Yu Inap Bilip Long Ol Mirakel Baibel i Stori Long En?

SAPOS wanpela man i mekim wanpela gutpela stori, pasin bilong em long tok tru bai mekim na bai yu bilipim stori bilong em, a? Yu bilip long stori bilong em, long wanem, em i gat pasin bilong tok tru oltaim. Olsem, inap planti yia dispela man i save tok tru tasol long yu na em i no save giamanim yu, olsem na i gat as na nau yu bilipim samting em i tokim yu long en.

Dispela i wankain long ol mirakel em Baibel i stori long en. I no gat wanpela bilong yumi i bin stap laip taim ol dispela samting i kamap. Tasol yumi ken painimaut sapos i gat as long yumi ken bilipim ol tok bilong Baibel, olsem olgeta tok bilong en i tru o nogat. Olsem wanem yumi ken painimaut dispela samting? Skelim sampela samting i stap olsem as na yumi inap bilipim ol mirakel em Baibel i stori long en:

Planti mirakel i bin kamap long ol pablik ples. Sampela taim planti tausen o milion manmeri i lukim ol dispela mirakel. (Kisim Bek 14:21-31; 19:16-19) Ol dispela mirakel i no kamap long ples hait, nogat, ol i kamap long ai bilong pablik.

I no gat bilaspasin taim man i wokim mirakel. I no gat ol pletfom, olkain bilaspasin, o ol lait bilong trikim man. Planti taim ol mirakel em Baibel i stori long en i kamap long kain kain taim na ples we ol man i stap long en na long taim ol man yet i askim. (Mak 5:25-29; Luk 7:11-16) Long ol kain taim olsem, man bilong wokim mirakel i no bin wokim bikpela bung taim em i wokim ol mirakel.

Astingting bilong ol man i wokim ol mirakel em i no bilong kisim biknem, glori, na mani bilong helpim ol yet, nogat. Ol dispela mirakel i bilong givim glori long God. (Jon 11:1-4, 15, 40) God i tambuim pasin bilong wokim mirakel bilong kisim mani kago.—2 King 5:15, 16, 20, 25-27; Aposel 8:18-23.

Baibel i stori long planti narapela narapela mirakel na i soim olsem ol mirakel i no wok ol man yet i mekim long strong bilong ol. Olsem, long rot bilong mirakel, raunwara na win i stap isi tru, wara i senis i kamap wain, ren i stop na pundaun gen, ol sikman i kamap orait, na ol aipas inap lukluk. Ol dispela mirakel na planti narapela i soim olsem wanpela man i gat bikpela strong, winim strong bilong ol man, na em i bosim olgeta kain samting, em i as bilong ol kain mirakel olsem.—1 King 17:1-7; 18:41-45; Matyu 8:24-27; Luk 17:11-19; Jon 2:1-11; 9:1-7.

Ol birua husat i lukim ol mirakel ol i no gat tupela tingting olsem ol mirakel i bin kamap tru. Taim Jisas i kirapim bek pren bilong em Lasarus, ol birua bilong Jisas i no gat tupela tingting olsem tru tru Lasarus i bin dai o nogat. I no gat as long ol i gat tupela tingting, long wanem, bodi bilong Lasarus i bin stap long matmat  inap 4-pela de pinis. (Jon 11:45-48; 12:9-11) Sampela handret yia bihain long taim Jisas i dai, ol man bilong raitim buk Talmut Bilong Juda ol i tokaut yet long strong bilong Jisas long wokim ol mirakel. Tasol ol i laik save wanem samting i as bilong dispela strong bilong wokim ol mirakel. Olsem tasol, taim ol disaipel bilong Jisas i bin sanap long kot bilong ol Juda, kot i no askim ol olsem, “Tru yupela i bin wokim wanpela mirakel?” Nogat. Kot i askim olsem: “Yutupela i bin kisim we strong long mekim dispela samting? Na yutupela i mekim dispela samting long nem bilong husat?”—Aposel 4:1-13.

Olsem na yu ting yu inap bilip long ol mirakel em Baibel i stori long en? Long ol dispela samting yumi skelim, i klia tru olsem i stret yumi ken bilip long ol mirakel em Baibel i stori long en. I gat ol narapela samting tu i stap olsem as na yumi ken bilip long ol dispela stori bilong Baibel. Olsem, taim Baibel i stori long wanpela samting, planti taim em i save tokim yumi long taim, ples, na nem bilong ol man i insait long en. Na tu, sampela man bilong skelim ol tok bilong Baibel i bin kirap nogut tru olsem ol tok bilong Baibel i stret wantaim ol samting i bin kamap bipo. Planti handret tok profet bilong Baibel i bin kamap tru long ol bikpela samting na long ol liklik samting tu. Na tu, Baibel i gat planti gutpela tok long olsem wanem ol man i ken stap amamas—em ol tok i bin helpim ol man i gat kain kain krismas na kain kain sindaun. Ol skultok bilong Baibel i bin helpim tru ol man long stap gut wantaim ol narapela, winim ol tok em ol narapela buk i kamapim.

Sapos yu yet i no bin bilip tru long Baibel, i gutpela yu lusim sampela haptaim long skelim gut ol tok bilong en. Taim yu save gut long Baibel, bai yu bilip moa long ol tok bilong en. (Jon 17:17) Yu bai luksave olsem yu ken bilip long ol tok em i mekim long ol mirakel i bin kamap bipo. Taim yu bilipim ol dispela stori, yu bai luksave olsem i gat as tru na yu ken bilip long ol tok Baibel i mekim long ol samting bai kamap klostu nau.

[Piksa long pes 7]

Ol birua bilong Jisas i no gat tupela tingting olsem tru tru Lasarus i bin dai o nogat