Mauricio: Gutpela long lukim yu gen, Alejandro.

Alejandro: Mi amamas long lukim yu tu.

Mauricio: Mi wok long tingim wanpela samting yu bin kolim long laspela taim mi bin kam long hia.

Alejandro: Wanem dispela samting?

Mauricio: Yu bin tok yu kirap nogut long harim olsem ol Witnes Bilong Jehova i no bilip long helpaia.

Alejandro: Yes, mi bin kirap nogut long dispela samting. Em tru, mi hatwok long tingim olsem yupela i no bilip long helpaia.

Mauricio: Tenkyu long tokim mi long dispela samting. Mi save amamas long harim ol narapela i kamapim tingting bilong ol. Ol man i gat kain kain tingting long helpaia, olsem na inap mi askim yu long stori long wanem bilip yu gat long helpaia?

Alejandro: Mi save bilip olsem taim ol man nogut i dai, ol i go long helpaia na kisim pen oltaim.

Mauricio: Planti man i gat dispela tingting. Mi laik givim wanpela askim long yu, i gat sampela samting nogut i bin kamap long laip bilong yu?

Alejandro: Yea, inap 5-pela yia i go pinis ol man i bin kilim i dai susa bilong mi.

Mauricio: Sori tru long harim olsem. Ating yu misim em tru.

Alejandro: Yea, mi save tingim em long olgeta de.

Mauricio: Mi lukim olsem sampela manmeri i save holim strong dispela bilip bilong helpaia, long wanem, pasin bilong sampela man nogut i bin bagarapim tru bel bilong ol. Ol man i no gat asua i laik bai ol man nogut i kisim strafe i stret long pasin nogut ol i mekim.

Alejandro: Em stret! Mi laik bai dispela man husat i kilim i dai susa bilong mi, em i mas kisim strafe i stret long samting em i bin mekim long famili bilong mipela.

Mauricio: Em nomol long yu pilim olsem. Baibel i tok God tu i save belhat taim ol man i no gat asua i kisim hevi, tasol em i tok promis olsem em bai givim strafe long ol man nogut. Lukim tok i stap long Aisaia 3:11, olsem: “Ol man nogut bai i  bagarap. Bai ol i kisim pe nogut bilong pasin nogut ol i bin mekim.” Olsem na yumi ken bilip tru olsem God bai givim strafe long ol man nogut.

Alejandro: Tasol olsem wanem God bai givim strafe long ol man nogut sapos i no gat helpaia, olsem yu tok?

Mauricio: Em gutpela askim. Bekim bilong askim bilong yu em olsem, God bai pinisim olgeta man nogut na i no gat kirap bek bilong ol. Skelim tok Baibel i mekim long 2 Tesalonaika 1:9. Inap yu ritim dispela ves?

Alejandro: Em orait. Em i tok: “Ol dispela lain bai kisim strafe long kot na bagarap inap oltaim. Ol bai i no stap moa long ai bilong Bikpela.”

Mauricio: Olsem yu lukim long dispela ves, ol man nogut bai i no inap kirap bek, long wanem, God i givim strafe long ol na ol bai bagarap inap oltaim. Ol i no gat rot bilong kisim laip long bihain.

Alejandro: Mi lukim tok ves i mekim, tasol mi pilim olsem dispela i no stret. Olgeta man i save dai. Ol man nogut i mas kisim bikpela strafe moa.

Mauricio: Mi ken luksave olsem yu man bilong tingim stretpela pasin.

Alejandro: Yes, mi save tingim tru stretpela pasin.

Mauricio: Gutpela yu gat kain tingting olsem. Ol man inap skelim na save long wanem samting i stret na wanem samting i no stret, long wanem, God i putim dispela samting long yumi. Em i save tingim tru stretpela pasin. Tasol taim ol lotu i skulim ol man olsem God i save strafim ol man long helpaia, i olsem ol i tok God i save mekim pasin i no stret.

Alejandro: Yu minim wanem?

Mauricio: Mi laik soim yu wanpela eksampel. Yu save long stori bilong Adam na Iv long Baibel?

Alejandro: Yes. God i tambuim ol long kaikai pikinini bilong wanpela diwai, tasol ol i bin sakim tok.

Mauricio: Em i stret. Yumi ken lukim dispela stori long Baibel. Dispela stori i stap long Stat 2:16, 17. Dispela ves i tok: “God i tokim man olsem, ‘Yu ken kaikai pikinini bilong olgeta diwai bilong dispela gaden. Tasol yu no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut. Sapos yu kaikai, wantu bai yu dai.’” So God i tok wanem samting bai kamap long Adam sapos em i kaikai dispela prut tambu?

Alejandro: Em i tok Adam bai dai.

Mauricio: Em i stret. Tingim, em i mekim sin na long dispela rot olgeta man i gat sin pinis taim mama i karim ol. a Maski i olsem, yu ting God i tok long ol man bai kisim strafe long helpaia?

Alejandro: Nogat.

Mauricio: Tasol sapos Adam na Iv bai kisim pen oltaim long ples paia, bilong wanem God i no givim tok lukaut long ol long dispela samting? Sapos God i mekim olsem, dispela bai kamapim klia stretpela pasin na pasin laikim bilong em, a?

Alejandro: Em i stret.

Mauricio: Tingim tu tok God i mekim long Adam na Iv bihain long ol i mekim sin. Inap yu ritim Stat 3:18, 19?

Alejandro: Em orait. Em i tok: “Bai yu wok hat tru long kisim kaikai bilong yu na tuhat bai i kamap long pes bilong yu. Na bai yu hatwok oltaim inap yu dai na yu go bek long graun. Long wanem, mi bin wokim yu long graun, na bai yu go bek gen long graun.”

Mauricio: Tenkyu. Olsem God i tok, Adam bai go we taim em i dai?

Alejandro: God i tok Adam bai go bek gen long graun.

Mauricio: Nau bai yu wanbel long dispela tok olsem, bilong wanpela man i ken go bek long wanpela ples, yumi ken tok em i bin stap long dispela ples bipo, a?

Alejandro: Yes, em tru.

Mauricio: Adam i bin stap we paslain long God i wokim em?

Alejandro: Em i no bin stap.

Mauricio: Yu tok stret. Ating yu luksave olsem i no gat wanpela tok long God bai givim strafe  long ol man long rot bilong helpaia. Yu ting i stret long God i tokim Adam long em bai go bek long graun sapos tru tru em bai go long wanpela paia bilong hel?

Alejandro: Nogat, dispela bai i no stret.

Mauricio: I gat narapela samting yumi ken skelim long dispela bilip bilong helpaia?

Alejandro: Em wanem samting?

Mauricio: Planti taim ol man i save tok husat i “bosim” helpaia? Na husat i save givim strafe long ol man long hel?

Alejandro: Satan.

Mauricio: Tasol Satan em i birua tru bilong God. So sapos God i salim ol man i go long hel bilong Satan i ken givim pen oltaim long ol, ating dispela bai soim olsem God na Satan i wok bung wantaim, a?

Alejandro: Hmm. Mi no bin tingim dispela samting bipo.

Mauricio: Bilong kamapim klia dispela poin—ating yu wanpela papa, a?

Alejandro: Yes, mi gat wanpela pikinini man. Em i gat 15 krismas nau.

Mauricio: Tingim olsem pikinini man bilong yu i bikhet nogut tru. Em i mekim planti samting nogut na dispela i mekim yu bel hevi. Bai yu mekim wanem?

Alejandro: Bai mi stretim em.

Mauricio: Mi save oltaim bai yu traim long helpim em long senisim pasin bilong em.

Alejandro: Yu tok stret.

Mauricio: Yumi ken tok piksa olsem yu traim bes bilong yu, tasol em i sakim olgeta samting yu tokim em long en. Bihain, ating bai yu pilim olsem wanpela rot tasol bilong helpim em, em long givim sampela strafe long em.

Alejandro: Yea, i luk olsem bai mi strafim em.

Mauricio: Tasol olsem wanem sapos yu painimaut olsem wanpela man nogut i bin stiaim pikinini bilong yu na skulim em long mekim olgeta dispela pasin nogut?

Alejandro: Bai mi belhat long dispela man.

Mauricio: Nau mi laik bai yu kamapim tingting bilong yu. Taim yu save olsem dispela man nogut tru i stiaim pikinini bilong yu long bikhet long yu, yu ting bai yu askim dispela man long givim strafe long pikinini bilong yu?

Alejandro: Nogat. Dispela em longlong pasin.

Mauricio: Olsem na yu ting i stret long God bai askim Satan—em man i save stiaim ol man nogut—long givim strafe long dispela ol man nogut?

Alejandro: No, mi no ting.

Mauricio: Olsem na sapos God i laik givim strafe long ol man nogut, bilong wanem Devil—em dispela nambawan birua bilong God—i bihainim laik bilong God na givim pen oltaim long ol?

Alejandro: Mi no bin tingting long dispela samting bipo!

Mauricio: Tasol yu ken bilip tru olsem, God bai pinisim tru ol man nogut. I gutpela mi soim yu laspela skripsa i strongim dispela tok. Dispela skripsa em Song 37:9. Inap yu ritim dispela ves?

Alejandro: OK. Em i tok: “Ol man nogut bai i bagarap olgeta. Tasol ol manmeri i bilip na wetim Bikpela i helpim ol, bai ol i stap gut long graun bilong ol.”

Mauricio: Tenkyu. Yu luksave long samting God Jehova bai mekim long ol man nogut?

Alejandro: Dispela ves i tok olsem God bai bagarapim olgeta man nogut.

Mauricio: Em stret. Yumi ken tok tu olsem em bai bagarapim ol na pinisim ol olgeta. Tasol ol gutpela man em “ol manmeri i bilip na wetim Bikpela i helpim ol,” ol bai i stap laip oltaim long graun. Ating dispela i mekim na yu gat tupela tingting. Olsem, bilong wanem God i no laik pasim ol man long mekim ol pasin nogut? Na sapos em i tingting long bagarapim ol man nogut, bilong wanem em i no bin mekim olsem?

Alejandro: Em wanpela gutpela askim.

Mauricio: Mi laik soim yu long ol tok Baibel i mekim bilong bekim dispela askim long narapela taim yumi toktok. b

Alejandro: Mi wanbel long dispela tingting.