THOMAS EMLYN em i husat na wanem samting i kirapim em long sapotim tok i tru? Yumi inap kisim wanem skul long em na dispela inap helpim yumi long nau?

Bilong kisim bekim bilong ol dispela askim, yumi mas skelim samting i bin kamap long Inglan na Aialan paslain liklik long pinis bilong yia 1600 samting na kirap bilong yia 1700. Long dispela taim Sios Bilong Inglan i holim bikpela strong long bosim ol man. Ol lotu Protestan na sampela man i no wanbel long ol bilip na pasin bilong Sios Bilong Inglan.

Thomas Emlyn i bon long Me 27, 1663 long Stamford, Lincolnshire, long Inglan. Taim em i gat 19 krismas, em i mekim fes semon bilong em long haus lotu. Bihain em i mekim wok olsem pris bilong wanpela meri i gat biknem husat i stap long London, na bihain em i go stap long Belfast, long Ailan.

Bihain liklik Emlyn i mekim wok olsem pris long wanpela haus lotu bilong Presbitirian long Belfast. Sampela yia bihain em i kamap wanpela wokman bilong lotu long Dublin na long ol narapela ples tu.

Long dispela taim Emlyn i wok long stadi gut long ol tok bilong Baibel. Pastaim em i bilip long God Triwan, tasol save em i kisim long Baibel i mekim na nau em i gat tupela tingting long dispela bilip. Taim em i stadi gut long ol gutnius bilong Baibel, em i luksave olsem save em i kisim i no sapotim bilip bilong God Triwan.

Emlyn i no hariap long tokaut long save em i kisim. Tasol sampela wanlotu bilong em long Dublin i luksave olsem em i no skulim moa ol man long God Triwan. Emlyn i save olsem ol man bai no amamas long wok painimaut bilong em, olsem na em i tok: “Taim mi kamapim bilip bilong mi, mi no inap mekim wok moa olsem wanpela pris.” Long Jun 1702, tupela wanwok bilong em i askim em long as na em i no stori long God Triwan long ol semon bilong em. Emlyn i tokaut stret olsem em i no bilip moa long God Triwan na em i laik risain.

Sampela de bihain, em i lusim Dublin long Aialan na em i go long Inglan. Tasol 10-pela wik bihain em i go bek long Dublin bilong stretim sampela wok bikos em i gat bikpela tingting long i go sindaun long London. Taim em i stap yet long Dublin, em i raitim buk An Humble Inquiry Into the Scripture-Account of Jesus Christ bilong kamapim klia ol tingting bilong em. Dispela buk i yusim ol skripsa bilong Baibel long kamapim klia as na Jisas i no Nambawan Bikpela God. Dispela i mekim na ol wanlotu bilong em long bipo em ol i stap long Dublin i belhat. Olsem na ol i kotim em.

Long Jun 14, 1703, ol i arestim Emlyn na kisim em i go long kot (Queen’s Bench Court) long Dublin.  Long buk bilong em True Narrative of the Proceedings, em i tok ol i sasim em “bikos em i raitim na prinim buk i tok bilas long God na i strongim dispela tingting kranki olsem Krais Jisas i no wankain olsem God, em Papa.” Ol i no bihainim stretpela pasin taim ol i kotim em. Sevenpela bisop bilong Sios Bilong Aialan i sindaun wantaim ol jas bilong harim kot. Ol i no larim Emlyn long mekim wanpela tok. Wanpela loya i gat nem, Richard Levins, i tokim Emlyn olsem ol bai “no inap givim sans long em, ol bai daunim em na lo i no inap helpim em.” Taim kot i pinis, Nambawan Jas Bilong Ailan, Richard Pyne, i tokim lain bilong harim kot olsem sapos ol i no inap painim rong long Emlyn, orait “ol bisop i stap,” i olsem em i laik tok ol lain bilong harim kot bai kisim panismen.

Taim kot i painimaut olsem Emlyn i mekim rong, nambawan solisita i askim em long em i mas stop long raitim ol buk. Tasol Emlyn i no bihainim tok bilong ol. Olsem na ol i sasim em na salim em i go long kalabus inap wanpela yia. Em i no gat mani long baim kot fain, olsem na em i kalabus inap 2-pela yia, na bihain wanpela pren bilong em i askim kot long daunim pe bilong fain. Emlyn i lusim kalabus long Julai 21, 1705. Pasin ol i mekim long em i semim em tru na dispela i kirapim em long mekim tok i stap antap: “Mi karim pen na hevi bikos mi bilip olsem dispela em tok i tru bilong God na em i ken kisim biknem.”

Taim Emlyn i go sindaun long London, em i bungim William Whiston, em wanpela saveman bilong Baibel em ol man i bin birua long em, long wanem, em i kamapim ol tok i tru bilong Baibel. Whiston i rispektim Emlyn na em i kolim em olsem “‘fes man long kamapim tok i tru’ bilong ‘lotu Kristen bilong bipo.’”

Olsem William Whiston na narapela saveman em Isaac Newton, Emlyn i kisim save olsem Baibel i no sapotim dispela bilip bilong God Triwan olsem Bilip Bilong Atanesias i stori long en. Em i tok: “Taim mi skelim olgeta samting na stadi long Baibel, . . . mi luksave olsem i gat gutpela risen . . . long senisim tingting mi bin gat long bilip bilong God Triwan.” Em i tok tu olsem “God na Papa bilong Krais Jisas em tasol i Nambawan Bikpela.”

Bilong wanem Emlyn i mekim dispela tok? Em i luksave olsem planti skripsa i kamapim klia olsem Jisas na Papa Bilong Em i narapela narapela. Lukim sampela eksampel (Ol tok Emlyn i mekim long ol skripsa i stap long rait i narakain):

•   Jon 17:3: “I no gat wanpela taim Baibel i kolim Krais olsem dispela wanpela God tru.” Baibel i kolim Papa tasol olsem “dispela wanpela God tru.”

•   Jon 5:30: “Pikinini i no bihainim laik bilong em yet, nogat, em i bihainim laik bilong Papa bilong em.”

•   Jon 5:26: “Papa i givim laip long em.”

•   Efesus 1:3: “Planti taim Baibel i kolim Krais Jisas olsem Pikinini Bilong God, tasol i no gat wanpela taim em i kolim Papa olsem Papa bilong God, planti taim em i kolim em olsem Papa bilong Bikpela bilong yumi, Jisas.”

Bihain long Emlyn i skelim olgeta samting, em i tokaut strong olsem: “I no gat wanpela hap tok bilong Baibel i stori olsem Papa, Pikinini, na Holi Spirit ol i wanpela na ol i gat wanpela bodi.”

Planti man long nau i pret long sapotim ol tok bilong Baibel. Tasol Emlyn i redi long sapotim. Em i kamapim dispela askim, “Sapos wanpela man i no laik kamapim ol bikpela tok i tru i stap ples klia long Baibel, bilong wanem em i ritim Baibel na mekim wok painimaut?” Emlyn i no laik long senisim tingting bilong em long tok i tru.

Emlyn na ol narapela i stap gutpela eksampel long pasin bilong sanap strong taim ol man i birua long ol bilip bilong yumi. Yumi ken askim yumi yet olsem, ‘Wanem samting i bikpela samting moa, yumi laik ol man i givim biknem long yumi o yumi kisim pasin bilong holimpas tok i tru bilong Baibel?’