Olsem wanem? Yu bilip long tok promis bilong Baibel long kirap bek? a Yumi amamas tru long tingim olsem yumi ken bung gen wantaim ol famili bilong yumi i dai pinis. Tasol yu ting kain gutpela samting inap kamap tru? Bilong bekim dispela askim, i gutpela yumi skelim stori bilong ol aposel bilong Jisas Krais.

Ol aposel i bilip strong olsem ol man i dai pinis ol bai kirap bek. Bilong wanem ol i bilip olsem? I gat 2-pela risen. Namba 1, dispela samting ol i bilip na wet long en i gat as tru bilong en: Jisas yet i bin kirap bek long indai. Ol aposel na “500 brata wantaim” ol i lukim Jisas i kirap bek pinis. (1 Korin 15:6) Na tu, planti samting i kamapim klia olsem Jisas i kirap bek pinis na planti man i bilip long dispela, olsem 4-pela Gutnius i kamapim.—Matyu 27:62–28:20; Mak 16:1-8; Luk 24:1-53; Jon 20:1–21:25.

Namba 2 samting, ol aposel i bin lukim Jisas i kirapim bek 3-pela man i dai pinis—fes long Nain, bihain long Kaperneam, na laspela long Betani. (Luk 7:11-17; 8:49-56; Jon 11:1-44) Dispela laspela man em i kirapim bek i bilong wanpela famili em Jisas i pas gut wantaim ol; yumi stori pinis long em long dispela magasin. Orait nau yumi ken stori moa long samting i bin kamap.

“Brata bilong yu bai kirap bek.” Jisas i mekim dispela tok long Marta, em brata bilong em, Lasarus, i bin slip long matmat inap 4-pela de pinis. Pastaim Marta i no kliagut long tok bilong Jisas. Em i tok, “Mi save em bai kirap bek,” tasol em i ting dispela samting bai kamap long bihain. Jisas i tok, “kirap bek em mi yet na laip em mi yet.” Bihain long Jisas i mekim dispela tok, Marta i kirap nogut tru taim em i lukim Jisas i kirapim bek brata bilong em i bin dai!—Jon 11:23-25.

Lasarus i stap we long dispela 4-pela de em i slip long matmat? Lasarus i no tok em i bin stap laip long sampela narapela hap long dispela 4-pela de. Lasarus i no gat wanpela spirit i lusim em na go long heven, nogat. Taim Jisas i kirapim bek Lasarus, em i no kisim Lasarus long gutpela  ples long heven klostu long God na bringim em i kam daun gen long graun, nogat. Olsem na Lasarus i bin stap we long dispela 4-pela de? Em i no go long wanpela hap, em i slip long matmat.—Saveman 9:4, 5, 10.

Tingim, Jisas i tok dai i olsem man i slip na God i kirapim em bek. Baibel i tok: “‘Pren bilong yumi Lasarus, em i slip. Tasol mi bai go long hap na kirapim em.’ Na ol disaipel i tokim em: ‘Bikpela, sapos em i slip, em bai kamap orait.’ Jisas i tok long dai bilong Lasarus. Tasol ol i ting em i tok long Lasarus i slip. Olsem na Jisas i tokaut klia long ol olsem: ‘Lasarus i dai pinis.’” (Jon 11:11-14) Taim Jisas i kirapim bek Lasarus, em i givim bek laip long em na Lasarus i bung gen wantaim famili bilong em. Jisas i givim nambawan gutpela presen long dispela famili!

Jisas i kirapim bek sampela man taim em i stap long graun na dispela i olsem piksa bilong ol samting em bai mekim bihain olsem King long Kingdom Bilong God. b Taim em i bosim graun, Jisas bai kirapim bek ol man i dai pinis i stap long matmat. Em as na em i bin tok: “Kirap bek em mi yet.” Tingim bikpela amamas yu bai kisim taim yu lukim gen ol famili na pren bilong yu! Tingim tu bikpela amamas ol lain i kirap bek bai kisim!—Luk 8:56.

Jisas i tokim Marta: “Man i bilip long mi, maski em i dai, em bai kisim laip gen. Na olgeta man i stap laip na bilip long mi, bai ol i no i dai.” (Jon 11:25, 26) Ol lain em Jisas bai kirapim ol bek long taim bilong wan tausen yia bilong em i stap king, ol inap kisim laip i stap gut oltaim—sapos ol i bilip tru long em.

Bihain long Jisas i mekim ol dispela gutpela tok long kirap bek, em i askim Marta olsem: “‘Yu bilipim dispela tok?’ Marta i tokim em: ‘Yes Bikpela. Mi bilip pinis olsem yu Krais, Pikinini bilong God.’” (Jon 11:26, 27) Olsem wanem long yu? Yu laik kisim wankain bilip long kirap bek olsem Marta i gat? Namba 1 samting yu mas mekim, em yu mas kisim save long ol samting God i tingting pinis long mekim long ol manmeri. (Jon 17:3; 1 Timoti 2:4) Kain save olsem inap helpim yu long kisim bilip. Yu ken askim ol Witnes Bilong Jehova long soim yu long ol tok Baibel i mekim long dispela samting. Ol bai amamas long toktok wantaim yu long gutpela samting yumi ken bilip na wet long en—em kirap bek.