Long Baibel, “bilip” i makim olsem man i gat strongpela tingting olsem samting em i bilip long en i stap tru o bai kamap tru. Man husat i bilip long God, em i save tru olsem God bai truim olgeta tok promis bilong Em.

Long olgeta disisen Moses i mekim, em i soim olsem em i bilip tru long ol tok promis bilong God. (Stat 22:15-18) Em i gat rot bilong kisim gutpela sindaun na kisim olkain gutpela samting bilong Isip, tasol em i givim baksait long olgeta dispela samting, na “em i wokim tingting olsem i gutpela long kisim hevi wantaim lain bilong God, na em i no laik bihainim pasin bilong sin na kisim amamas bilong sotpela taim tasol.” (Hibru 11:25) Yu ting em i no tingting gut pastaim na mekim dispela disisen, na bihain em bai bel hevi long en? Nogat, long wanem, Baibel i tok, Moses “i sanap strong i stap, na i olsem em i lukim dispela Man em ol man i no inap lukim long ai bilong ol.” (Hibru 11:27) Moses i no bel hevi long ol disisen em bilip bilong em i kirapim em long mekim.

Moses i laik helpim ol narapela long bilip strong long God. Olsem, tingim samting i bin kamap taim lain Israel i trap namel long ami bilong Fero na solwara Retsi. Ol Israel i pret nogut tru long bagarap em klostu nau bai painim ol, olsem na ol i singaut long Jehova na long Moses. Moses bai mekim wanem?

Ating Moses i no save olsem God bai brukim solwara Retsi na opim rot bilong lain Israel i ken ranawe. Tasol Moses i bilip tru olsem God bai mekim samting bilong lukautim lain bilong Em. Na Moses i laik bai lain Israel i gat wankain bilip. Baibel i tok: “Moses i bekim tok long ol manmeri olsem, ‘Maski pret. Sanap strong na nau bai yupela i lukim olgeta samting Bikpela i laik mekim bilong helpim yupela.’” (Kisim Bek 14:13) Yu ting Moses i bin helpim lain Israel long kisim strongpela bilip? Yes, long wanem, Baibel i tok long Moses wantaim lain Israel olsem: “Ol i bilip, olsem na ol i brukim solwara Retsi olsem ol i wokabaut long graun i drai.” (Hibru 11:29) Bilip bilong Moses i helpim em yet na i helpim tu olgeta husat i lain long bilip long Jehova.

Yumi inap bihainim pasin bilong Moses long mekim ol disisen i soim olsem yumi bilip strong long ol tok promis bilong God. Olsem, God i promis long lukautim yumi long ol samting bilong skin sapos yumi putim laik bilong em i stap nambawan samting long laip bilong yumi. (Matyu 6:33) Tru, ating bai yumi pilim olsem i hatwok long sakim tingting bilong kisim olkain kago samting, em tingting planti man i gat long nau. Tasol yumi ken bilip tru olsem taim yumi givim bel olgeta long mekim wok bilong Jehova, em bai givim yumi ol samting yumi nidim. Em i tok promis olsem: “Mi no inap tru long lusim yu o givim baksait long yu long wanpela samting.”—Hibru 13:5.

Yumi wok strong tu long helpim ol narapela long kamap strong long bilip. Olsem, papamama husat i gat savetingting bai luksave olsem ol i gat bikpela wok long helpim ol pikinini bilong ol long bilip long God. Taim ol pikinini i kamap bikpela, ol i mas kisim save olsem God i stap tru na em i givim ol lo long yumi long wanem samting i stret na wanem samting i no stret. Na tu, ol pikinini i mas kliagut olsem pasin bilong bihainim ol lo bilong Jehova em i nambawan gutpela rot bilong helpim ol. (Aisaia 48:17, 18) Papamama i givim gutpela presen long pikinini bilong ol taim ol i helpim ol long bilip olsem “God i stap na God i save givim gutpela pe long ol man i wok strong long painim em.”—Hibru 11:6.