I LUK olsem kirap long bipo yet, ol meri i bin i gat laik long mekim ol yet i luk nais tru. Ol piksa i stap long matmat, ol piksa ol i bin peintim, na ol arapela piksa bilong bipo i kamapim klia olsem ol manmeri bilong Mesopotemia na Isip bilong bipo i bin yusim ol kosmetik em ol marasin samting bilong penim pes na mekim gut skin. Planti man i laikim imis bilong ol meri Isip long bipo em ol i penim gut tru ai bilong ol.

Olsem wanem long ol Israel? Ol meri Israel bilong bipo i save yusim ol kosmetik? Sapos olsem, orait ol i save yusim wanem kain ol kosmetik? Lain Israel bilong bipo i no gat ol piksa long matmat o ol piksa ol i bin peintim na bai yumi inap save long en. Tasol sampela stori long Baibel na ol samting em ol saveman i bin painim long ol ples em Baibel i stori long en inap givim sampela save long yumi long ol kosmetik ol i bin yusim long taim bilong ol man i bin raitim Baibel.

Taim ol man i digim graun long ol hap bilong Israel, ol i painim planti samting bilong ol kosmetik na ol pefium. Sampela bilong ol samting ol i painim long graun em ol liklik ston dis, ol kontena bilong miksim olkain marasin samting, ol pefium botol, ol botol sanda, na ol liklik mira ol i wokim long bras. Wanpela spun ol i wokim long tit bilong elefan i gat piksa bilong lip bilong diwai pam long wanpela sait bilong handel na piksa bilong ol pisin balus i raunim het bilong wanpela meri long narapela sait.

Planti taim ol i yusim ol sel em ol i bilasim gut olsem kontena bilong holim ol kosmetik. Long Isip na long ol hap bilong Kenan, ol i bin painim ol liklik spun em ol i wokim long tit bilong elefan o diwai, sampela i gat piksa bilong ol meri i swim na olkain disain. Ol dispela samting i kamapim klia olsem long planti hap long bipo ol meri i save yusim ol kosmetik.

Long Baibel, nem bilong wanpela pikinini meri bilong Jop em “Kerenhapuk.” Long tok Hibru dispela nem inap makim “Kom Bilong Blakpela Peint (Bilong Ai),” em boks bilong putim ol pen samting bilong ai. (Jop 42:14) Ating ol i givim dispela nem long em bilong makim gutpela skin na lukluk bilong em, tasol dispela inap makim tu olsem pasin bilong yusim kosmetik i bin stap long dispela taim bipo.

 Planti taim Baibel i stori long pasin bilong penim ai olsem em i pasin bilong ol meri nogut olsem Kwin Jesebel na Jerusalem i no stap gut long God, em profet Jeremaia na Esekiel i tok piksa long en olsem wanpela pamukmeri. (2 King 9:30; Jeremaia 4:30; Esekiel 23:40) Ol i bin digim graun na painim planti glas na ol ston kontena wantaim ol liklik tul bilong penim ai, dispela i kamapim olsem planti meri long bikhetlain Israel na moa yet em ol meri long lain bilong king na ol lain bilong maniman—ol i bin bihainim pasin bilong bilasim ol yet wantaim ol samting bilong penim ai na ol kain kain kosmetik.

Inap planti yia lain Israel bilong bipo i bin wokim na yusim ol pefium o sanda em ol i wokim long oliv oil. Buk Kisim Bek long Baibel i stori long pasin bilong wokim ol sanda i gat gutpela smel em ol pris i save mekim wok long en long tempel. Ol i miksim sinamon wantaim mer na sampela ol narapela diwai samting i gat gutpela smel. (Kisim Bek 30:22-25) Long Jerusalem ol saveman i painim wanpela woksop bilong yia 100 C.E. we ol i ting long dispela hap ol man i bin wokim ol pefium na paura bilong  kamapim smok i gat gutpela smel bilong yusim long tempel. Planti taim Baibel i stori long oil i gat gutpela smel em ol i save yusim long mekim wok lotu na ol narapela wok nating.—2 Stori 16:14; Luk 7:37-46; 23:56.

Long dispela hap ol i sot tru long wara, olsem na ol i save yusim oil i gat gutpela smel bilong helpim ol long stap klin. Ol i yusim oil bilong lukautim skin bilong ol long taim bilong san, na tu, ol i yusim olsem kosmetik. (Rut 3:3; 2 Samuel 12:20) Paslain long ol i bringim meri Juda, em Esta, i go lukim King Serksis, ol i welim bodi bilong em inap 12-pela mun—6-pela mun ol i welim em long oil i gat mer, na narapela 6-pela mun ol i welim em long balsam oil.—Esta 2:12.

Ol pefium na ol pefium oil i dia tumas wankain olsem silva na gol. Taim kwin bilong Seba i visitim King Solomon, em i bringim ol gutpela presen olsem, gol, olkain ston i dia tumas, na ol balsam oil. (1 King 10:2, 10) Taim King Hesekia i soim ol gutpela samting bilong haus bilong em long ol man i kam long Babilon, “ol paura i gat gutpela smel na ol sanda” i bin stap tu wantaim ol silva, gol, na olgeta samting bilong pait em bin bungim.—Aisaia 39:1, 2.

Ol man inap kisim liklik pefium o oil long ol kain kain plaua, ol prut, ol lip diwai, o skin bilong diwai. Baibel i stori long planti bilong ol dispela plaua na diwai samting i gat gutpela smel olsem aloe, balsam, bdellium gum, calamus, cassia, sinamon, frenkinsens, mer, saffron, na spikenard. Sampela i bilong dispela ples yet na ol i gro long ples daun bilong Jordan. Ol narapela ol i kisim long rot bilong wok bisnis na i kam long India, Saut Arebia, na ol arapela hap.

Baibel i kolim balsam oil long stori bilong Kwin Esta, kwin bilong kantri Seba, na King Hesekia, olsem yumi stori pinis long en antap. Long 1988, ol i painim wanpela liklik botol oil long wanpela keiv long Kumran, em nambis long hap wes bilong Detsi. Dispela i bin kirapim ol man long kisim kain kain tingting. Olsem wanem? Dispela em laspela bilong ol balsam oil em ol i painim? Ol saveman i no kliagut yet long dispela. I kam inap long nau, ol fama i traim long planim gen ol diwai balsam bilong bipo, em ol diwai i gat nem.

Ol samting i kamapim klia olsem balsam oil em Baibel i stori long en, ol i bin planim long hap bilong Engedi. Ol saveman i painim ol samting olsem stov, ol botol, na ol kain kain metal na ol samting ol i wokim long bun bilong animal, bilong yia 500 B.C.E. samting, na ol dispela samting i wankain long ol samting ol i save yusim bilong mekim pefium long ol arapela ples. Planti saveman i ting olsem diwai balsam i kam long Arebia o Afrika. Ol i save wokim oil i gat gutpela smel tru long susu bilong diwai balsam. Balsam oil i gat bikpela pe tru, olsem na ol man i no tokaut long ol narapela long hau ol i groim na kamapim dispela oil.

Ol man i bin yusim balsam tu bilong grisim narapela insait long ol wok politik samting. Olsem, saveman Josifas i tok, Mark Antony i kisim wanpela lain olgeta bilong ol diwai balsam na givim olsem presen long Kwin Cleopatra bilong Isip. Saveman bilong Rom, em Plini, i tok olsem long taim bilong Pait Bilong Ol Juda long yia 100 C.E., ol paitman bilong Juda i traim long bagarapim olgeta diwai balsam na bai ol Rom i no ken kisim.

Long ol stori bilong Baibel na ol samting em ol saveman i painim, yumi inap save long ol kosmetik em ol manmeri i bin yusim long taim bilong ol man i bin raitim Baibel. Baibel i no tambuim pasin bilong yusim ol kosmetik na pasin bilong bilas samting, nogat, Baibel i tok long yusim ol kosmetik long pasin daun na long gutpela tingting. (1 Timoti 2:9) Aposel Pita i tok, “bikpela samting long ai bilong God” em “pasin isi na bel isi.” Dispela tok i stret long ol meri Kristen em ol yangpela na ol lapun wantaim, long wanem, nau pasin bilong bilas na olkain stail bilong pasim klos i wok long senis senis.—1 Pita 3:3, 4.