Mi kamap bikpela long Santiago, biktaun bilong Sili, long wanpela hap we planti man i save kisim drak, i gat ol geng, na pasin raskol. Taim mi gat 5-pela krismas ol man i kilim i dai papa bilong mi. Bihain long dispela, mama bilong mi i sindaun wantaim wanpela man husat i save mekim pasin nogut tru. Planti taim em i save paitim mama na mi. Long nau yet mi save bel hevi taim mi tingim bek ol samting i bin painim mi long ol dispela yia i go pinis.

Taim mi wok long kamap bikpela, mi mekim samting long daunim bel hevi bilong mi long rot bilong pait na bagarapim ol narapela. Mi save harim hevi metal musik, dring planti, na sampela taim kisim drak. Planti taim mi insait long ol pait long strit wantaim ol man bilong salim drak em planti taim liklik ol i bin traim long kilim mi i dai. Wanpela taim, wanpela lain geng i haiarim wanpela kilman long kilim mi i dai, tasol mi ranawe wantaim wanpela mak bilong naip em i sutim mi long en. Narapela taim sampela man bilong salim drak i poinim pistol long het bilong mi na i laik hangamapim mi.

Long 1996, mi laikim wanpela meri nem bilong em Carolina, na long 1998 mipela i marit. Bihain long fes pikinini man bilong mipela i bon, mi pret olsem nogut pasin bilong mi long belhat hariap i mekim na mi nogutim famili bilong mi olsem step-papa i save mekim. Olsem na mi kisim helpim long wanpela klinik i save helpim ol man i gat kain hevi olsem. Mi kisim ol marasin na ol narapela helpim, tasol mi hatwok yet long lusim ol dispela pasin. Mi save belhat hariap na kros long olgeta liklik samting, mi hatwok tru long bosim mi yet. Mi no laik bagarapim famili bilong mi, olsem na mi traim long suasaid. Tasol gutpela tru olsem mi no dai.

Inap planti yia mi no bilip long God, tasol nau mi laik bilip long God. Olsem na inap sampela haptaim mi lotu wantaim ol evanjelikal. Long dispela taim, meri bilong mi i stadi long Baibel wantaim ol Witnes Bilong Jehova. Mi heitim ol Witnes, na planti taim mi save bikmaus na toknogutim ol. Tasol ol i save mekim pasin isi, em samting mi no ting ol bai mekim.

 Wanpela taim, Carolina i tokim mi long ritim Song 83:18 long Baibel bilong mi yet. Dispela ves i tokaut klia olsem nem bilong God em Jehova. Mi kirap nogut olsem long lotu bilong mi, mi kisim save long wanpela god, tasol mi no save long Jehova. Long kirap bilong yia 2000, mi kirap tu long stadi Baibel wantaim ol Witnes Bilong Jehova.

Taim mi stadi i go, mi kisim save olsem Jehova em God bilong mekim pasin sori na lusim rong, dispela i mekim gut bel bilong mi. Olsem, long Kisim Bek 34:6, 7, Baibel i tok long Jehova olsem ‘God bilong marimari na sori, no save belhat kwik, save laikim tru olgeta manmeri, save bihainim olgeta tok bilong em, save laikim tumas planti tausen lain manmeri, na em i save lusim ol kain kain sin na bikhetpasin bilong ol.’

Maski i olsem, mi hatwok long bihainim samting mi lainim. Mi pilim olsem mi no inap tru long bosim pasin bilong mi long belhat na pait. Taim mi pilim olsem, Carolina i save strongim mi. Em i kirapim mi long tingim olsem Jehova i luksave long hatwok bilong mi. Em i save sapotim mi na dispela i strongim mi long wok yet long mekim ol samting bilong amamasim Jehova, maski mi hatwok long senisim pasin.

Wanpela taim, Alejandro em man husat i save stadi wantaim mi i tokim mi long ritim Galesia 5:22, 23. Ol dispela ves i tok ol pasin em spirit bilong God i as bilong en em “pasin laikim, amamas, bel isi, i no les kwik, pasin helpim, gutpela pasin, bilip, pasin isi, na bosim bel.” Alejandro i tok mi no inap kisim ol dispela pasin long strong bilong mi yet, tasol holi spirit bilong God inap helpim mi. Dispela tok i tru i senisim tru tingting bilong mi!

Bihain mi go long wanpela bikpela kibung bilong ol Witnes Bilong Jehova. Olgeta samting i stap stret, klin, na pasin laikim mi lukim long dispela hap i strongim mi olsem mi painim pinis lotu i tru. (Jon 13:34, 35) Mi kisim baptais long Februeri 2001.

Jehova i helpim mi long lusim pasin bilong pait na bagarapim man na nau mi kamap man bilong stap bel isi. Mi pilim olsem Jehova i pulim mi i kam ausait long wanpela hul em mi bin trap i stap long en. Planti man i heitim mi, na i gat as na ol i mekim olsem. Tasol nau mi stap bel isi wantaim meri na tupela pikinini man bilong mipela na mekim wok bilong Jehova.

Ol wanblut na ol pren bilong mi i hatwok long bilip olsem mi senisim tru ol pasin bilong mi. Dispela i mekim na sampela bilong ol i kisim save long tok i tru bilong Baibel. Na tu, mi insait long gutpela wok bilong helpim ol narapela long kisim save long Jehova. Em i gutpela samting tru long lukim tok i tru bilong Baibel i senisim i stap bilong ol tu!