OLSEM WANEM? Wankain olsem planti narapela man, yu tu i pilim olsem pasin korapsen bai i stap oltaim na i no inap pinis? I stret yu pilim olsem. Kirap long bipo yet na i kam inap long nau, ol man i bin kamapim kain kain gavman. Tasol ol i no bin pinisim tru pasin korapsen. Olsem wanem? Yumi inap wetim wanpela taim bai kamap bihain we olgeta manmeri bai mekim onest pasin?

Yes, Baibel i tok olsem! Baibel i tok klostu nau God bai mekim samting bilong pinisim pasin korapsen long graun. Em bai mekim olsem wanem? Long rot bilong Kingdom bilong em, em wanpela gavman long heven bai senisim tru olgeta samting long graun. Em dispela Kingdom we Jisas i bin tokim ol disaipel bilong em long beten long en. Long Beten Bilong Bikpela, Jisas i tok: “Kingdom bilong yu i mas i kam. Laik bilong yu i mas kamap long graun.”—Matyu 6:10.

Baibel i tok profet long Jisas Krais, em King bilong dispela Kingdom, na i tok: “Em i save helpim ol rabisman i singaut long em. Na  ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol. Sapos ol man nogut i laik daunim ol na bagarapim ol, em i save kisim bek ol.” (Song 72:12-14) Yumi ken luksave olsem Jisas i sori long ol man i karim hevi long pasin korapsen na em bai pinisim pasin bilong daunim ol narapela! Em gutpela samting tru, a?

Kingdom Bilong God bai pinisim tru pasin korapsen long dispela graun long rot bilong dispela King i gat pasin sori na bikpela strong. Em bai mekim olsem wanem? Em bai mekim olsem long rot bilong pinisim 3-pela samting i stap olsem as bilong pasin korapsen.

Long nau, yumi olgeta i mas wok strong long daunim ol laik nogut i save kirapim yumi long tingim yumi yet tasol. (Rom 7:21-23) Tasol i gat sampela manmeri husat i laik mekim stretpela pasin. Ol i bilip long pe bilong baim bek man em Jisas i bin givim long rot bilong blut bilong em, na long dispela rot God inap fogivim ol sin bilong ol. a (1 Jon 1:7, 9) Ol dispela manmeri bai kisim ol blesing i kam long bikpela pasin laikim bilong God, olsem yumi ritim long Jon 3:16: “God i laikim tumas olgeta manmeri bilong graun, olsem na em i givim dispela Pikinini tru bilong en long ol bai olgeta man husat i bilip long em ol inap abrusim bagarap na kisim laip oltaim.”

God bai mekim gut tru long ol manmeri husat i stap gut long em. Long nupela taim klostu nau bai kamap, em bai rausim sin i stap long skin bilong ol, na isi isi em bai mekim ol man i kamap gutpela olgeta na ol bai i stap olsem stretpela man long ai bilong em. (Aisaia 26:9; 2 Pita 3:13) Strong bilong sin i no inap tru long pulim ol man long mekim gen pasin korapsen, nogat tru. Aninit long wok bos bilong Kingdom Bilong God, ol gutpela man bai “lusim dispela kalabus bilong bagarap.”—Rom 8:20-22.

Sori tru, planti man long nau long laik bilong ol yet ol i mekim nogut long ol narapela. Ol i daunim ol man nating na ol man i stap rabis, na ol i kirapim ol narapela man tu long mekim wankain pasin korapsen. Baibel i tokim ol kain man olsem: “Ol manmeri bilong mekim ol pasin nogut i mas lusim ol pasin nogut bilong ol na ol i no ken tingting moa long mekim ol dispela pasin.” Sapos ol kain man olsem i tanim bel, Baibel i tok promis olsem God bai “lusim sin bilong olgeta dispela lain.”—Aisaia 55:7.

Tasol God bai pinisim tru ol man i sakim tok bilong em na i no laik senisim pasin bilong ol. Long rot bilong Kingdom Bilong God, dispela tok promis bilong Baibel bai kamap tru, em i tok: “Yu mas bilip long Bikpela . . . na bihainim pasin bilong em. . . . Na bai yu lukim em i bagarapim ol man nogut.” (Song 37:34) Taim ol dispela man nogut i pinis, ol man i stap gut long lotuim God ol bai i no inap karim moa hevi bilong pasin korapsen.

Satan em nambawan man bilong mekim sin namel long ol man em bel bilong ol i strong pinis long mekim sin. Yumi amamas tru long save olsem klostu nau Jehova bai kalabusim Satan na pasim em long pulim ol man. Bihain, God bai pinisim Satan olgeta. Dispela man nogut tru bai i no inap kirapim ol man moa long mekim pasin korapsen, nogat tru.

Dispela tingting olsem God bai pinisim olgeta kain samting i save kamapim pasin korapsen, ating ol man bai ting em i wanpela driman nating tasol. Ating yu tingting planti olsem: ‘Tru tru God i gat rot bilong kamapim ol dispela senis? Sapos em i gat rot bilong mekim olsem, orait bilong wanem em i no bin mekim?’ Em ol gutpela askim na Baibel i kamapim ol bekim bilong ol. b Mipela i laik kirapim yu long skelim ol tok Baibel i skulim ol man long en long ol samting bai kamap klostu nau, taim olgeta pasin korapsen bai pinis.