Baibel i kamapim tupela as. Namba 1, maski ol man i bin mekim ol bikpela strongpela wok, God i no bin wokim ol bilong bosim wokabaut bilong ol yet. Namba 2, ol wok bilong ol man i lus nating, long wanem, “dispela graun olgeta i stap long han bilong Satan.” Olsem na ol wok samting ol man i bin mekim i no bin kamapim bel isi long olgeta hap.—Ritim Jeremaia 10:23; 1 Jon 5:19.

Ol man i save tingim ol yet tasol na wok strong long kisim bikpela namba na mani samting, na dispela tu i mekim na i no gat bel isi long olgeta hap. Wanpela gavman bilong bosim graun olgeta inap skulim ol man long laikim stretpela pasin na tingim ol narapela, na dispela gavman tasol bai kamapim bel isi long olgeta hap.—Ritim Aisaia 32:17; 48:18, 22.

God i Gat Olgeta Strong i tok promis pinis long kamapim wanpela gavman tasol na dispela gavman bai bosim olgeta man long graun. Na dispela gavman bai senisim ol gavman bilong ol man. (Daniel 2:44) Pikinini Bilong God, em Jisas, em bai bosim graun olsem King Bilong Gutaim. Em bai pinisim olgeta pasin nogut long graun na skulim ol manmeri long rot bilong stap bel isi.—Ritim Aisaia 9:6, 7; 11:4, 9.

Long nau yet, aninit long Jisas, planti milion manmeri long olgeta hap bilong graun i yusim Baibel bilong skulim ol man long pasin bilong i stap bel isi wantaim ol narapela man. Liklik taim nau na gutaim bai kamap tru tru long graun.—Ritim Aisaia 2:3, 4; 54:13.