Betani em wanpela liklik ples i stap longwe long Jerusalem inap 3 kilomita. (Jon 11:18) Sampela wik paslain long Jisas i dai, bikpela hevi i kamap long dispela hap. Lasarus, wanpela gutpela pren bilong Jisas, i kisim bikpela sik na em i dai.

Taim Jisas i kisim save long dispela, em i tokim ol disaipel bilong em olsem Lasarus i slip na em bai kirapim em. (Jon 11:11) Tasol ol disaipel bilong Jisas i no kliagut long mining bilong dispela tok, olsem na Jisas i tokim ol stret olsem: “Lasarus i dai pinis.”—Jon 11:14.

Inap 4-pela de bihain long ol i planim Lasarus, Jisas i kamap long Betani na em i laik mekim gut bel bilong Marta, em susa bilong Lasarus. Marta i tok: “Sapos yu bin stap long hia, brata bilong mi i no inap i dai.” (Jon 11:17, 21) Jisas i bekim tok olsem: “Kirap bek em mi yet na laip em mi yet. Man i bilip long mi, maski em i dai, em bai kisim laip gen.”—Jon 11:25.

Bilong kamapim klia olsem dispela tok em i tru, Jisas i go klostu long matmat na i singaut: “Lasarus, yu kam ausait!” (Jon 11:43) Orait, dispela man i dai pinis em i kam ausait, na ol man i lukim dispela ol i kirap nogut tru.

Paslain long dispela, Jisas i bin kirapim bek 2-pela man. Wanpela taim em i kirapim bek wanpela yangpela gel i dai pinis, em pikinini meri bilong Jairus. Paslain long Jisas i kirapim em bek, em i tok pikinini i slip tasol.—Luk 8:52.

Tingim, taim Jisas i toktok long dai bilong Lasarus na dai bilong pikinini meri bilong Jairus, em i tok dai i olsem “slip.” Dispela tok i stret. Bilong wanem? Taim man i slip em i no save long wanpela samting, na dispela i makim olsem em i no pilim pen o bel hevi. (Saveman 9:4, 5; lukim blok, “ Indai i Olsem Man i Slip.”) Ol disaipel bilong Jisas long bipo i kliagut long samting i painim ol  man i dai pinis. Buk Encyclopedia of Religion and Ethics i tok: “Ol disaipel bilong Jisas i tingim indai i olsem man i slip, na matmat em ples malolo . . . bilong ol man i dai olsem ol bilipman.” a

Dispela i mekim gut bel bilong yumi long save olsem ol man i dai pinis ol i slip long matmat na ol i no pilim pen. Yumi save indai em wanem samting na yumi no inap pret long en.

Yumi save amamas taim yumi slip gut long nait, tasol yumi no laik slip i go inap oltaim oltaim, a? Bilong wanem yumi bilip olsem ol man i slip long matmat ol bai kisim laip gen olsem samting i bin painim Lasarus na pikinini meri bilong Jairus?

Bilipman Jop i mekim dispela askim taim em i pilim olsem klostu nau em bai dai. Em i tok: “Sapos wanpela man i dai, em inap kisim laip gen?”—Jop 14:14, NW.

Jop i toktok long God i Gat Olgeta Strong, na em i bekim askim bilong em yet, olsem: “Long dispela taim bai yu ting long yu yet yu bin wokim mi, na bai yu laikim tumas bai mi stap klostu long yu gen. Olsem na bai yu singautim mi na bai mi lusim dispela ples.” (Jop 14:15) Jop i bilip olsem Jehova i laik tru long lukim dispela de we Em bai kirapim bek ol gutpela wokboi bilong Em. Yu ting Jop i wet nating long samting i no inap kamap? Nogat tru.

Jisas i kirapim bek sampela man i dai pinis, na dispela i kamapim klia olsem God i givim strong long Jisas long daunim indai. Baibel i tok nau Jisas i holim “ki bilong dai.” (Revelesen 1:18) Olsem na Jisas bai kirapim bek ol man i dai pinis wankain olsem em i bin kirapim bek Lasarus long matmat.

Planti taim Baibel i kamapim dispela tok promis olsem ol man i dai pinis ol bai kirap bek. Wanpela ensel i tokim profet Daniel olsem: “Bai yu dai, tasol bihain bai yu kirap bek . . . long las de.” (Daniel 12:13) Jisas i tokim ol Sadyusi, em ol hetman bilong lotu Juda husat i no bilip long kirap bek, olsem: “Yupela i paul, long wanem, yupela i no save long ol Rait Holi na long strong bilong God.” (Matyu 22:23, 29) Aposel Pol i tok: “Mi bilip na wet long God, . . . olsem bai i gat kirap bek bilong ol man i dai pinis, em ol stretpela man na ol man nogut wantaim.”—Aposel 24:15.

Wanem taim bai ol stretpela man na ol man nogut i kirap bek? Ensel i tokim gutpela man Daniel olsem em bai kirap bek “long las de.” Marta tu i bilip olsem brata bilong em, Lasarus, bai “kirap bek long las de.”—Jon 11:24.

Baibel i tok taim bilong “las de” bai kamap long taim Krais i stap King long Kingdom. Pol i tok: “Krais i mas mekim wok king i go inap long God i putim olgeta birua i stap aninit long lek bilong en. Na dai, dispela laspela birua, em bai pinisim olgeta.” (1 Korin 15:25, 26) Em as na yumi mas beten long Kingdom Bilong God i mas i kam na laik bilong God i mas kamap hia long graun. b

Jop i save gut olsem laik bilong God em long kirapim bek ol man i dai pinis. Taim dispela samting i kamap, indai bai pinis olgeta. Bai i no gat wanpela man i askim olsem, ‘Ol man i dai pinis, ol bai stap laip gen?”