispela bung. Ol i no wankain long ol narapela sumatin i bin kam long skul bilong kamap misineri long bipo, nogat. Maski ol dispela sumatin bilong nau i no bin kam long Skul Gileat bipo, ol i bin mekim pinis sampela wok bilong fultaim sevis, olsem wok long Betel, wok painia salim, wok wasman raun, o wok misineri. Bai ol i mekim wanem tok long ol dispela sumatin i gat save?

Ol odiens i no wet longpela taim bilong kisim dispela bekim. Gerrit Lösch, em memba bilong lain Gavening Bodi Bilong Ol Witnes Bilong Jehova na siaman bilong program, em i mekim namba 1 tok. Em i mekim askim i kirapim tru tingting, olsem “Yu Save Sambai Long Tok i Tru?” Em i tok ol Kristen i save sambai long tok i tru, olsem sambai long olgeta bilip Kristen. Pasin bilong holimpas tok i tru i no makim tasol pasin bilong skulim ol man long tok i tru na em tasol, nogat, em i makim tu pasin bilong helpim ol man long laikim tok i tru.

Brata Lösch i kamapim dispela askim: “Olsem wanem yumi save olsem yumi gat tok i tru?” Bilong save long dispela samting, i no olsem yumi mas skelim namba bilong hamas manmeri i kisim tok i tru, nogat. Long nau planti milion manmeri i bihainim lotu i tru, tasol long Pentikos 33 C.E. liklik lain tasol i bin mekim olsem. Em i kolim 5-pela samting we inap helpim yumi long save yumi holim tok i tru: (1) Yumi holimpas ol tok Jisas i skulim ol man long en, (2) yumi laikim narapela narapela, (3) yumi bihainim ol lo bilong God long stretpela pasin, (4) yumi no insait long ol tok pait bilong dispela graun, na (5) yumi lain i holim nem bilong God.

“Harim na Bihainim Ol Tok Bilong Stiaim Yupela”

Ol man i stap long dispela bung i tingting planti taim ol i lukim Geoffrey Jackson bilong Gavening Bodi i kisim sutkeis i go wantaim em long pletfom! Nem bilong tok bilong em, “Harim na Bihainim Ol Tok Bilong Stiaim Yupela,” i kam long Aisaia 50:5. Dispela ves i tok profet long Jisas Krais olsem: “Mi no bikhet long em na mi no surik long wok em i laik givim mi.”

Brata Jackson i kirapim ol sumatin long redi long luksave long ol tok em Jehova i givim bilong stiaim ol long rot bilong holi spirit, Baibel, na oganaisesen bilong em. Long tok piksa i stap long Matyu 25:14-30, i olsem olgeta wan wan wokboi i kisim mani inap long wankain mak, long wanem, ol i kisim mani inap long skel bilong save na strong bilong wan wan bilong ol. Olsem na ol i mas mekim gut wok bilong ol. Tupela wokboi i bin kisim tok amamas na bosman i kolim tupela olsem “gutpela wokboi.” Bilong yumi ken skelim wanpela wok na tok olsem em i gutpela wok, i no olsem yumi mas skelim ol samting em dispela wok i kamapim, nogat, yumi mas skelim pasin bilong wokman long bihainim gut ol tok em i kisim bilong stiaim em.

Bosman i kolim namba 3 wokboi olsem “wokboi nogut” na “yusles wokboi.” Wanem hevi bilong em? Em i haitim talen bilong em. Talen i no nem bilong wanpela koin, nogat. Talen i makim 6,000 koin denarius na hevi bilong en inap olsem 20 kilogram. Dispela i wankain olsem sais na hevi bilong sutkeis em man i karim taim em i raun i go long ovasis. Man inap lusim bikpela haptaim na strong long digim graun na planim samting em  hevi bilong en inap olsem bilong sutkeis. So wokboi i mekim wanpela wok—em i planim talen—tasol dispela i no wok we bosman i tokim em long mekim, nogat. Olsem tasol, ating wanpela misineri bai bisi long mekim samting—tasol em bai bisi long mekim wanem samting tru? Raitim pas, lukluk long ol Web-sait bilong Intenet, painim amamas, o mekim wok bisnis? Long pinis bilong de, man i mekim kain wok olsem bai taiet tru, tasol em i no mekim samting ol i tokim em long mekim. Bilong pinisim tok, Brata Jackson i tok: “Oltaim yupela i mas bihainim ol tok bilong stiaim yupela!”

“No Ken Tru Holim Tupela Tingting”

Em tim bilong tok em Anthony Morris bilong Gavening Bodi i givim. Em i tok: “I no gat wanpela tok bilong Baibel i makim olsem pasin bilong bilip i poroman wantaim pasin bilong holim tupela tingting, nogat tru. Strongpela bilip i save rausim tupela tingting.” Satan i bin kirapim Iv, em meri i gutpela olgeta long kisim tupela tingting, olsem na em inap kirapim yumi tu long kisim tupela tingting. Brata Morris i tok: “Mekim ol samting bilong strongim bilip na dispela bai daunim tupela tingting.” Em i kirapim ol sumatin long tingim stori bilong Pita husat i “wokabaut antap long wara,” tasol taim em i lukim “traipela win,” em i pret na i stat long sink. Jisas i putim han i go na holim em na i askim em: “Bilong wanem yu gat tupela tingting?” (Matyu 14:29-31) Brata Morris i tok: “Yupela ol misineri bai mekim planti wok long fultaim sevis na ol narapela bai amamas long ol wok yupela i mekim, i olsem yupela i wokabaut antap long wara, tasol taim ol hevi i kamap, no ken kisim tupela tingting.”

Brata Morris i tok, taim yumi bungim ol bikpela hevi i olsem bikpela win na ren, dispela inap givim hatwok long yumi, tasol yumi ken tingim olsem dispela hevi bai pinis wankain olsem win na ren. Em i tokim ol sumatin olsem long taim bilong hevi, ol i mas tingim samting em Pol na Sailas i bin mekim taim ol i stap kalabus long Filipai. Aposel 16:25 i tok: “Klostu long biknait, Pol na Sailas i wok long beten na mekim ol singsing bilong litimapim nem bilong God, na ol arapela kalabusman i harim i stap.” Tingim dispela samting: Ol i no beten tasol, nogat, ol i singsing tu. Singsing bilong ol i bikpela na ol narapela kalabusman tu inap harim. Brata Morris i tok, planti bilong yumi i no gat gutpela nek bilong singsing, tasol yumi no ken sem long singsing long taim yumi gat hevi. Bilong pinisim tok, Brata Morris i ritim tok bilong Singsing namba 135 long buk Singsing Long Jehova, nem bilong en “Sanap Strong i Go Inap Long Pinis.”

Ol Narapela Gutpela Tok

“Yu Laik Bai Yu Stap Laip Longpela Taim Tru?” em het tok bilong tok bilong Robert Luccioni bilong Dipatmen Bilong Baim Ol Samting. Tim bilong dispela tok i kam long tok bilong King Devit long Song 34:12. Brata Luccioni i stori long olsem wanem yumi inap sanap strong na karim hevi na holimpas yet pasin bilong pas gut wantaim Jehova. Yumi inap kisim planti skul long stori bilong 1 Samuel sapta 30. Taim Devit wantaim ol man i bihainim em na ol famili bilong ol i ranawe long King Sol, ol i go stap long Siklak. Taim ol Amalek i kam pait na kisim ol famili bilong ol, ol man i bihainim Devit i sutim tok long Devit na ol i laik stonim em. Devit i mekim wanem? Em i no larim bel hevi i daunim em, nogat, em “i beten long God, Bikpela bilong en, na God i strongim tingting bilong em.” (1 Samuel 30:6) Devit i askim Jehova long stiaim em, na em i mekim ol samting i stret olsem God i tokim em long mekim, na em i go kisim bek lain bilong em i stap kalabus. Brata Luccioni i tokim ol sumatin olsem sapos ol tu i bilip long Jehova na bihainim tok em i givim bilong stiaim ol, ol bai stap amamas na stap laip longpela taim tru. Ol bai amamas long dispela gutpela wok ol i kisim.

“Tingim Ol Gutpela Samting Bai Kamap Bihain” em nem bilong tok em Michael Burnett i givim, em wanpela tisa bilong Skul Gileat. Ol Israel i brukim haptaim bilong nait i go long 3-pela haptaim i gat 4-pela 4-pela aua long en. Laspela haptaim bilong nait i kirap long 2 klok moning na i go inap 6 klok long moning. Dispela em haptaim we ples i tudak olgeta na kol tru na i hatwok tru long ai i op i stap. Man bilong raitim song i save tingting oltaim long ol tok bilong Jehova bambai ai bilong em i no ken slip long dispela laspela haptaim bilong was long nait. (Song 119:148) Brata Burnett i tokim ol sumatin olsem:  “Yupela i mas was i stap. Ol manmeri bilong dispela graun i no gat pasin laikim, olsem na i gat taim we yupela bai bungim ol hevi, na dispela i olsem yupela i stap long tudak bilong nait. Yupela i mas plenim gut ol samting yupela bai mekim.” Em i tokim ol olsem ol i mas stadi long ol bikpela tok bilong Baibel bambai bilip bilong ol i ken stap strong na bai ol i was i stap. Brata Burnett i tok: “Olgeta de yupela i beten long Jehova, long wanem, yupela i laik em bai stap pren bilong yupela. Olsem na larim Jehova, em pren bilong yupela, i toktok wantaim yupela long olgeta de long rot bilong Baibel. Klostu nau bai nait i pinis, olsem na plenim ol samting yupela bai mekim bihain, na long dispela rot yupela bai tingim ol gutpela samting bai kamap bihain.”

“Kisim Trening Long Wok Yupela Bai Mekim,” em tok i kam long 1 Pita 5:10 na Mark Noumair, em narapela tisa bilong Skul Gileat i mekim dispela tok. Em i askim ol sumatin olsem: “Yupela i save gut long autim tok, so bilong wanem ol i singautim yupela i kam long Wastaua Ediukesen Senta? Long wanem, yupela i save gut long mekim wok bilong yupela. Planti man i gat save long mekim gut wok ol i save kisim malolo long wok bambai ol i go long skul na kamap gutpela moa long wok bilong ol. Insait long 5-pela mun i go pinis, Jehova i bin ‘strongim’ yupela na ‘yupela i sanap strong’ long rot bilong stadi gut long Baibel na oganaisesen bilong em bambai yupela inap mekim ol bikpela wok em i givim long yupela. Ol strongpela timba i no save krungut o bruk taim ol man i putim ol hevipela samting antap long en. Olsem tasol, gutpela save yupela i kisim bai kamap ples klia taim yupela i wok wantaim ol bratasista. Taim ol hevi i kamap, yupela bai lusim ol stretpela stiatok bilong God, o yupela bai holim strong na bihainim yet skul yupela i bin kisim long Baibel? Sapos wanpela samting i gat strong, em inap karim hevi bilong ol samting. Sapos insait bilong timba i strong, dispela i save mekim timba olgeta i stap strong. Ol samting i stap long bel na tingting bilong yupela bai mekim na yupela i stap strong o nogat. Jehova i bringim yupela i kam hia bilong mekim yupela i kamap strong, redi long mekim wok, na stap olsem man ol narapela inap trastim bilong mekim wok. God i bin mekim wok bilong em, olsem na mipela i beten olsem yupela tu bai mekim wok bilong yupela na larim ‘Nambawan Bikpela Tisa’ long inapim trening bilong yupela.”

Ol Ekspiriens na Ol Intaviu

Long taim bilong gretiuesen bilong Gileat, yu inap kisim nupela strong long harim ol ekspiriens na ol intaviu bilong ol sumatin. Long wanpela hap bilong program, ol sumatin i mekim soim long ol samting i kamap long wok autim tok bilong ol. Olsem: Tupela marit bilong Frans i bin wet inap 6-pela aua long wanpela ples balus taim ol i laik i kam long Skul Gileat. Long haus kaikai bilong ples balus, tupela i kirap toktok wantaim 2-pela man husat i wet tu long kalap long balus. Taim wanpela bilong dispela 2-pela man i tok em i bilong Malawi, tupela marit i kirap toktok long em long tok Chichewa. Em i kirap nogut na askim tupela long olsem wanem tupela i save long tokples bilong em. Tupela i eksplenim long em olsem tupela i misineri long Malawi. Taim narapela man i tok em i bilong Kamarun, tupela i toktok long em long tok Frans na em i kirap nogut tru. Dispela tupela man i litimapim nem bilong ol Witnes Bilong Jehova na tupela misineri i autim tok long ol.

Nicholas Ahladis bilong Dipatmen Bilong Helpim Ol Lain i Tanim Tok i mekim intaviu long 4-pela marit em ol i sumatin. Tupela marit i bin lusim Australia na i go mekim wok misineri long Is Timor, em hap i gat woa long en. Narapela tupela marit i bin lusim Korea na i go mekim wok misineri long Hong Kong. Fopela marit wantaim i gat laik tru long go bek gen long ol dispela kantri na bihainim ol samting ol i bin lainim long skul.

Taim ol i givim pinis ol diploma long ol sumatin i grediuet, wanpela sumatin i stap olsem mausman bilong klas na em i ritim wanpela pas bilong kamapim amamas bilong ol sumatin long skul ol i bin kisim. Long laspela tok bilong Brata Lösch, em i kamapim sampela gutpela tok piksa na em i tok, tok i tru i naispela tru olsem renbo, olsem wanpela hulwara i stap long ples wesan nating, na i olsem anka bilong sip long taim bilong bikpela win na ren long solwara. Brata Lösch i tok: “Yumi save long tok i tru na dispela i olsem wanpela blesing. Sambai long tok i tru na helpim ol narapela tu long sambai long en.”

 [Sat/Mep long pes 31]

OL SAMTING BILONG OL SUMATIN

12 kantri ol i kam long en

36 averes krismas

20 averes yia ol i baptais

15 averes yia long fultaim sevis

[Mep]

(Bilong save ol dispela rait i stap we long pes, lukim buk o magasin)

Ol i makim ol sumatin long i go long ol kantri i stap daunbilo:

OL KANTRI OL BAI MEKIM WOK MISINERI LONG EN

SAU TOME PRINSIPI

KOT DIWA

SAMOA

LAIBIRIA

BELIS

PERU

GABON

BENIN

MALAWI

IS TIMOR

GINI

JOJIA

KEP VERD

SIMBABWE

RIPABLIK DOMINIKA

EKWADO

KAMBODIA

HONG KONG

MADAGASKA

KAMARUN

AMERIKA

[Piksa long pes 31]

Klas Namba 132 Bilong Wastaua Baibel Skul Bilong Gileat

Nem bilong ol bratasista i stap daunbilo. Namba 1 lain i sanap paslain, na namba 7 lain i sanap baksait tru. Taim yu ritim nem bilong ol na lukim pes bilong ol, kirap long han kais na i go long han sut.

(1) Iap, R.; Iap, J.; Ng, T.; Ng, P.; Laurino, F.; Laurino, B.; Won, S.; Won, S.

(2) Morales, N.; Morales, M.; Zanutto, J.; Zanutto, M.; Rumph, I.; Rumph, J.; Germain, D.; Germain, N.

(3) Atchadé, Y.; Atchadé, Y.; Thomas, C.; Thomas, E.; Estigène, C.; Estigène, P.

(4) Ehrman, D.; Ehrman, A.; Bray, J.; Bray, A.; Amorim, M.; Amorim, D.; Seo, Y.; Seo, Y.

(5) Simon, J.; Simon, C.; Seale, C.; Seale, D.; Erickson, J.; Erickson, R.

(6) McCluskey, D.; McCluskey, T.; Brown, A.; Brown, V.; Mariano, D.; Mariano, C.; Loyola, Y.; Loyola, C.

(7) Rutgers, P.; Rutgers, N.; Foucault, P.; Foucault, C.; Wunjah, J.; Wunjah, E.