Tru Ol Mirakel Inap Kamap?​—Tripela Tingting Kranki

NAMBA 1: Ol mirakel i no inap tru long kamap, long wanem, dispela i no stret wantaim ol lo i bosim ol samting bilong graun. Ol saientis i bin skelim gut ol samting i kamap long graun na dispela i as bilong save yumi gat long ol lo i bosim ol samting bilong graun. Tasol ol dispela lo i kain olsem ol lo bilong kolim wanpela tokples, ating i gat sampela tok we dispela lo i no bosim. Ating yumi save pinis long “ol lo” i bosim graun, tasol dispela save bilong yumi i sot tru. (Jop 38:4) Wanpela saientis inap lusim laip olgeta bilong em long skelim wanpela bilong ol lo i bosim ol samting bilong graun. Tasol sapos saientis i lukim wanpela samting we i no stret long save em i bin kisim long dispela lo, orait nau em i mas senisim tingting em i holim pinis long dispela lo. Olsem wanpela savetok i kamapim, “Sapos yu lukim wanpela blakpela pato tasol, dispela i kamapim klia olsem tingting ol man i gat olsem olgeta pato i waitpela, dispela tingting em i kranki.”

Wanpela pani stori i soim olsem man inap larim ol hap hap save i stap olsem as bilong tingting em i holim long wanpela samting. John Locke (1632-1704 C.E.) i stori long ambasada bilong Netelan na king bilong Siam olsem: Taim ambasada i stori long king long kantri bilong em long Holan, em i tok sampela taim elefan inap wokabaut antap long wara. King i sakim dispela tingting na i ting olsem ambasada i giamanim em. Tasol ambasada i stori long samting em king yet i no bin mekim o save long en bipo. King i no bin luksave olsem taim wara i tanim i kamap ais, em i strong na elefan inap wokabaut antap long en. Long tingting bilong king dispela samting i no inap kamap, long wanem, em yet i no bin lukim kain samting bipo.

Tingim sampela wok ol man i mekim long nau, em ol wok we sampela yia i go pinis ol man i bin ting olsem ol i no inap tru long mekim.

● Wanpela balus inap karim moa long 800 pasindia na flai long New York i go stret long Singapore, na spit tru inap 900 kilomita long olgeta wan wan aua.

 ● Ol man inap wokim ol kibung na toktok wantaim ol manmeri i stap long narapela narapela hap bilong graun long rot bilong vidio.

● Wanpela liklik masin olsem sais bilong masis boks inap holim planti tausen singsing.

● Ol dokta inap mekim ol operesen we ol i rausim klok o ol narapela hap bilong bodi bilong wanpela man na putim long narapela man.

Yumi inap kisim wanem tingting long ol dispela save? Sapos ol man i ken mekim kain ol bikpela wok olsem we bipo ol man i bin ting i no inap tru long man i mekim, orait yumi ken save tru olsem God em Man i bin wokim yunives na olgeta samting i stap long en, em inap mekim ol bikpela samting we yumi no inap kliagut long en o yumi yet i no inap mekim. a—Stat 18:14; Matyu 19:26.

NAMBA 2: Baibel i stori long ol mirakel bilong kirapim ol man long bilip. Baibel i no tok yumi mas bilipim olgeta mirakel. Tasol Baibel i givim tok lukaut olsem yumi no ken bilip nating long olgeta kain mirakel na ol bikpela sain. Tingim dispela tok lukaut: “Long strong bilong Satan, dispela man bilong sakim lo i kam i stap, na em i mekim olgeta kain strongpela wok na ol giaman mirakel na ol narakain samting na olgeta kain pasin nogut bilong giamanim ol man.”—2 Tesalonaika 2:9, 10.

Jisas Krais tu i givim tok lukaut olsem, planti man bai tok ol i bihainim em, tasol ol i no disaipel tru bilong em. Na tu, sampela bai tokim em olsem: “Bikpela, Bikpela, mipela i bin mekim tok profet long nem bilong yu, na rausim ol spirit nogut long nem bilong yu, na mekim ol strongpela wok long nem bilong yu.” (Matyu 7:22) Tasol Jisas i tok olsem em i no inap  orait long ol dispela man. (Matyu 7:23) I klia tru olsem Jisas i no bin skulim ol man olsem olgeta mirakel i kam long God.

God i no tokim ol man i lotuim em olsem ol mirakel i mas i stap olsem as bilong bilip bilong ol, nogat. As bilong bilip bilong ol em ol samting ol i save tru long en.—Hibru 11:1.

Olsem, yumi ken skelim wanpela mirakel long Baibel em planti man i save long en, em kirap bek bilong Jisas Krais. Planti yia bihain long dispela mirakel i bin kamap, sampela Kristen long Korin i gat tupela tingting olsem tru tru Jisas i bin kirap bek o nogat. Olsem wanem aposel Pol i helpim ol dispela Kristen? Yu ting em i tok tasol olsem, “Yupela i mas kisim strongpela bilip”? Nogat. Tingim samting em i bin mekim bilong kirapim ol long tingim ol samting tru tru i bin kamap. Em i tok: “Ol i bin planim [Jisas], na long namba 3 de em i kirap bek olsem Rait Holi i tok. Na em i kamap long Sifas, na bihain em i kamap long ol 12-pela aposel. Bihain long dispela em i kamap long 500 brata wantaim. Planti bilong ol i stap yet wantaim yumi.”—1 Korin 15:4-8.

Yu ting em i bikpela samting long ol dispela Kristen i bilip long dispela mirakel? Pol i tok moa: “Sapos Krais i no bin kirap bek, orait wok yumi mekim long autim tok i no gat as bilong en, na bilip bilong yumi i no gat as bilong en.” (1 Korin 15:14) Pol i tingim kirap bek bilong Jisas olsem bikpela samting, maski ol man i gat tupela tingting long dispela! Pol i save olsem dispela mirakel i bin kamap tru, long wanem, i gat planti handret aiwitnes i stori long dispela samting na ol i bin stap laip yet long dispela taim. Ol dispela aiwitnes i redi long tokaut long samting ol i bin lukim, maski ol man i laik kilim ol i dai long dispela.—1 Korin 15:17-19.

NAMBA 3: Ol mirakel em ol samting i kamap nating tasol na ol man i no gat save ol i no kliagut long en. Sampela saveman i tok olsem ol mirakel em Baibel i stori long en, em ol samting i kamap nating na God i no as bilong en. Ol i pilim olsem ol stori bilong ol mirakel i mekim na ol man i bilip moa long Baibel. Em tru olsem long sampela mirakel, ol bagarap i save kamap nating, olsem ol guria, ol bikpela sik, na graun i bruk. Tasol ol saveman i no tingim taim stret ol dispela mirakel i bin kamap olsem Baibel i stori long en.

Olsem, namba 1 hevi em God i bin givim long ol Isip we wara i tanim i kamap blut, sampela man i tok dispela i no tru. Ol i tok wara i bin wasim retpela graun na wanpela kain liklik retpela binatang flagellates i kam daun long wara Nail na i mekim wara i kamap retpela. Tasol Baibel i tok wara i bin kamap blut, na i no tok graun malumalum i mekim wara i kamap retpela, nogat. Taim yumi ritim gut Kisim Bek 7:14-21, yumi inap luksave olsem mirakel i bin kamap long taim stret we Moses i tok na Aron i yusim stik bilong em long paitim wara Nail. Maski sampela samting i bin kamap nating na i mekim wara i senisim kala, dispela samting i bin kamap stret long taim we Aron i bin paitim wara, olsem na dispela em i wanpela mirakel!

Narapela eksampel i kamapim klia olsem taim stret we mirakel i kamap em i bikpela samting, em long taim lain Israel i redi long go insait long Graun Bilong Promis. Wara Jordan i bin tait na i pasim rot. Baibel i stori long samting i kamap olsem: “[Ol pris i karim Bokis Kontrak] i go kamap long arere bilong wara na ol i putim lek i go daun long wara, na wara i pas olgeta na i no moa ran. Na wara i stap antap i stap olsem wanpela longpela maunten i go inap long ples Adam.” (Josua 3:15, 16) Yu ting dispela samting i kamap, long wanem, i gat guria o graun i bruk? Baibel i no stori long dispela. Tasol taim stret we samting i kamap i soim olsem em i wanpela mirakel. Em i kamap long taim stret we Jehova i tok em bai kamap.—Josua 3:7, 8, 13.

Olsem na yu ting tru tru ol mirakel i save kamap? Baibel i stori long ol mirakel i bin kamap tru. Olsem Baibel i tok, ol mirakel i no ol samting i kamap nating tasol. Olsem na yu ting i stret long tok olsem ol mirakel i no inap kamap, long wanem, ol i no save kamap long olgeta de?

[Futnot]

[Piksa long pes 5]

Sampela yia i go pinis, planti man i bin ting ol man i no inap flai long balus inap planti handret kilomita long wanpela aua