BILONG kisim bekim bilong dispela askim, yumi ken skelim tupela eksampel long strafe bilong God em Baibel i stori long en—Bikpela Tait long taim bilong Noa, na taim God i pinisim tru lain Kenan.

SAMPELA MAN I TOK: “God i bin mekim pasin nogut taim em i kamapim tait we i bagarapim olgeta lain man, tasol em i no bagarapim Noa na famili bilong em.”

BAIBEL I TOK: God i tok: “Mi God, Bikpela, mi save stap oltaim, na tru tumas mi no save amamas long taim ol man bilong mekim sin, ol i dai. Mi save amamas long ol dispela man i givim baksait long pasin bilong sin na ol i stap gut.” (Esekiel 33:11) Olsem na God i no amamas long bagarapim ol man nogut long taim bilong Noa. Sapos olsem, orait bilong wanem em i kamapim dispela bagarap?

Baibel i tok taim God i givim kain strafe olsem long ol man nogut long bipo, dispela i olsem piksa na “i makim ol samting bai kamap long ol man i sakim tok bilong God.” (2 Pita 2:5, 6) Yumi inap kisim wanem save long dispela pasin bilong God?

Namba 1, God i kamapim klia olsem em i no amamas long bagarapim ol manmeri, tasol em i luksave long ol man nogut husat i save bagarapim ol narapela man na em i bekim pe i stret long pasin ol i mekim. I no longtaim em bai pinisim ol pasin i no stret na pen na hevi.

Namba 2, pasin bilong God long bipo long givim strafe long ol man i kamapim klia olsem long gutpela pasin em i save givim tok lukaut long ol man paslain long em i kamapim bagarap. Noa em man bilong tokaut long stretpela pasin, tasol planti manmeri i no laik harim tok bilong em. Baibel i tok: “Ol i no luksave long ol samting i wok long kamap, i go inap long taim Bikpela Tait i kam na karim ol i go.”—Matyu 24:39.

Yu ting God i bihainim yet dispela wankain pasin? Yes. Olsem, em i bin givim tok lukaut long ol manmeri bilong em Israel olsem sapos ol i mekim ol pasin nogut wankain olsem ol kantri i stap klostu long ol, em bai larim ol birua i kam kisim graun bilong ol, bagarapim biktaun bilong ol em Jerusalem, na kisim ol i go kalabus. Lain Israel i mekim ol pasin nogut, na tu, ol i mekim pasin bilong ofaim ol pikinini. Olsem wanem? Jehova i mekim sampela samting long dispela? Yes, em i bin mekim, tasol paslain long dispela, planti taim em i salim ol profet long givim tok lukaut long ol manmeri bilong  em long senisim pasin bilong ol. Em i tok: “Tru tumas, olgeta samting God, Bikpela i laik mekim, em i save autim pastaim long ol wokman bilong en, em ol profet, na bihain em i save mekim olsem em i bin tok.”—Amos 3:7.

SAMTING DISPELA I MEKIM LONG YU: Taim yumi ritim stori long ol strafe bilong Jehova long bipo, dispela i helpim yumi long wetim gutpela samting bai kamap bihain. Yumi wetim taim we God bai strafim ol man i save bagarapim na mekim nogut long ol narapela man. Baibel i tok: “Ol man nogut bai i bagarap olgeta. . . . Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” (Song 37:9-11) Yu ting olsem wanem long wanpela strafe we i pinisim pen na hevi bilong ol man? Yu ting em i wanpela strafe nogut?

OL MAN I TOK: “Strafe bilong God long pinisim lain Kenan i wanpela woa nogut tru wankain olsem ol pait bilong nau long pinisim wanpela lain olgeta.”

BAIBEL I TOK: “Oltaim [God] i save bihainim tok bilong en na em i no save giaman. Na pasin bilong en i gutpela na stretpela tasol.” (Lo 32:4) Stretpela kot bilong God i no wankain olsem woa bilong ol man. Bilong wanem? Long wanem, God i no wankain olsem ol man, em inap save long bel na tingting bilong man.

Olsem, taim God i skelim taun Sodom na Gomora na em i laik bagarapim dispela tupela taun, bilipman Abraham i laik save sapos God i mekim pasin i stret o nogat. Em i no laik bai God i “bagarapim ol gutpela man wantaim ol man nogut.” Long pasin isi, God i tokim em olsem sapos i gat 10-pela gutpela man i stap long Sodom, orait Em bai tingim ol dispela man na em bai i no inap bagarapim taun. (Stat 18:20-33) I klia tru olsem God i skelim bel bilong ol dispela manmeri na em i luksave olsem ol i gat laik tru long mekim ol pasin nogut.—1 Stori 28:9.

Long wankain pasin, God i skelim ol Kenan olsem ol i man nogut na em i tok long ol i mas dai. Ol lain Kenan ol i manmeri nogut tru na ol i save mekim olkain pasin nogut, wanpela pasin bilong ol em ol i save kukim ol pikinini long paia olsem ofa. a (2 King 16:3) Ol Kenan i save olsem Jehova i tokim lain Israel long kisim olgeta graun bilong ol. Ol manmeri bilong Kenan em ol i stap yet long graun bilong ol na pait long lain Israel, ol i no pait long lain Israel tasol, nogat, ol i pait tu long God Jehova, em Man i bin kamapim klia olsem em i stap wantaim lain bilong em.

Tasol God i bin marimari long ol Kenan husat i lusim pasin nogut bilong ol na bihainim ol lo bilong God long stretpela pasin. Olsem, God i bin kisim bek pamukmeri Rahap bilong Kenan na famili bilong em. Na tu, taim ol manmeri bilong taun Gibeon bilong Kenan i askim Jehova long marimari long ol, God i bin kisim bek ol wantaim olgeta pikinini bilong ol.—Josua 6:25; 9:3, 24-26.

SAMTING DISPELA I MEKIM LONG YU: Yumi inap lainim wanpela bikpela samting long strafe i painim lain Kenan. Yumi kam klostu tru long dispela taim we Baibel i tok profet olsem “de bilong bikpela kot, na ol man i sakim tok bilong God, ol bai bagarap olgeta.” (2 Pita 3:7) Sapos yumi laikim tru Jehova, yumi bai kisim gutpela sindaun taim em i pinisim ol pen na hevi long rot bilong bagarapim ol man husat i no laik stap aninit long stretpela wok bos bilong em.

Jehova i tokim yumi olsem ol disisen bilong ol papamama i save mekim sampela samting long ol pikinini bilong ol. Baibel i tok: “Yupela i mas bihainim rot bilong i stap gut. Yupela i mas laikim tru God, Bikpela bilong yumi, na yupela i mas harim tok bilong en na bel tru long em oltaim. Olsem na bai yupela na ol lain pikinini bilong yupela inap i stap longpela taim.” (Lo 30:19, 20) Olsem wanem? Em ol tok bilong wanpela God nogut o bilong wanpela God husat i laikim ol manmeri na i laik bai ol i makim rot bilong stap gut?