Eric: Mi no save go lotu, olsem na i gutpela yu toktok wantaim ol narapela.

Brian: Em gutpela olsem yu kamapim tingting bilong yu. Nem bilong mi Brian. Na nem bilong yu?

Eric: Nem bilong mi Eric.

Brian: Mi amamas long bungim yu.

Eric: Mi tu i amamas long bungim yu.

Brian: So yu go bikpela long famili em ol i save tingim lotu?

Eric: Yes. Tasol taim mi go long kolis, mi lusim pasin bilong go long lotu.

Brian: Ok. So yu kisim wanem kos long kolis?

Eric: Mi bin skul long histori na olsem wanem sindaun bilong ol man i wok long senis. Mi gat bikpela laik long save long ol dispela samting.

Brian: Em tru, histori em wanpela topik em planti man i laik save long en. Ating yu save olsem Baibel em wanpela buk bilong histori. Olsem wanem? Yu bin yusim Baibel long mekim sampela wok painimaut bilong yu?

Eric: Nogat. Mi save olsem Baibel i gutpela buk, tasol mi no ting olsem em wanpela buk bilong histori.

Brian: Orait, tenkyu long kamapim tingting bilong yu. Mi luksave olsem yu man bilong skelim gut ol samting. Sapos yu gat taim, mi bai amamas long stori long sampela eksampel long Baibel we i soim olsem ol stori bilong en i tru.

Eric: Em orait. Tasol mi nogat Baibel.

Brian: Yumi ken yusim Baibel bilong mi. Fes eksampel em long 1 Stori sapta 29, ves 26 na 27. Ol dispela ves i tok: “Devit, pikinini bilong Jesi, em i stap king bilong olgeta hap bilong kantri Israel. Em i stap king inap 40 yia. Em i stap king long Hebron inap 7-pela yia na long Jerusalem inap 33 yia.”

Eric: Olsem wanem ol dispela ves i soim olsem Baibel i kamapim ol stori tru?

Brian: Ol saveman i bin tok King Devit i no stap long bipo.

Eric: Bilong wanem ol i gat kain tingting olsem?

Brian: I no gat planti evidens bilong soim olsem Devit i stap tru long bipo. Tasol long 1993, sampela saveman i painim wanpela hap ston bilong bipo tru i gat rait long en. Ol i tanim dispela tok olsem, “Haus Bilong Devit.”

Eric: Man! Mi kirap nogut long save long dispela.

Brian: Na tu, ol saveman i no bilip olsem Pontius Pailat i bin stap long bipo na i mekim wok gavana long taim bilong Jisas. Long Luk sapta 3, ves 1, Baibel i stori long Pontius Pailat em wanpela bilong ol bikman bilong gavman long dispela taim.

Eric: Yes, mi luksave long dispela. Em i tok: “Pontius Pailat i stap gavana bilong Judia, na Herot i bosim distrik Galili.”

Brian: Em stret. Inap planti yia, sampela saveman  i gat tupela tingting olsem Pontius Pailat i bin stap long bipo o nogat. Tasol klostu 50 yia i go pinis, ol man i painim wanpela hap ston long Midel Is. Na dispela ston i gat nem bilong Pontius Pailat long en.

Eric: Bipo mi no bin harim kain stori olsem.

Brian: Mi amamas olsem nau mitupela i stori long ol dispela samting.

Eric: Mi rispektim Baibel olsem wanpela narakain buk we i kamapim ol stori tru. Tasol mi ting ol tok bilong en i no inap helpim i stap bilong yumi long nau.

Brian: Planti man bai wanbel long dispela tok. Tasol tingim, ol samting yumi nidim long nau i wankain long ol samting ol man i mas i gat long bipo. Olsem, yumi nidim kaikai, klos, na ples slip. Na tu, yumi laik stap pren bilong ol narapela, na yumi laik bai famili bilong yumi i mas stap amamas. Yumi tingim ol dispela samting olsem bikpela samting.

Eric: Yu tok stret.

Brian: Ol tok bilong Baibel inap helpim yumi long nau maski em wanpela buk bilong bipo.

Eric: Wai yu tok olsem?

Brian: Ol stiatok bilong Baibel em ol man i bin raitim planti handret yia i go pinis i bin helpim ol long bipo, olsem na em inap helpim yumi long nau tu.

Eric: Olsem wanem ol stiatok bilong Baibel i helpim yumi?

Brian: Ol tok bilong en i helpim yumi long sait bilong mani, rot bilong stap gutpela pren, na olsem wanem famili i ken i stap amamas. Wankain olsem wanpela mep, Baibel inap stiaim yumi long mekim ol gutpela disisen. Long nau i hatwok long ol man marit i mekim gut wok bilong ol long lukautim famili.

Eric: Tok bilong yu i tru. Mi marit inap wanpela yia pinis, tasol sampela taim mi na meri bilong mi i no save wanbel long ol samting mipela i laik mekim.

Brian: Baibel i gat ol stiatok bilong helpim yumi. Yumi ken skelim tok bilong Efesus sapta 5, ves 22, 23, na 28. Plis inap yu ritim ol dispela ves?

Eric: Em i tok: “Ol maritmeri i mas daun long man bilong ol, olsem ol i daun long Bikpela. Long wanem, maritman em i stap het bilong meri bilong en, olsem Krais i stap het bilong kongrigesen. Kongrigesen em bodi bilong Krais, na Krais em i seivia bilong en.” Na ves 28 i tok: “Olsem tasol ol maritman i mas laikim meri bilong ol olsem ol i laikim bodi bilong ol yet. Man i laikim meri bilong en, em i laikim em yet.”

Brian: Tenkyu long rit. Sapos man na meri marit i bihainim ol dispela stiatok bilong Baibel, yu ting famili bilong ol bai stap amamas?

Eric: Ol bai stap amamas, tasol i hatwok long mekim olsem.

Brian: Tok yu kamapim i stret, olgeta man i gat sin, olsem na narapela ves long dispela sapta em yumi bin ritim i helpim yumi long holim stretpela tingting. a Tupela poroman marit i mas redi long daunim laik bilong ol yet na pilim tingting bilong narapela narapela. Baibel i helpim mi na meri bilong mi long mekim olsem.

Eric: Em tru, em gutpela tingting long mekim olsem.

Brian: Ol Witnes Bilong Jehova i gat Web-sait we i gat ol gutpela tok bilong helpim ol marit na ol famili. Sapos em orait long yu, mi laik soim yu dispela Web-sait.

Eric: Em orait.

Brian: Dispela Web-sait em www.pr418.com/tpi. Lukim hom pes bilong Web-sait.

Eric: Man, em ol naispela piksa.

Brian: Ol dispela piksa i soim wok autim tok mipela i save mekim long olgeta hap bilong graun. Orait lukim dispela het tok “Pabliksen.” Aninit long dispela het tok, bai yu lukim planti arapela liklik het tok, tasol yu inap makim “Magasin.” Taim yu klikim “Magasin,” yu inap lukim ol nius Kirap! Planti  taim nius Kirap! i gat ol atikol bilong helpim ol marit na famili laip.

Eric: Mi laikim ol dispela nius. Inap yu soim mi wanpela bilong ol dispela atikol?

Brian: Orait, mi daunlodim pinis nius Kirap! bilong Disemba 2014. Mi laik soim yu dispela atikol em het tok bilong en, “Redi Long Daunim Laik Na Tingting Bilong Yu.” Dispela atikol i stori long 4-pela samting ol marit i ken mekim bilong daunim laik na tingting bilong ol. Lukim tok bilong dispela paragraf. Yu laik ritim?

Eric: Orait. Em i tok: “Redi long bihainim tingting bilong poroman marit. Baibel i tok: ‘Yupela olgeta wan wan i mas laikim ol meri bilong yupela olsem yupela i save laikim yupela yet. Na maritmeri i mas i gat bikpela rispek long man bilong en.’ Taim ol marit i laikim na rispektim narapela narapela, tupela wantaim bai redi long bihainim tingting bilong narapela, na tu, redi long senisim tingting bilong ol yet.” Man, mi laikim tru dispela tok.

Brian: Tenkyu long ritim. Yu luksave olsem dispela skripsa i kamapim klia olsem insait long marit, sapos wanpela i mekim gutpela pasin long narapela, orait poroman marit bai bekim wankain pasin long em.

Eric: Em stret. Tasol mi no klia long tok bilong yu.

Brian: Tingim, man marit i laik bai meri i mas soim pasin rispek long em na meri marit i laik bai man i mas soim pasin laikim long em.

Eric: Mi wanbel long dispela tok.

Brian: So sapos man marit i soim pasin laikim long meri bilong em, yu ting meri bai redi long daunim laik na tingting bilong em?

Eric: Yes, em bai redi long bihainim tingting na laik bilong man bilong em.

Brian: Olsem na maski ol i bin raitim dispela tok bilong Baibel klostu 2,000 yia i go pinis, dispela tok inap helpim ol man marit na meri marit long stap amamas.

Eric: Nau mi luksave olsem ol tok bilong Baibel inap helpim yumi.

Brian: Mi amamas long toktok wantaim yu. Sapos yu laik, mi ken kam bek na mitupela i ken stori long 3-pela samting moa em ol marit i mas mekim bilong daunim laik na tingting bilong ol. b

Eric: Em gutpela. Mi na meri bilong mi bai lukim dispela Web-sait na daunlodim sampela nius.