DINAU inap putim hevi long famili o bagarapim famili. Saveman Jeffrey Dew i painimaut olsem ol marit i gat dinau, ol i no save lusim bikpela haptaim bilong stap wantaim, ol i save tok pait planti taim moa, na ol i no amamas tumas. Long ol samting em ol marit i save tok pait long en, planti taim tok pait bilong ol long dinau na mani, dispela i save stap longpela taim moa na i kirapim ol long bikmaus na paitim narapela, na tok pait long ol narapela samting tu. Olsem na yumi no kirap nogut olsem ol tok pait bilong mani i namba 1 as na ol marit long Amerika i save divos.

Bikpela dinau i save mekim ol man i kisim olkain sik olsem ol i no inap slip, het i pen, bel i pen, kisim hat atek, na bikpela bel hevi. Marta, wanpela meri marit, i tok: “Dinau bilong mipela i mekim na man bilong mi, Luís, i bel hevi tru na em i slip planti. Oltaim mi save lukluk long em bilong kisim helpim, tasol nau em i no inap mekim wanpela samting.” Sampela i no inap karim hevi bilong presa em dinau i kamapim. Olsem, BBC News i tok, wanpela meri long saut-is India i suasaid taim em i no inap bekim dinau bilong em inap 840 dola (Amerika). Em i bin kisim dispela dinau bilong baim dokta na marasin bilong pikinini bilong em.

 Olsem wanem sapos famili bilong yu i gat hevi bilong dinau? Yumi ken skelim sampela hevi ol marit i gat dinau i save karim, na ol stiatok bilong Baibel we inap helpim yu long karim ol dispela hevi.

Lukasz i tok: “Mi sutim tok long meri bilong mi long em i save westim mani, na em i komplein olsem sapos mi gat wok inap long yia olgeta, bai mipela i no sot long mani.” Ol marit i ken mekim wanem na bai dinau i no ken putim hevi long ol?

Rot bilong stap amamas: Wok wantaim bilong pinisim dinau.

Sapos yu bikmaus long poroman marit bilong yu, dispela bai i no inap stretim hevi bilong dinau—maski yu yet i no bin kisim dispela dinau. Long kain taim olsem, em i bikpela samting tru long bihainim tok bilong Baibel long Efesus 4:31: “Yupela i mas rausim olgeta pasin bilong bel nogut na kros na belhat na bikmaus na tok nogut, na olgeta kain pasin nogut.”

Em i bikpela samting long wok wantaim bilong pinisim dinau. Stephanos, wanpela man marit i stori long olsem wanem em na meri bilong em i wok wantaim. Em i tok: “Mipela i tingim dinau bilong mipela olsem birua bilong mitupela wantaim.” Kain pasin bilong wok gut wantaim i stret wantaim Sindaun 13:10, em i tok: “Bikhetpasin i save kamapim kros na pait. Tasol sapos man i larim ol arapela man i givim tingting long em, orait dispela man i gat gutpela tingting na save.” No ken bikhet na yu yet i traim long stretim hevi, mobeta yupela i toktok gut wantaim long hevi bilong mani na wok wantaim bilong stretim.

Ol pikinini bilong yupela tu i ken wok wantaim famili. Edgardo, em wanpela papa long Ajentina, em i stori long samting i kamap long famili bilong em: “Pikinini man bilong mipela i laik kisim nupela baisikol, tasol mipela i tokim em long as na mipela i no inap baim. Mipela i givim em baisikol bilong bubu man bilong em na em i amamas long yusim dispela. Mi lain olsem em i bikpela samting long famili i wok wantaim.”

Enrique i tok: “Bisnis bilong mi i gat bikpela dinau, na hevi bilong mani long Ajentina i mekim na hevi bilong mi i go bikpela moa. Nau meri bilong mi i mas kisim operesen. Mi pilim olsem dinau bilong mi i no inap pinis, i olsem mi kalabus long net bilong spaida.” Wanpela man long Brasil, Roberto, em i lusim olgeta mani bilong em long wanpela bisnis, na em i gat dinau long 12-pela benk. Em i tok: “Mi sem tru na mi pilim olsem mi no laik bungim ol pren bilong mi. Mi pilim olsem mi wanpela lusman tru.”

Yu inap mekim wanem sapos dinau bilong yu i mekim na yu bel hevi, sem, o bel i kotim yu?

Rot bilong stap amamas: Bosim gut mani bilong yu. b

1. Skelim baset bilong yupela. Raitim long pepa olgeta mani yupela i bin kisim na spendim insait long 2-pela wik o wanpela mun, sapos dispela i stret long yupela. Raitim tu hamas mani yupela i tromoi long baim takis, insurens, na ol klos, ating em ol samting yupela i save mekim wan wan taim, olsem na kaunim averes bilong ol long olgeta mun.

2. Mekim sampela wok mani moa. Ating yu inap wok sampela aua moa long ples wok bilong yu, pikim kofi samting, o samapim klos o kukim kaikai na salim long maket. Tok lukaut: No ken larim ol dispela ekstra wok i pasim yu long mekim ol bikpela samting, olsem ol wok bilong God yu save mekim.

3. No ken tromoi bikpela mani long baim ol samting. Baim samting yu nidim tasol, no ken baim sapos yu no nidim maski pe i daun. (Sindaun 21:5) Enrique i tok: “Taim yu laik baim samting, wet pastaim, dispela bai helpim yu long save olsem yu nidim tru dispela samting o yu laikim tasol.” Sampela gutpela tok i stap daunbilo.

•   Haus: Sapos inap, go stap long haus we rent i daun. No ken westim pawa na wara.

• Kaikai: Kisim lans i go wantaim, no ken kaikai long haus kai planti taim tumas. Baim kaikai ol i daunim pe bilong en. Joelma long Brasil i tok: “Mi save seivim mani long rot bilong baim ol prut na kumu long strit maket paslain liklik long maket i pas.”

• Kar: Lukautim gut kar yu gat, na no ken tingting long salim hariap bilong kisim nupela kain kar. Kalap long PMV, o wokabaut taim yu inap.

Taim yu no tromoi bikpela mani long baim ol samting, yu ken mekim gutpela wok long mani yu gat.

4. Skelim dinau bilong yu na mekim samting. Namba 1 samting, skelim hamas interes yu mas baim long olgeta wan wan dinau yu gat, mani yu mas tromoi sapos yu leit long bekim dinau o yu no bin bekim. Skelim gut tok i stap long dinau pepa, bikos sampela taim ol lain bilong givim dinau inap giamanim yu. Olsem, wanpela lain bilong givim dinau long Amerika i tok olsem interes bilong dinau em 24 pesen, tasol tru tru em winim 400 pesen.

Namba 2 samting, skelim wanem dinau yu bai bekim pastaim na wanem bihain. Yu ken bekim pastaim dinau i gat bikpela interes. O yu ken bekim pastaim ol liklik dinau, long wanem, taim yu no kisim planti bil tumas long olgeta mun, dispela bai mekim gut bel bilong yu. Sapos yu gat dinau i gat bikpela interes, ating yu ken kisim nupela dinau i gat liklik interes na bekim dinau i gat bikpela interes.

Namba 3 samting, sapos yu no inap bekim dinau long taim stret bilong en, traim long toktok wantaim ol lain yu gat dinau long ol, na wokim nupela plen bilong bekim dinau. Yu inap askim ol long lusim longpela haptaim moa bilong bekim dinau, o askim ol long daunim interes bilong dinau. Sampela lain bilong givim dinau, ating ol i redi long daunim dinau sapos yu inap bekim bikpela hap bilong dinau long nau stret. Long gutpela pasin stori gut long hamas mani yu gat na no ken giaman. (Kolosi 4:6; Hibru 13:18) Raitim long pepa olgeta samting yupela i pasim tok long en. Maski sapos lain bilong givim dinau i no orait long samting yu askim ol long en, wok yet long askim ol long mekim sampela senis long pasin bilong bekim dinau, sapos yu mas mekim olsem.—Sindaun 6:1-5.

Tru, yu mas i gat stretpela tingting taim yu basetim gut mani bilong yu. Ol samting yu no inap bosim inap mekim na gutpela plen bilong yu i no wok, bikos planti taim “i olsem mani i gat wing na i flai i go antap olsem tarangau.”—Sindaun 23:4, 5.

Hevi bilong dinau inap mekim na man i no tingim ol bikpela samting long laip. Wanpela man, Georgios, i tok: “Nambawan bikpela hevi em olsem mipela i save tingting na toktok long dinau tasol. Mipela i no tingim moa ol bikpela samting.”

Rot bilong stap amamas: Holim stretpela tingting long mani.

Maski yu wok strong, ating yu wok long bekim dinau inap planti yia. Taim yu wok long mekim olsem, yu yet i ken makim bai yu tingting olsem wanem long sindaun bilong yu. No ken tingting oltaim long mani o long yu no gat mani, i gutpela moa long bihainim tok bilong Baibel, olsem: “Sapos yumi gat kaikai na laplap na haus samting, orait yumi ken ting ol dispela samting em inap long yumi.”—1 Timoti 6:8.

Taim yu amamas long ol samting yu holim, yu inap “skelim gut wanem ol samting i bikpela samting moa.” (Filipai 1:10) “Ol samting i bikpela samting moa” em pasin bilong yu long pas gut wantaim God na famili bilong yu. Georgios i tok: “Mipela i no bekim yet olgeta dinau bilong mipela, tasol dinau i no stap moa olsem nambawan bikpela samting long laip bilong mipela. Nau marit bilong mipela i stap amamas, bikos mipela i lusim bikpela haptaim moa wantaim ol pikinini, long mekim ol samting wantaim olsem marit, na long mekim wok bilong God.”

Ol hevi bilong dinau i givim presa, na bilong karim ol dispela hevi yumi mas daunim laik bilong yumi yet; tasol gutpela samting inap kamap. Andrzej, wanpela man marit long Polan, i tok: “Taim mi kisim save olsem meri bilong mi i bin givim bikpela dinau long wanwok bilong em husat i go long narapela hap na i no bekim dinau, bel isi i no stap long haus bilong mipela.” Tasol em i tingting i go bek long samting em na meri bilong em i mekim, na i tok: “Mipela i pas gut moa wantaim—i no dispela hevi i mekim na mipela i pas gut wantaim, nogat, tasol pasin bilong wok wantaim long stretim hevi i kamapim pasin wanbel.”