Ol Mirakel Klostu Nau Bai Kamap

SAPOS wanpela dokta bai mekim wanpela bikpela operesen long yu, orait bai yu pilim olsem wanem sapos yu painimaut olsem em i no bin mekim kain operesen olsem bipo? Ating bai yu tingting planti, a? Tasol olsem wanem sapos yu painimaut olsem dispela dokta em i nambawan dokta i gat save tru long mekim dispela operesen na em i bin mekim planti handret operesen olsem bipo? Ating bai yu bilip tru olsem em inap long helpim yu, a?

Dispela taim nau yumi stap long en i gat planti pen na hevi na i mas i gat rot bilong stretim dispela. Long rot bilong Baibel, God Jehova i tok promis long kamapim bek Paradais long graun. (2 Pita 3:13) Tasol bilong dispela samting i ken kamap, pastaim God i mas pinisim tru olgeta pasin nogut. (Song 37:9-11; Sindaun 2:21, 22) Olgeta pasin nogut na ol hevi yumi lukim long nau i mas pinis olgeta paslain long Paradais i kamap gen. I mas i gat wanpela mirakel bambai dispela samting i ken kamap!—Revelesen 21:4, 5.

Ol Witnes Bilong Jehova i bilip tru olsem ol dispela bikpela senis bai kamap klostu nau. Bilong wanem? Long wanem, long rot bilong ol mirakel em God Jehova i bin wokim, em i soim olsem em i gat strong long truim ol tok promis bilong em. Orait nau, skelim 6-pela tasol bilong planti mirakel em Baibel i stori long en wantaim ol tok promis Baibel i mekim long ol samting bai kamap bihain.

 Wok yet long kisim save long ol tok promis bilong Baibel long ol samting bai kamap bihain. Taim bilip bilong yu i wok long kamap strong, bai yu bilip tru olsem yu yet inap kisim helpim long ol mirakel Jehova bai kamapim long bihain.

 [Blok/Ol Piksa long pes 9, 10]

MIRAKEL:

JISAS I YUSIM SAMPELA BRET NA PIS LONG GIVIM KAIKAI LONG PLANTI TAUSEN MAN.—MATYU 14:13-21; MAK 8:1-9; JON 6:1-14.

PROMIS:

“Planti gutpela kaikai i kamap pinis long graun bilong mipela. God, em i God bilong mipela, em i bin mekim gut tru long mipela.”—SONG 67:6.

MINING BILONG EN:

I NO GAT MAN BAI STAP HANGRE.

MIRAKEL:

JISAS I ORAITIM AIPAS NA MAN I LUKLUK.—MATYU 9:27-31; MAK 8:22-26.

PROMIS:

“Ol aipas bai ol i lukluk.”—AISAIA 35:5.

MINING BILONG EN:

OLGETA AIPAS BAI LUKLUK.

MIRAKEL:

JISAS I ORAITIM OL MAN I GAT BAGARAP LONG BODI.—MATYU 11:5, 6; JON 5:3-9.

PROMIS:

“Ol lek nogut bai ol i kalap olsem ol dia.”—AISAIA 35:6.

MINING BILONG EN:

OLGETA KAIN BAGARAP LONG BODI BAI PINIS.

MIRAKEL:

JISAS I ORAITIM OL MAN I GAT KAIN KAIN SIK.—MAK 1:32-34; LUK 4:40.

PROMIS:

“I no gat man . . . bai i tok olsem, ‘Mi gat sik.’”—AISAIA 33:24.

MINING BILONG EN:

OLGETA KAIN SIK BAI PINIS. BAI YUMI GAT GUTPELA HELT.

MIRAKEL:

JISAS I BOSIM WIN NA REN.—MATYU 8:23-27; LUK 8:22-25.

PROMIS:

“Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring. Wok ol i mekim bai i no inap lus nating.”—AISAIA 65:21, 23.

“I no gat man moa bai i daunim yu na mekim nogut long yu, na bai yu no pret moa long wanpela samting. Olgeta pret bilong yu bai i pinis.”—AISAIA 54:14.

MINING BILONG EN:

BAI I NO GAT MOA OL BIKPELA DISASTA.

MIRAKEL:

JISAS I KIRAPIM BEK OL MAN I DAI PINIS.—MATYU 9:18-26; LUK 7:11-17.

PROMIS:

“Olgeta man i stap long matmat ol bai . . . kam ausait.”—JON 5:28, 29.

“Solwara i larim ol man i dai pinis na i stap long en, ol i go. Na dai wantaim Matmat i larim ol man i dai pinis na i stap long ol, ol i go.”—REVELESEN 20:13.

MINING BILONG EN:

OL PREN NA FAMILI BILONG YUMI I DAI PINIS BAI KIRAP BEK.