Linda i divosim fes man bilong em. Em i amamas olsem tupela Herman i marit. Tasol ol i luksave olsem namba 2 marit bai i gat ol hatwok we i no bin stap long fes marit. *

Sapos yu marit gen, yu pilim olsem wanem long namba 2 marit bilong yu? Tamara, em meri i bin marit gen 3-pela yia bihain long em i divos, i tok: “Taim yu marit fes taim, yu gat dispela spesel filings olsem marit bilong yu bai stap oltaim. Tasol long namba 2 marit, bai yu no gat dispela kain filings, bikos oltaim yu save olsem fes marit bilong yu i bin bruk.”

Tasol planti marit i bin stap amamas tru bihain long ol i marit gen. Ol i mekim marit bilong ol i wok gut na yu inap mekim olsem tu! Yu inap mekim olsem wanem? Skelim 3-pela hevi i save painim planti  marit na olsem wanem ol stiatok bilong Baibel inap helpim yu long winim ol dispela hevi. *

Ellen, i save stap long Saut Afrika, i tok: “Mi hatwok long rausim ol memori bilong fes marit bilong mi, na moa yet long taim mipela raun i go long ol ples we mi na fes man bilong mi i save go holide long en. Sampela taim mi save skelim man nau mi maritim wantaim fes man bilong mi.” Tasol sapos poroman bilong yu i bin marit bipo, ating bai yu bel hevi taim em i stori planti long fes marit bilong em.

SAMPELA TINGTING: Holim stretpela tingting olsem yu na poroman marit i no inap lusim tingting hariap long fes marit, na moa yet sapos dispela marit i bin stap sampela yia. Sampela i tokaut olsem ol i bin popaia na kolim nem bilong fes poroman long poroman marit bilong ol long nau! Yu inap mekim wanem long kain taim olsem? Baibel i tok: “Pilim hevi bilong narapela.”—1 Pita 3:8.

No ken jeles na tambuim poroman marit long toktok long fes marit bilong em. Sapos poroman marit bilong yu i laik stori long fes man o meri bilong em, putim gut yau na pilim tingting bilong em. Na tu, no ken kisim tingting kranki olsem em i laik skelim yu wantaim fes poroman bilong em. Ian, em i bin marit gen inap 10-pela yia, i tok: “Meri bilong mi Kaitlyn i no save tambuim mi long stori long fes meri bilong mi i dai pinis. Em i lukim olsem dispela em rot bilong kisim save long mi.” Ating yu bai luksave olsem kain toktok olsem inap helpim yu long pas gut wantaim nupela poroman marit bilong yu.

Tingim ol gutpela pasin bilong poroman marit bilong yu long nau. Tru, poroman marit bilong yu long nau bai i no gat sampela pasin o save wankain olsem fes poroman bilong yu. Tasol ating em inap mekim gut sampela narapela samting. Olsem na strongim pasin bilong pas gut wantaim long rot bilong tingim na amamas long ol gutpela pasin bilong poroman, na “no ken skelim” em wantaim narapela. (Galesia 6:4) Edmond, em man i bin marit tupela taim, em i tok: “Pasin pren namel long yu na wanpela i no wankain long pasin pren namel long yu na narapela, olsem tasol, fes marit bilong yu i no wankain long marit bilong yu long nau.”

Olsem wanem yu ken holim stretpela tingting long ol gutpela memori bilong fes marit na marit bilong yu long nau? Jared i tok: “Mi amamas long ol gutpela memori bilong mi wantaim fes meri na sampela taim mi save tingim ol dispela memori. Maski i olsem, mi amamas long meri nau mi maritim.”

Javier, em i marit gen 6-pela yia bihain long em i divos, i tok: “Bihain long mipela i marit inap sampela yia, meri bilong mi i pilim olsem sampela pren bilong mi i wok long skelim em na traim sampela pasin bilong em.” Leo, wanpela maritman i bungim wanpela hevi i narapela kain liklik long dispela. Em i tok: “Long ai bilong mi stret, sampela manmeri i tokim meri bilong mi olsem ol i laikim tru na misim fes man bilong em!”

SAMPELA TINGTING: Traim pilim tingting bilong ol pren bilong yu. Ian, em mipela i kamapim pinis tok bilong em, i tok: “Mi pilim olsem sampela taim ol olpela pren i save bel hevi na pilim hatwok long bung wantaim nupela poroman marit bilong pren bilong ol.” Olsem na “mekim pasin isi,” na “kamapim tru pasin bilong isi long olgeta man.” (Taitus 3:2) Larim sampela haptaim i lus na bai ol pren na famili bilong yu i lain long nupela sindaun bilong yu. I gat senis long marit bilong yu, olsem na yu inap senisim tu ol lain yu prenim. Javier em mipela i kamapim pinis tok bilong em, i tok bihain long sampela haptaim i lus, em wantaim meri bilong em i kirap gen long pas gut wantaim ol olpela pren. Em i tok moa olsem: “Mipela i traim long kisim ol nupela pren na dispela i helpim mipela tu.”

Tingim filings bilong poroman marit bilong yu taim yu lusim haptaim long stap wantaim ol olpela pren bilong yu. Olsem, sapos stori bilong fes marit bilong yu i kamap long taim yupela i toktok,  bihainim savepasin na gutpela tingting na bai poroman marit bilong yu long nau i no pilim olsem em i no insait long dispela toktok. Baibel i tok: “Sapos man i no tingting gut na i tok, orait tok bilong en inap bagarapim bel bilong narapela man olsem bainat i sutim em. Tasol tok bilong man i gat gutpela tingting i save helpim ol man olsem gutpela marasin.”—Sindaun 12:18.

Andrew em fes meri bilong em i bin lusim em, i tok: “Mi save pret nogut tru olsem poroman marit bilong mi bai i no stap gut long mi.” Bihain em i maritim Riley, em meri bilong em long nau. Em i tok: “Planti taim mi save tingting olsem bai mi inap mekim ol gutpela pasin olsem fes man bilong Riley o nogat. Na tu, mi tingting planti olsem nogut em i ting mi no gutpela man na em i lusim mi na i go maritim narapela.”

SAMPELA TINGTING: No ken pret long autim tingting na wari bilong yu long poroman marit bilong yu. Baibel i tok: “Sapos yu laik mekim sampela wok, orait pastaim yu mas kisim tingting long planti arapela man.” (Sindaun 15:22) Pasin bilong toktok gut na kamapim tingting i stap long bel, dispela i helpim Andrew na Riley long trastim narapela narapela. Andrew i tok: “Mi tokim Riley olsem mi no inap tru kisim divos bilong abrusim ol hevi na Riley tu i mekim wankain tok long mi. Isi isi mi lain long trastim em tru.”

Sapos fes man o meri bilong poroman bilong yu i no bin stap gut long em long fes marit bilong ol, orait mekim olgeta samting yu inap mekim bilong em i ken trastim yu. Olsem, tupela marit em Michel na Sabine em bipo ol i bin divos long fes marit, ol i pasim tok long tokim narapela narapela sapos ol i bungim o toktok wantaim olpela poroman bilong ol. Sabine i tok: “Dispela i mekim na mipela i pilim seif na mipela i stap bel gut.”—Efesus 4:25.

Planti namba 2 marit i bin wok gut na marit bilong yu tu inap wok gut. Bihain long yu bin marit fes taim, ating nau yu save gut moa long ol pasin bilong yu yet. Andrew em mipela i kamapim tok bilong em antap, i tok: “Mi amamas tru long mi bin maritim Riley. Nau mipela i marit inap 13 yia na mipela i pas gut tru wantaim na mipela i no laik lusim dispela gutpela pasin.”