“SAMPELA bikman i wok long daunim ol arapela manmeri na mekim nogut long ol.” (Saveman 8:9) Dispela tok em ol i bin raitim inap olsem 3,000 yia i go pinis i makim stret ol pasin i wok long kamap nau long taim bilong yumi. Ol man i mekim wok nogut long strong bilong ol maski ol i husat o ol i stap we. Planti taim ol i mekim nogut long ol man i no gat strong na ol man i stap rabis. Jehova i pilim olsem wanem long ol dispela kain pasin i no stret? Yumi inap painim bekim bilong dispela askim long Esekiel 22:6, 7, 31.—Ritim.

Long Lo em Jehova i givim long ol Israel, em i kamapim klia olsem ol man i gat wok bos ol i no ken tru mekim wok nogut long strong bilong ol. Em bai blesim lain Israel sapos ol lida bilong ol i tingim tru na mekim gutpela pasin long ol tarangu man na ol man i stap rabis. (Lo 27:19; 28:15, 45) Long taim bilong Esekiel, ol lida long Jerusalem na Juda i yusim strong bilong ol long mekim ol pasin i nogut tru. Wanem samting i kamap?

Olgeta lida “i gat strong bilong . . . kilim ol man i dai.” (Ves 6) Dispela tok “strong” i makim namba ol i gat bilong bosim ol man. Olsem wanem stretpela pasin bai i stap taim ol lida husat i gat wok long strongim na karimaut lo, ol yet i mekim wok nogut long strong bilong ol na kilim i dai ol man i no gat asua?

Bihain long dispela, Esekiel i sutim tok tu long ol lida bilong Israel, na tu, long ol manmeri em ol i bihainim pasin bilong ol dispela lida na sakim Lo Bilong Jehova. Esekiel i tok: “I no gat wanpela man long taun Jerusalem i save aninit long tok bilong papamama bilong en.” (Ves 7) Ol manmeri i no rispektim wok Jehova i givim long papamama, na long dispela rot ol i bagarapim samting i stap olsem as bilong strongim lain olgeta—em famili.—Kisim Bek 20:12.

Ol dispela bikhet manmeri i mekim nogut tru long ol manmeri i no gat strong em ol i sindaun namel long ol. Long olgeta taim ol i brukim lo, ol i soim olsem ol i no tingim Lo em God i givim long lain Israel long ol i mas mekim pasin laikim. Olsem, Lo Bilong God i tok long lain Israel i mas mekim gutpela pasin long ol man bilong narapela kantri em ol i sindaun namel long ol. (Kisim Bek 22:21; 23:9; Wok Pris 19:33, 34) Tasol lain Israel i “mekim nogut” long ol dispela manmeri.—Ves 7.

Ol manmeri i mekim nogut tu long lain i no gat helpim—olsem “ol meri, man bilong ol i dai pinis, na long ol pikinini, papa bilong ol i dai pinis.” (Ves 7) Jehova i tingim tru nid bilong ol pikinini em papa o mama i dai pinis na ol man na meri em poroman marit i dai. God i tok promis olsem em yet bai givim strafe long ol man husat i mekim nogut long ol tarangu pikinini na wido.—Kisim Bek 22:22-24.

Long ol dispela samting na long ol narapela samting tu, lain Israel long taim bilong Esekiel i brukim Lo Bilong God na ol i no rispektim dispela Lo em pasin laikim i as bilong en. Jehova bai mekim wanem? Em i tok: “Bai mi bagarapim ol nogut tru.” (Ves 31) God i truim tok bilong em taim em i larim ol Babilon i kam bagarapim Jerusalem na kisim ol manmeri bilong en i go kalabus long yia 607 B.C.E.

Ol tok bilong Esekiel i skulim yumi long tupela samting long pasin bilong Jehova na long pasin i no stret: Namba 1, em i heitim pasin i no stret; namba 2, em i sori long ol man i no gat asua i karim hevi. God i no save senis. (Malakai 3:6) Em i tok promis olsem klostu nau em bai rausim pasin i no stret na ol man husat i kamapim ol dispela pasin. (Sindaun 2:21, 22) I gutpela yu kisim sampela save moa long dispela God husat “i save laikim tumas stretpela pasin” na olsem wanem yu inap i go klostu moa long em.—Song 37:28.

Baibel ritim bilong Ogas:

◼ Esekiel 21-38

[Rait long pes 27]

Jehova i kamapim klia olsem ol man i gat wok bos ol i no ken tru mekim wok nogut long strong bilong ol