Wai na Pasin Korapsen i Stap Yet?
“Sampela bikman i wok long daunim ol arapela manmeri na mekim nogut long ol.”—SAVEMAN 8:9.
DISPELA tok i makim stret wok bos bilong ol man kirap long bipo yet. Wok bos bilong ol man i bin kamapim planti pen na hevi. Long olgeta taim, ol man i gat gutpela tingting i bin traim long kamapim stretpela pasin, tasol planti taim pasin mangal na pasin korapsen i pasim rot bilong ol. Bilong wanem i olsem? Wai na pasin korapsen i stap yet? Bai yumi skelim 3-pela samting nogut i stap olsem as bilong pasin korapsen.
1. Strong bilong sin.
Baibel i tok “sin i pas long yumi olgeta.” (Rom 3:9) Sin i stap “insait long bodi” bilong yumi wankain olsem wanpela sik nogut em pikinini i kisim long papamama taim em i bon. Inap planti tausen yia sin i stap olsem king na i bosim ol man. “Lo bilong sin” i wok yet long kalabusim yumi. Ol laik nogut bilong skin i kirapim planti man long tingim ol yet tasol o wok strong long kisim planti mani kago o namba long rot bilong daunim ol narapela.—Rom 5:21; 7:17, 20, 23, 25.
2. Strong bilong pasin nogut bilong dispela graun.
Graun bilong yumi i pulap long pasin mangal na pasin bilong man long tingim em yet tasol. Namel long ol man i mekim kain pasin olsem, sampela man i pilim olsem i hatwok long stap narapela kain. Ol i tingting long helpim ol yet tasol na ol i strong tumas long mekim wok bos. Na tu, ol i gat bikpela laik tru long kisim planti mani na kago samting, maski ol i gat pinis ol dispela samting. Sori tru, ol i redi long mekim pasin giaman bilong kisim ol dispela samting. Ol kain man olsem i no sakim ol samting nogut, nogat, ol i “bihainim pasin bilong ol” man nogut.—Kisim Bek 23:2.
3. Strong bilong Satan.
Satan, dispela bikhet ensel i save “giamanim olgeta manmeri bilong graun.” (Revelesen 12:9) Em i save amamas long stiaim ol manmeri long bihainim laik bilong em. Long pasin hait em i save mekim wok nogut long kirapim strong laik bilong ol man long kisim ol samting bilong skin na bikpela mani, em i mekim olsem i go inap long mak we man i giaman bilong kisim ol dispela samting.
Yu ting dispela i makim olsem Satan i save bosim strong yumi na mekim yumi bihainim olgeta liklik samting em i laik yumi mas mekim? Bai yumi kisim save long bekim bilong dispela askim long atikol i kamap bihain long dispela.
