Taim mi liklik famili bilong mi i bin stap long Leipzig, long Is Jemani, em ples i stap klostu long boda bilong Sek Ripablik na Polan. Long taim mi gat 6-pela krismas, wok bilong Papa i mekim na mipela i mas go long ol narapela kantri, olsem long Brasil na Ekwado.

Taim mi gat 14 krismas, ol i salim mi i go long wanpela boding skul long Jemani. Papamama bilong mi i stap longwe long Saut Amerika, olsem na mi save lukautim mi yet. Mi bihainim laik bilong mi yet tasol, na mi no pilim tingting bilong ol narapela long ol samting mi mekim.

Taim mi gat 17 krismas, papamama bilong mi i kam bek long Jemani. Olsem na mi go stap wantaim ol long haus bilong ol. Tasol pasin bilong mi long bihainim laik bilong mi yet i mekim na i hatwok long mi stap daun long papamama. Taim mi gat 18 krismas mi lusim papamama na mi go stap mi yet.

Mi pilim olsem laip bilong mi i nogat as bilong en. Taim mi lukim sindaun bilong ol man bilong narapela narapela hap, dispela i kirapim mi long i go long ol narapela kantri na lukim ol gutpela samting i stap long graun olgeta.

Paslain long mi lusim Jemani, mi baim wanpela motobaik na mi go long Afrika. Tasol i no longtaim na mi go bek long Yurop, long wanem, mi mas fiksim motobaik bilong mi. Bihain, mi go stap long wanpela nambis long Potugal. Long dispela hap, mi wokim disisen olsem bai mi raun long sip, olsem na mi lusim motobaik bilong mi.

Mi go wantaim sampela yangpela man na meri em ol i laik raun long sip bilong i go long Solwara Atlantik. Wanpela bilong ol dispela lain, em Laurie, bihain em i kamap meri bilong mi. Pastaim mipela i go long ailan Karibian. Bihain mipela i go stap sotpela taim long Pueto Riko, na mipela i go bek long Yurop. Mipela i tingting long baim wanpela bot we i gat ol rum slip na ples bilong kaikai na pilai samting long en. Tasol bihain long 3-pela mun, mipela olgeta i lusim dispela grup na mi joinim ami bilong Jemani.

Mi stap olsem nevi bilong Jemani inap 15 mun. Insait  long dispela haptaim, mi na Laurie i marit, na mitupela i redim ol samting na bai mipela i ken raun lukim ol narapela kantri olsem mipela i bin mekim long pastaim. Paslain long mi joinim ami, mipela i baim wanpela bot. Taim mi mekim wok olsem ami, isi isi mipela i stretim dispela bot na bai mipela inap raun long en. Insait long dispela haptaim, ol Witnes Bilong Jehova i bungim mipela na mipela i kirap stadi long Baibel.

Mi no ting olsem i gat sampela samting long i stap bilong mi em mi mas senisim. Mi maritim gelpren bilong mi, na tu, mi lusim pasin bilong smok. (Efesus 5:5) Mipela i tingting long raun lukim ol narapela kantri, na lukim olgeta gutpela samting em God i bin wokim, na long dispela rot bai mipela i stap amamas tru.

Tasol bihain mi luksave olsem mi mas mekim sampela senis long pasin bilong mi. Mi gat pasin antap na mi ting olsem mi gat bikpela save na planti gutpela samting winim ol narapela. Ol dispela pasin i mekim na mi gat pasin bilong tingim mi yet tasol.

Wanpela taim, mi ritim tok em Jisas i mekim long Bikpela Tok Long Maunten. (Matyu, sapta 5-7) Tasol mi no kliagut long tok bilong Jisas long olsem wanem man inap stap amamas. Olsem, Jisas i tok ol man i hangre, ol i ken amamas. (Matyu 5:6) Mi tingting, olsem wanem man inap stap amamas sapos em i nidim sampela samting. Taim mi stadi long Baibel, isi isi mi kisim save olsem yumi olgeta i gat laik bilong kisim save long tok bilong God, na yumi mas inapim dispela laik bilong i stap amamas tru. Olsem na Jisas i tok: “Ol man i hangre long kisim save long God, ol i ken amamas.”—Matyu 5:3.

Mipela i kirap long stadi taim mipela i stap long Jemani, tasol bihain mi na Laurie i go sindaun long Frans na bihain Itali. Maski wanem hap mipela i go long en, mipela i bungim ol Witnes Bilong Jehova. Mi kirap nogut long lukim olsem ol Witnes i save tingim tru narapela narapela na ol i stap wanbel. Na tu, mi luksave olsem ol Witnes i stap olsem wanpela lain brata long olgeta hap bilong graun. (Jon 13:34, 35) I no longtaim na mi na Laurie i baptais na kamap ol Witnes Bilong Jehova.

Bihain long mi kisim baptais, mi senisim sampela pasin bilong mi. Mitupela Laurie i pasim tok long raun long bot long nambis bilong Afrika, long Solwara Atlantik na bihain go long Amerika. Long ol dispela haptaim we mipela i wok long raun long solwara, mi luksave olsem mi samting nating long ai bilong Krieta bilong yumi. Mipela i stap long bot namel long biksolwara na i no gat planti wok long mekim, olsem na mi lusim bikpela haptaim long ritim Baibel. Mi amamas long ritim ol stori bilong Jisas taim em i stap long graun. Jisas i gutpela man olgeta na em i gat bikpela save, tasol em i no save litimapim nem bilong em yet, nogat. Em i givim bel long tokim ol narapela long Papa bilong em long heven.

Mi tingim tingim eksampel bilong Jisas, na dispela i helpim mi long putim ol samting long Kingdom Bilong God i stap namba 1, na mi no ken tingting tumas long mekim ol samting bilong amamasim mi yet. (Matyu 6:33) Taim mi na Laurie i kamap long Amerika, mipela i wokim disisen long mekim ol wok bilong Kingdom, na lusim pasin bilong raun long bot.

Long bipo, mi gat pasin bilong tingim mi yet tasol, dispela i mekim na mi save gat tupela tingting long ol disisen bilong mi. Tasol nau mi save olsem God i gat bikpela savetingting i save skulim na stiaim mi long mekim ol gutpela disisen. (Aisaia 48:17, 18) Na tu, nau laip bilong mi i gat as tru bilong en. Olsem, mi inap lotu long God na helpim ol narapela long kisim save long em.

Mipela i bihainim ol stiatok bilong Baibel, na dispela i helpim marit bilong mitupela. Na tu, narapela blesing mipela i kisim em olsem mipela i gat wanpela naispela pikinini meri, na em tu i kisim save na laikim tru Jehova.

Mipela i bungim planti hevi long i stap bilong mipela. Tasol Jehova i helpim mipela na dispela i strongim mipela long mekim yet wok bilong em na trastim em.—Sindaun 3:5, 6.