Helpim Ol Taranguman
“Bikpela i save mekim gut long man i amamas long givim ol samting long ol arapela man. Long wanem, dispela kain man i save givim kaikai long ol rabisman.”—SINDAUN 22:9.
As na sampela i selebretim Krismas.
Sampela i laik bihainim pasin bilong Jisas long helpim ol man i stap rabis, ol sikman, na ol man i karim pen na hevi. Ol i pilim olsem Krismas em i gutpela taim bilong mekim olsem, em taim we ol lain bilong helpim ol kain man olsem i save wok strong long singaut long mani.
Bilong wanem dispela i givim hatwok?
Long taim bilong Krismas, planti manmeri i bisi tru long baim ol samting, kisim ol amamas, na visitim ol pren na famili. Olgeta dispela samting i mekim na ol i no gat taim, strong, o mani bilong helpim ol rabisman na ol taranguman, na ating ol i givim tasol donesen long ol lain i save helpim ol kain man olsem.
Wanem ol stiatok bilong Baibel inap helpim man?
“Sapos wanpela man i sot long samting na em i askim yu long givim em, yu no ken tok, ‘Nogat.’ Sapos yu inap, yu mas givim em.” (Sindaun 3:27) Ol rabisman, ol man i stap hangre, na ol man i gat hevi, ol i save karim ol dispela hevi long olgeta taim na i no long taim bilong Krismas tasol, nogat. Olsem na sapos yu luksave long wanpela i nidim helpim na “yu inap” long helpim em, bilong wanem yu mas wetim Krismas bilong mekim olsem? Yu bai kisim blesing long gutpela pasin helpim na pasin sori yu mekim.
“Long olgeta namba 1 de bilong wik, yupela i mas putim sampela mani i stap inap long skel bilong yupela.” (1 Korin 16:2) Aposel Pol i bin givim dispela tok long ol Kristen bilong pastaim em ol i laik helpim ol rabisman. Yu inap “putim sampela mani i stap,” o basetim gut sampela mani em planti taim yu inap givim long wanpela man o wanpela oganaisesen i save yusim gut mani? Long dispela rot, yu mekim samting bilong helpim ol taranguman na yu givim inap long skel bilong yu.
“No ken lusim tingting long mekim gutpela pasin na serim ol samting wantaim ol arapela.” (Hibru 13:16) Olsem ves i tok, taim yumi “serim ol samting wantaim ol arapela,” yumi mas tingting tu long “mekim gutpela pasin.” Olsem, ol gutpela papamama i save skulim pikinini bilong ol long helpim ol lapun long ol wok bilong olgeta wan wan de, na strongim ol sikman long rot bilong raitim kat, visitim ol, o ringim ol, na tu, tingim ol arapela pikinini i stap rabis o i gat bagarap long bodi. Long dispela rot, ol pikinini i lain long mekim gutpela pasin na oltaim redi long givim samting.
Gutpela papamama i skulim pikinini long helpim ol lapun, ol sikman, na ol pikinini i nidim helpim. Olsem na ol pikinini i lainim gutpela pasin na oltaim redi long givim samting.
