Gavman Rom bilong bipo i bin kisim planti man na mekim ol i kamap sleiv taim ol i winim ol long pait na kisim ol i go long kantri bilong ol. Ol i salim ol dispela sleiv long ol man long Rom na planti bilong ol i no bin go bek long ples bilong ol.

Planti sleiv i save wok hat tru long ol main, tasol ol sleiv i wok long ol gaden na fam, ol i no save wok hat tumas. Ating ol bosman i pasim ring ain long nek bilong ol sleiv we i gat rait bilong tok promis long givim pe long man i painim dispela sleiv na bringim em i kam bek. Ol sleiv husat i traim long ranawe planti taim, bosman i save putim mak bilong leta F (fugitivus) long pes bilong ol long makim olsem ol i kalabusman.

Buk Filemon long Baibel i stori long aposel Pol i salim Onesimus, wanpela kalabusman husat i ranawe, i go bek long bosman bilong em Filemon. Maski Filemon i gat rait long panisim Onesimus, Pol i askim Filemon long “amamas long kisim” Onesimus long pasin laikim na pasin pren.—Filemon 10, 11, 15-18.

Fonisia em nau ol i kolim Lebanon, i bin gat nem long wokim ol pepol dai bilong Taia. King Solomon bilong Israel long bipo i bin bilasim tempel bilong em long “retpela [olsem pepol] laplap” em wanpela saveman bilong wokim ol samting long Taia i bin wokim.—2 Stori 2:​13, 14

I gat bikpela hatwok long wokim dai long dispela taim, olsem na pepol dai bilong Taia i gat bikpela pe. Pastaim, ol man bilong kisim pis i mas painim planti sel pis (murex shellfish) a long solwara bikos ol i save yusim klostu 12,000 sel pis long mekim dai bilong wanpela klos tasol. Bihain, ol i save rausim ol kina long sel bilong ol na bai ol inap kisim dai. Ol man bilong wokim dai i save bungim ol dispela kina wantaim sol na putim ausait long san inap 3-pela de. Bihain ol i save rausim ol kina na putim long wanpela traipela dis i gat solwara long en na karamapim lid na larim i stap inap sampela de moa.

Inap planti handret yia, ol Fonisia i mekim gut wok bilong salim dispela pepol dai bilong Taia, na tu, ol i bosim gut wok bilong wokim dispela dai, long wanem, ol i gat planti mani na ol i bosim ol narapela liklik kantri. Ol i bin painim ol samting ol i wokim long pepol dai long Biksolwara Mediterenian i go inap long hap wes bilong Cádiz, long Spen.