God i laik yumi mas mekim wanem? Yu ting i gat planti tumas lo yumi mas bihainim? Nogat, i no olsem. Pikinini Bilong God, Jisas Krais, i tok wanpela pasin tasol i as bilong olgeta samting God i laik yumi mas mekim.—Ritim Mak 12:28-31.

Pastaim tingim ples we Jisas i mekim dispela tok. Em i skulim ol man long tempel long Nisan 11, em sampela de paslain long em i dai. Ol birua bilong em i mekim ol narakain askim, ol i laik bai Jisas i popaia. Tasol olgeta taim bekim bilong Jisas i pasim maus bilong ol. Orait nau ol i mekim dispela askim long Jisas: “Wanem lo i namba 1?”—Ves 28.

Dispela em i wanpela bikpela askim. Sampela Juda i paitim tok i go i kam long wanem lo i namba 1 namel long ol 600 lo i stap long Lo Bilong Moses. Na i luk olsem sampela narapela Juda i tok olgeta lo i wankain, na i no stret long ting wanpela lo i winim narapela. Jisas bai bekim dispela askim olsem wanem?

Bilong bekim tok, Jisas i toktok long 2-pela lo, i no wanpela. Pastaim em i tok: “Yu mas laikim Jehova, God bilong yu. Yu mas laikim em long bel olgeta bilong yu, na long laip olgeta bilong yu, na long tingting olgeta bilong yu, na long strong olgeta bilong yu.” (Ves 30; Lo 6:5) Ol dispela tok “bel,” “tingting,” “laip,” na “strong” i no makim narapela narapela samting, nogat. a Mining bilong en i olsem: Man i mas laikim tru Jehova long laip olgeta bilong em. Wanpela dikseneri bilong Baibel i tok: “Man i mas laikim tru God long bel na tingting olgeta.” Sapos yu laikim God olsem, orait long olgeta de bai yu wok strong long bihainim pasin em i laikim bambai em i ken amamas long yu.—1 Jon 5:3.

Bihain Jisas i tok: “Yu mas laikim ol arapela man olsem yu laikim yu yet.” (Ves 31; Wok Pris 19:18) Pasin bilong laikim tru God na ol arapela man i poroman wantaim. Sapos man i laikim God, em bai laikim ol arapela man tu. (1 Jon 4:20, 21) Sapos yumi laikim ol arapela man olsem yumi laikim yumi yet, bai yumi mekim wankain pasin long ol olsem yumi laik bai ol i mekim long yumi. (Matyu 7:12) Long dispela rot yumi soim olsem yumi laikim God na yumi laikim ol arapela man—em God i wokim yumi olgeta i kamap olsem em yet.—Stat 1:26.

Lo i tok long yumi mas laikim tru God na ol arapela man, dispela lo i bikpela samting olsem wanem? Jisas i tok: “I no gat narapela lo i winim dispela tupela lo.” (Ves 31) Long dispela wankain stori i stap long Buk Matyu, Jisas i tok dispela 2-pela lo i as bilong olgeta narapela lo.—Matyu 22:40.

I no hatwok long mekim ol samting God i laikim. Pasin laikim i as bilong olgeta samting em i laik yumi mas mekim. Bipo yet na long bihain tu, God i laik bai ol wokboi bilong em i laikim em tru. Tasol pasin laikim i no samting yumi pilim o toktok tasol long en; em samting yumi kamapim long pasin bilong yumi. (1 Jon 3:18) I gutpela yu kisim save long olsem wanem yu ken kisim na kamapim klia pasin bilong yu long laikim God Jehova, em yet “i pasin laikim.”—1 Jon 4:8.