Alberto i bin insait long ami inap 10-pela yia. Em i tok: “Pris i blesim mipela na i tok, ‘God i stap wantaim yupela.’ Mi tingting, ‘Mi go bilong kilim man i dai, tasol Baibel i tok olsem “yupela i no ken kilim i dai ol arapela manmeri.”’”

Ray i bin insait long nevi long Wol Woa 2. Wanpela taim em i askim pris: “Yu save kam long sip na beten long blesim ol ami na long ol i mas winim pait. Tasol ol birua tu i mekim wankain samting, a?” Pris i bekim tok olsem Bikpela i save wok long rot yumi no inap kliagut long en.

Sapos yu no amamas long dispela bekim, orait yu ken save olsem ol narapela tu i gat wankain tingting.

Jisas i tok wanpela bikpela lo bilong God em long “laikim ol arapela man olsem yu laikim yu yet.” (Mak 12:31) Yu ting tok bilong Jisas i makim olsem yumi mas laikim tasol ol man i sindaun long wanpela ples o ol man bilong wanpela kantri tasol? Nogat. Em i tokim ol disaipel bilong em olsem: “Sapos pasin laikim i stap namel long yupela, orait olgeta bai save olsem yupela i disaipel bilong mi.” (Jon 13:34, 35) Pasin bilong ol long laikim narapela narapela bai win tru na dispela bai stap olsem wanpela mak. Ol i mas givim laip bilong ol long helpim ol narapela na ol i no inap tru long mekim wanpela samting bilong kisim laip bilong narapela.

Ol Kristen bilong pastaim i bihainim dispela tok bilong Jisas. Buk The Encyclopedia of Religion i tok: “Ol tisa bilong lotu long bipo, em Tertullian na Origen, i strongim dispela tok olsem ol Kristen i no save kilim i dai man, em wanpela stiatok i pasim ol long insait long ami bilong Rom.”

Ol Witnes Bilong Jehova i stap long klostu olgeta kantri, na ol i stap tu long ol kantri i gat pait long en. Maski i olsem, ol i wok strong long holimpas pasin bilong laikim narapela narapela em mak bilong ol Kristen tru.

Olsem, long 1994 taim bikpela pait i stap namel long lain Hutu na lain Tutsi long Ruanda, ol Witnes Bilong Jehova i no insait liklik long dispela pait. Ol Witnes long wanpela lain i haitim ol Witnes bilong narapela lain, maski ol man inap kilim ol i dai long dispela. Taim ol soldia Interahamwe bilong Hutu i painimaut olsem tupela Witnes Hutu i haitim ol brata Kristen bilong ol bilong lain Tutsi, ol soldia i tokim tupela: “Yutupela i mas dai bikos yutupela i helpim lain Tutsi long ranawe.” Sori tru, ol soldia i kilim i dai dispela tupela Witnes Hutu.—Jon 15:13.

Yu ting wanem: Pasin bilong ol Witnes Bilong Jehova i stret wantaim tok Jisas i mekim long ol Kristen i mas daunim laik bilong ol yet long helpim ol narapela?