MARIA i bel hevi tru na em i brukim skru i go daun long graun. Em inap harim yet laspela singaut bilong pikinini bilong en taim em i karim bikpela pen inap sampela aua na em i dai. Maski em biksan, skai i tudak pinis. Orait nau graun i guria nogut tru. (Matyu 27:45, 51) Ating Maria i save olsem Jehova i mekim olsem bilong kamapim long olgeta manmeri olsem em i bel hevi tru long i dai bilong Krais Jisas.

Lait bilong apinun i rausim tudak i karamapim Golgota, o Bun Bilong Het, na Maria i krai sori long pikinini bilong em. (Jon 19:17, 25) Ating em i tingim gen ol samting ol i bin mekim wantaim. Wanpela bilong ol dispela samting i kamap inap 33 yia i go pinis. Taim Maria na Josep i kisim bebi bilong ol i go long tempel long Jerusalem, holi spirit i kirapim lapun man Simeon long autim wanpela tok profet. Em i tok profet olsem Jisas bai mekim planti gutpela samting, tasol em i tok tu olsem bihain Maria bai i pilim olsem wanpela longpela bainat i sutim lewa bilong em. (Luk 2:25-35) Nau long dispela taim bilong bikpela hevi, Maria i kliagut long as bilong dispela tok.

Taim wanpela pikinini i dai, bel hevi mama i pilim i bikpela tru, winim olgeta narapela hevi we inap painim em. Dai em namba wan bikpela birua bilong yumi, na yumi olgeta i no inap abrusim ol hevi em dai i save kamapim. (Rom 5:12; 1 Korin 15:26) Olsem wanem? Yumi inap daunim kain bel hevi olsem? Taim yumi skelim stori bilong Maria stat long taim Jisas i mekim wok autim tok bilong em i kam inap long taim em i dai na bihain long dispela, bai yumi kisim save long olsem wanem bilip bilong Maria i helpim em long daunim bel hevi bilong em.

Tingim samting i kamap 3 na hap yia i go pinis. Maria i pilim olsem sampela bikpela senis i laik kamap. Ol manmeri long liklik taun bilong Nasaret, ol tu i pilim olsem taim ol i harim Jon Bilong Baptais i autim strongpela tok long ol man i mas lusim ol pasin nogut bilong ol na tanim bel. Maria i save olsem pikinini bilong em i lukim ol dispela samting olsem wanpela mak bilong kirapim em long mekim wok autim tok bilong em. (Matyu 3:1, 13) Maria na famili bilong em i save olsem taim Jisas i lusim ol, sampela hevi bai painim ol. Bilong wanem ol i pilim olsem?

Ating long dispela taim man bilong Maria, Josep, i dai pinis. Sapos olsem, Maria i save pinis long bel hevi man inap pilim taim wanpela long famili i dai. a Nau ol i no kolim Jisas olsem “pikinini bilong kapenta” tasol, nogat, ol i kolim em tu olsem “dispela kapenta.” I luk olsem Jisas i kisim wok bisnis bilong papa bilong em na em i mas lukautim mama na 6-pela bratasusa bilong em. (Matyu 13:55, 56; Mak 6:3) Maski sapos Jisas i skulim Jems, ating em i namba tu pikinini long famili, long mekim wok kapenta bilong em i ken sapotim famili, famili bai painim hatwok yet taim Jisas i lusim ol. Maria tu i mekim bikpela wok long lukautim famili bilong em. Olsem na ating em i tingting planti long Jisas bai lusim ol. Tasol bikpela askim em olsem: Maria bai i gat wanem tingting taim Jisas bilong Nasaret i kamap Jisas Krais, em dispela Mesaia God i bin promis long salim i kam? Wanpela stori bilong Baibel i kamapim klia dispela samting.—Jon 2:1-12.

Jisas i go long Jon bilong em i ken kisim baptais, orait nau em i kamap Man God i Bin Makim, o Mesaia.  (Luk 3:21, 22) Orait nau Jisas i makim ol disaipel bilong em. Em i gat sotpela taim tasol long mekim wok autim tok bilong em, tasol em i lusim sampela haptaim long bung na amamas wantaim famili na ol pren bilong em. Em i go wantaim mama, ol disaipel, na ol brata bilong em long wanpela kaikai bilong marit i kamap long Kana, em wanpela taun i stap longwe long Nasaret inap olsem 13 kilomita. Long dispela bung, Maria i luksave olsem i gat wanpela hevi. Ating em i lukim sampela long famili bilong tupela marit i tingting planti na narapela i lukluk long narapela narapela na ol i toktok isi namel long ol yet bikos olgeta wain long dispela bung i pinis! Em pasin bilong ples long ol i mas lukautim gut ol man, olsem na famili bai kisim nem nogut sapos wain i pinis, na dispela inap pinisim amamas bilong ol man i kam long bung. Maria i sori long ol, olsem na em i go long Jisas.

Maria i tokim pikinini bilong em: “Ol i no gat wain.” Bilong wanem em i mekim dispela tok? Bikos em i save olsem pikinini bilong em i gat strong long mekim ol gutpela samting. I olsem em i tokim Jisas, “Pikinini, plis mekim sampela samting bilong stretim dispela hevi!” Ating em i kirap nogut long tok bilong Jisas. Jisas i tok: “Olsem wanem dispela em samting bilong mi na bilong yu?” Planti man i ting olsem tok Jisas i mekim i soim olsem em i daunim mama bilong em na em i no rispektim em. Tasol tok bilong em i soim olsem long pasin isi em i stretim mama bilong em. Jisas i laik helpim Maria long luksave olsem em i no gat wok long tokim Jisas long ol samting em i mas mekim, em wok bilong Papa bilong em, Jehova, long mekim olsem.

Maria i gat pasin daun, olsem na em i kisim dispela tok bilong stretim em. Em i tokim ol wokman: “Wanem samting em i tokim yupela long mekim, yupela i mas mekim.” Nau Maria i save olsem em i no gat wok moa long bosim pikinini bilong em, em yet na ol narapela i mas bihainim tok bilong Jisas. Tasol Jisas tu i pilim hevi bilong dispela tupela nupela marit, wankain olsem mama bilong em i pilim. Olsem na em i wokim fes mirakel bilong em, em i tanim wara i kamap gutpela wain. Orait wanem samting i kamap long dispela? “Ol disaipel bilong en i lukim na ol i bilip long em.” Maria tu i bilip long Jisas. Nau em i tingim Jisas olsem Bikpela, na Man Bilong Kisim Bek em, na i no olsem pikinini bilong em tasol.

Ol papamama long nau inap kisim gutpela skul long pasin bilong Maria long holimpas bilip. Tru, i no gat wanpela i bin mekim bikpela long kain pikinini olsem Jisas. Tasol taim wanpela pikinini i go bikpela, insait long dispela haptaim i gat sampela hatwok bilong en. Maski pikinini man o pikinini meri i bikpela pinis, sampela papamama i save mekim pasin long ol olsem ol i pikinini yet. (1 Korin 13:11) Olsem wanem papamama inap helpim pikinini i bikpela pinis? Wanpela rot em long tokim pikinini olsem ol i bilip olsem em bai bihainim yet ol tok bilong Baibel na Jehova bai blesim hatwok bilong em. Sapos papa na mama i gat pasin daun na ol i tokim pikinini olsem ol i trastim ol, ating dispela inap helpim pikinini bilong ol. Yumi ken ting Jisas i pilim tru gutpela pasin bilong Maria long lukautim em long ol yia bihain, maski em i bungim planti hevi.

Ol Gutnius i no stori tumas long ol samting i painim Maria insait long 3 na hap yia em Jisas i bin mekim wok autim tok. Tasol tingim, man bilong em i dai pinis na em i wanpela mama wanpis. Ating sampela pikinini bilong em i yangpela yet na em i mas lukautim ol. Olsem na ating em i no inap bihainim Jisas taim em i raun na autim tok long ol narapela ples. (1 Timoti 5:8) Maski i olsem, Maria i tingim tingim yet save em i kisim long ol samting Mesaia  bai mekim na em i go long ol miting long sinagog, em samting em na famili bilong em i save mekim long olgeta taim.—Luk 2:19, 51; 4:16.

Olsem na yumi ken ting olsem em i sindaun wantaim ol manmeri na harim tok taim Jisas i autim tok long sinagog long Nasaret. Ating Maria i amamas tru taim pikinini bilong em i tokaut olsem em yet i truim wanpela tok profet bilong bipo yet! Na ating em i bel hevi taim em i lukim olsem ol wanples long Nasaret i no bilip long pikinini bilong em na ol i laik kilim em i dai!—Luk 4:17-30.

Na ating em i bel hevi tu taim em i lukim pasin ol narapela pikinini bilong em i mekim long Jisas. Long Jon 7:5, yumi kisim save olsem Maria i bilip long Jisas, tasol 4-pela brata bilong em nogat. Baibel i tok: “Ol brata bilong en i no bilip long em.” Baibel i no stori long ol susa bilong Jisas, tasol yumi ken ting olsem em i gat tupela susa. b Maria i bel hevi tru olsem ol narapela insait long famili i no gat wankain bilip. Em i mas wok strong long i stap gut long tok i tru na dispela bai helpim famili bilong em, em i no fosim ol o tok pait wantaim ol.

Wanpela taim, sampela wanblut na ating ol brata bilong Jisas, ol i laik i go bilong “kisim” Jisas. Ol i tok: “Tingting bilong em i paul pinis.” (Mak 3:21, 31) Maria i no gat dispela tingting, tasol em i go wantaim ol pikinini man bilong em, ating em i ting ol inap kisim sampela save na dispela bai helpim ol long bilip. Yu ting ol i mekim olsem? Maski Jisas i wokim ol bikpela mirakel na em i skulim ol man long tok i tru, ol narapela pikinini man bilong Maria i no bilip long em. Ating Maria i tingting planti long wanem samting inap helpim ol long bilip long Jisas?

Olsem wanem? Famili bilong yu i gat narapela narapela lotu? Pasin bilong Maria long bilip inap skulim yu long planti samting. Em i no givap taim ol wanblut bilong em i no bilip. Nogat. Em i laik bai ol i luksave olsem bilip bilong em i mekim na em i stap bel isi na amamas. Na em i sapotim dispela pikinini bilong em husat i gat strongpela bilip na i stap gut long God. Ating em i wari long Jisas na sampela taim em i laik bai Jisas i stap wantaim ol. Tasol em i no kamapim dispela tingting bilong em. Em i tingim dispela olsem wanpela gutpela rot bilong helpim Jisas na em i mekim ol tok bilong strongim bel bilong em. Yu inap bihainim wankain pasin na helpim ol pikinini bilong yu long putim laik bilong God i stap olsem nambawan bikpela samting long laip bilong ol.

Yu ting gutpela samting i kamap long Maria long pasin bilong em long bilip long Jisas? Jehova i save mekim gut long ol man husat i bilip long em, olsem na em i mekim gut long Maria tu. (Hibru 11:6) Ating Maria i amamas tru taim em i harim ol tok Jisas i mekim o taim em i harim ol man i stori long ol tok ol i harim long Jisas.

Long ol tok piksa bilong Jisas, ating Maria i tingim ol samting Jisas i bin mekim taim em i go bikpela long Nasaret. Taim Jisas i stori long meri i brumim haus bilong painim wanpela mani i lus, o wilwilim plaua bilong wokim bret, o laitim lam na putim antap long tebol, ating Maria inap tingim olsem dispela liklik boi i bin stap na lukim em i mekim ol kain wok olsem. (Luk 11:33; 15:8, 9; 17:35) Taim Jisas i stori olsem hap plang bilong em i gutpela, na samting em i askim ol man long karim i no hevi, ating Maria i tingim bek taim Josep i bin skulim yangpela Jisas long sapim na wokim gut hap plang na bai ol animal i ken karim ol dispela hap plang na ol i no pilim bikpela pen. (Matyu 11:30) Yumi inap bilip tru olsem Maria i amamas long tingim gutpela wok Jehova i bin givim em long mekim bikpela long dispela  pikinini husat bai kamap Mesaia. Ating em i amamas tru long harim ol tok bilong Jisas, dispela nambawan bikpela tisa, taim em i yusim ol tok piksa long ol samting ol man i mekim wok long en long olgeta de bilong skulim ol long ol bikpela tok!

Tasol Maria i gat pasin daun. Jisas i no litimapim nem bilong mama bilong em na bai ol man i adorim em, nogat. Taim Jisas i mekim wok autim tok, wanpela meri i singaut olsem mama bilong Jisas i ken amamas tru olsem em i bin karim dispela pikinini. Tasol Jisas i bekim tok olsem: “Nogat. Ol man i harim tok bilong God na bihainim, ol i ken amamas!” (Luk 11:27, 28) Na wanpela taim, sampela man namel long bikpela lain manmeri i tokim Jisas olsem mama na ol brata bilong em i painim em, na Jisas i tok, ol manmeri husat i bilip long em ol i mama na ol brata bilong em. Tasol Maria i no bel hevi long dispela tok, em i kliagut long tok bilong Jisas, olsem em i bikpela samting moa long bung wantaim ol wanbilip, na i no ol wanblut.—Mak 3:32-35.

Yumi ken tingim bikpela bel hevi Maria i pilim taim em i lukim pikinini bilong em i karim bikpela pen na em i dai long diwai pos. Aposel Jon i bin lukim Jisas i hangamap long pos, na bihain em i raitim dispela tok long Gutnius bilong em olsem, taim Jisas i hangamap i stap, Maria i sanap “klostu long diwai pos bilong em.” I no gat wanpela samting inap pasim dispela gutpela mama long sanap klostu long pikinini bilong em i go inap long taim em i dai. Jisas i lukim mama bilong em, na maski em i pilim bikpela pen na i hatwok long em i pulim win, em i mekim wanpela tok bilong soim olsem em i laik bai aposel Jon i ken lukautim mama bilong em. Long dispela taim, ol brata bilong Jisas i no bilip long em, olsem na Jisas i laik bai wanpela gutpela disaipel bilong em i ken lukautim Maria. Em nau, Jisas i soim olsem em i bikpela samting long bilipman i mas lukautim famili bilong em, na moa yet long sait bilong lotu.—Jon 19:25-27.

Taim Jisas i dai, Maria i pilim dispela pen em ol i bin tok profet long en, em pen i olsem wanpela longpela bainat i sutim em. Ating yumi no inap pilim bel hevi bilong Maria, na olsem tasol yumi no inap pilim bikpela amamas em i kisim 3-pela de bihain! Maria i kisim save long nambawan bikpela mirakel i kamap. Jisas i kirap bek! Na Maria i amamas tru taim em i harim olsem Jisas i kamap long brata bilong en Jems taim em wanpela i stap. (1 Korin 15:7) Taim ol narapela brata bilong Jisas i harim dispela stori tu, ol i pilim tru pasin Jisas i mekim long Jems. Bihain, ol tu i bilip olsem Jisas em i Krais. I no longtaim na ol i go wantaim mama bilong ol long ol miting Kristen na “ol i wok long beten i stap.” (Aposel 1:14) Bihain tupela brata bilong em, Jems na Jut, ol i raitim sampela hap bilong Baibel.

Laspela taim Baibel i stori long Maria em long taim em i stap wantaim ol pikinini man bilong en long miting na ol i beten i stap. Stori bilong Maria i stap olsem gutpela eksampel bilong yumi ken bihainim! Maria i gat strongpela bilip na dispela i helpim em long daunim bel hevi maski dispela bel hevi i olsem bainat i sutim em, na em i kisim gutpela pe tru. Sapos yumi bihainim pasin bilong Maria na yumi tu i gat strongpela bilip, bai yumi inap winim olkain hevi bilong dispela graun, na yumi bai kisim gutpela pe tru.