•  Tok Bilong Kirapim Miting 2

•  Gutpela Save i Kam Long Baibel 3-5

  •  Tok 3

  •  Mekim Wok Painimaut 4

  •  Baibel Ritim 5

•  Mekim Wok Autim Tok 6-14

  •  Kirapim Toktok 7

  •  Gobek 8

  •  Kamapim Ol Disaipel 9

  •  Kamapim Bilip Bilong Yu 10

  •  Tok 11

  •  Content 12

  •  Setting 13

  •  Yusim Ol Vidio na Pablikesen 14

•  Bihainim Pasin Kristen 15-16

  •  Baibel Stadi Bilong Kongrigesen 16

•  Tok Bilong Pinisim Miting 17

•  Tok Amamas na Kaunsel 18

•  Minit Bilong Wan Wan Hap 19

•  Visit Bilong Wasman Sekit 20

•  Wik Bilong Kibung Sekit o Rijinel Kibung 21

•  Wik Bilong Memorial 22

•  Wasman Bilong Laip na Wok Autim Tok Miting 23

•  Siaman Bilong Laip na Wok Autim Tok 24

•  Namba Tu Brata Bilong Givim Tok Kaunsel 25

•  Ol Namba Tu Klas 26

•  Vidio 27

1. Ol instraksen long dispela fom bai helpim olgeta husat i gat hap long Ol Miting Bilong Kristen Laip na Wok Autim Tok bilong yumi. Ol i mas skelim instraksen bilong hap bilong ol i stap long Kristen Laip na Wok Autim Tok—Miting Wok Buk na long dispela fom paslain long ol i redim hap bilong ol. Invaitim olgeta pablisa long ol i ken insait long mekim ol asainmen bilong sumatin. Ol narapela husat i save kam bung olgeta taim wantaim kongrigesen, ol i ken insait tu sapos ol i wanbel long ol tok bilong Baibel na pasin bilong ol i stret wantaim ol stiatok na ol lo bilong Kristen. Wasman Bilong Kristen Laip na Wok Autim Tok i mas stori long ol mak bilong winim bilong insait long skul wantaim wanpela husat i no pablisa na em i gat laik long joinim skul. Wasman i mas tokim tu dispela man o meri sapos em i winim mak. Wasman i mas mekim dispela tokaut long ai bilong pablisa husat i stadi wantaim dispela man o meri (o long ai bilong papa o mama husat i pablisa). Ol mak bilong winim em wankain olsem bilong wanpela husat i laik kamap pablisa husat i no baptais.—od sap. 8 par. 8.

2. Em 1-pela minit. Long olgeta wik, bihain long singsing na beten bilong kirapim miting, siaman bilong Laip na Wok Autim Tok Miting bai kirapim tingting na bel bilong odiens long harim program bai kamap. Siaman i mas kamapim ol poin we bai helpim tru kongrigesen.

 3. Tok: 10 minit. As tok na wanpela autlain i gat 2-pela o 3-pela poin bilong en, ol i stap long Laip na Wok Autim Tok Miting Wok Buk. Wanpela elda o kongrigesen sevan husat inap mekim gut wok tisa i mas mekim dispela hap. Taim i gat wanpela nupela buk bilong Baibel long sediul bilong mekim Baibel ritim bilong wik, bai i gat wanpela vidio bilong pilaim bilong kirapim dispela hap. Brata bilong mekim tok em i ken stori long olsem wanem ol samting yumi lukim long vidio i stret wantaim as tok bilong dispela hap bilong miting. Tasol em i mas kamapim ol bikpela tok olsem wok buk i makim. Na tu, sapos i gat taim, em i mas stori long ol piksa. Ol dispela piksa i go stret wantaim ol tok bilong dispela hap. Brata i ken kamapim tu stori bilong ol narapela pablikesen bilong yumi sapos ol i sapotim ol poin i stap long Wok Buk.

 4. Mekim Wok Painimaut: 10 minit. Dispela hap i gat ol askim na bekim, na brata i lukautim dispela hap i no gat wok long kirapim tok long rot bilong stori long wanem samting ol bai skelim na bihain mekim riviu bilong pinisim dispela hap. Wanpela elda o kongrigesen sevan husat inap mekim gut tok i mas mekim dispela hap. Brata i lukautim dispela hap i mas kamapim dispela tupela askim long odiens. Na tu, em i ken skelim sapos i gat wok long ritim ol ves. Ol lain i bekim tok i no ken abrusim 30 seken.

 5. Baibel Ritim: 4 minit. Wanpela man sumatin i mas mekim dispela asainmen. Sumatin i mas ritim hap bilong Baibel ol i bin makim bilong em na em i no ken mekim wanpela kirap bilong tok o pinis bilong tok. Siaman bilong miting bai i gat bikpela tingting long helpim ol sumatin long ritim stret, na ritim olsem ol i pilim gut ol tok, ritim klia, kolim strong long ples i stret long mekim, senisim nek, malolo liklik long ples i stret long mekim, na ritim olsem ol i toktok wantaim man. Sampela asainmen bilong ritim ol Baibel ves i sotpela na sampela i longpela, olsem na wasman bilong Laip na Wok Autim Tok Miting i mas skelim husat sumatin i ken ritim ol dispela ves taim em i redim ol dispela asainmen.

6. Em 15 minit. Dispela hap bilong miting i bilong givim rot long olgeta long traim pasin bilong autim tok na long kamap gutpela moa long pasin bilong toktok wantaim ol manmeri na autim tok na skulim ol man. Sapos i gat wok long mekim, ol elda i ken mekim tu ol asainmen bilong ol sumatin. Wan wan sumatin i mas wok long stadi poin i stap long buklet Skulim Man o Laikim Ol Man we i stap klostu long asainmen long Laip na Wok Autim Tok Miting Wok Buk. Sampela taim long sediul, bai i gat hap bilong askim na bekim. Wanpela elda o kongrigesen sevan husat inap givim gut tok i mas lukautim dispela hap.—Lukim  paragraf 15 long pasin bilong lukautim ol hap bilong askim na bekim.

 7. Kirapim Toktok: Wanpela man o meri sumatin i ken mekim dispela asainmen. Taim wanpela brata i mekim, wanpela brata i mas stap olsem helpim bilong em, na sapos sista i mekim, wanpela sista i mas stap olsem helpim bilong em. O helpim bilong sumatin i ken wanpela long famili yet bilong em. Sumatin na helpim bilong em i ken sanap o sindaun.—Bilong kisim sampela save moa long content na setting bilong dispela asainmen, lukim  paragraf 12 na  13.

 8. Gobek: Wanpela man o meri sumatin i ken mekim dispela asainmen. Taim wanpela man sumatin i mekim, wanpela man i mas stap olsem helpim bilong em, na sapos meri sumatin i mekim, wanpela meri i mas stap olsem helpim bilong em. (km 5/97 p. 2) Sumatin na helpim bilong em i ken sanap o sindaun. Sumatin i mas mekim soim long wanem samting em bai stori long en taim em i mekim gobek long wanpela husat em i bin kirapim toktok wantaim em long pastaim.—Bilong kisim sampela save moa long content na setting bilong dispela asainmen, lukim  paragraf 12 na  13.

 9. Kamapim Ol Disaipel: Wanpela man o meri sumatin i ken mekim dispela asainmen. Taim wanpela man sumatin i mekim, wanpela man i mas stap olsem helpim bilong em, na sapos meri sumatin i mekim, wanpela meri i mas stap olsem helpim bilong em. (km 5/97 p. 2) Sumatin na helpim bilong em i ken sanap o sindaun. Long dispela hap, ol i mas mekim Baibel stadi we i soim olsem stadi i kirap pinis. I no gat wok long mekim tok bilong kirap o pinisim stadi sapos sumatin i no wok long wanpela stadi poin we i stret long pasin bilong kirapim tok o pinisim tok. I no gat wok long ritim olgeta paragraf long bikpela nek, tasol ol i ken mekim sapos ol i laik.

 10. Kamapim Bilip Bilong Yu: Sapos em wanpela tok, orait man sumatin i mas mekim dispela asainmen. Sapos em wanpela soim, orait wanpela man o meri sumatin i ken mekim dispela asainmen. Taim wanpela man sumatin i mekim, wanpela man i mas stap olsem helpim bilong em, na sapos meri sumatin i mekim, wanpela meri i mas stap olsem helpim bilong em o helpim bilong sumatin i ken wanpela long famili yet bilong em. Sumatin i mas kamapim klia bekim na mekim long gutpela pasin long askim we i olsem tim. Em i mas yusim ol infomesen i stap long ol referens long asainmen bilong em. Sumatin yet i ken makim sapos em bai kolim pablikesen em i kisim tok long en long hap bilong en o nogat.

 11. Tok: Wanpela man sumatin i mas mekim dispela asainmen na mekim olsem wanpela tok i go long kongrigesen. Sapos as bilong tok i kam long wanpela poin i stap long Apendiks A bilong buklet Laikim Ol Man, sumatin i mas kamapim olsem wanem yumi ken yusim wanpela o sampela ves long wok autim tok. Olsem, em i ken stori long wanem taim stret yumi ken yusim wanpela ves, o kamapim insait bilong ves, o rot bilong yusim wanpela ves long toktok gut wantaim wanpela man. Sapos as bilong tok em long wanpela poin bilong wanpela lesen bilong buklet Laikim Ol Man, orait sumatin i mas fokas long olsem wanem yumi ken bihainim dispela poin long autim tok. Em i ken kamapim eksampel i stap long poin 1 bilong lesen o kamapim poin bilong ol narapela ves i stap long lesen, sapos i stret long givim helpim long odiens.

   12. Content: Ol tok long dispela paragraf na neks paragraf i stori long pasin bilong mekim asainmen long hap “Kirapim Toktok” na “Gobek.” Sapos i no gat sampela daireksen long mekim long dispela tupela asainmen, orait mak sumatin i mas inapim long dispela tupela asainmen em long kamapim wanpela simpol tok i tru bilong Baibel we i stret wantaim man o meri husat em i toktok wantaim na stretim rot bilong kam bek gen na toktok wantaim em. Sumatin i mas makim wanpela topik we i stret tru na ol man long teritori i tingting long dispela topik. Sumatin i ken makim sapos em bai soim wanpela pablikesen o vidio long Ol Tul Bilong Skulim Man. Sumatin i mas soim pasin bilong em long toktok gut wantaim man, olsem pasin bilong tingim tru man na toktok long pasin bilong em yet. I gutpela sumatin i no mekim soim long pasin i olsem em i tingim tingim olgeta wan wan tok em bai mekim kain olsem em raitim long pepa.

   13. Setting: Sumatin i mas mekim soim long setting we i stret long hap bilong yupela. Olsem:

1.  (1) Autim Tok Long Ol Haus: Dispela setting i makim ol rot olsem autim tok long wan wan haus—long bungim stret man, long fon, o long raitim pas—na mekim gobek long wanpela husat sumatin i bin bungim pastaim na toktok long rot bilong autim tok long wan wan haus.

2.  (2) Autim Tok Long Kain Kain Taim na Ples: Dispela setting i makim olsem sumatin i painim kain kain rot we i op long toktok wantaim wanpela long ol nomol samting na bihain rot i op long autim tok. Dispela inap makim olsem sumatin i kamapim wanpela tok bilong Baibel long man em i bungim long wok, skul, long man i stap klostu long haus bilong sumatin, o long PMV samting, o long narapela hap we sumatin i mekim sampela wokaubaut o wok bilong em yet long olgeta de.

3.  (3) Autim Tok Long Pablik Ples: Dispela setting i ken makim autim tok yusim cart, visitim ol manmeri long ples wok bilong ol, autim tok long rot, o autim tok long ol ples malolo, hap bilong putim kar, o long wanem wanem hap ol manmeri i stap.

 14. Yusim Ol Vidio na Pablikesen: Sapos i stret long situesen, sumatin i ken soim wanpela vidio o pablikesen. Sapos asainmen bilong sumatin i tok em mas soim vidio o sapos em yet i makim long soim vidio, em i mas mekim olsem em pilaim vidio na bihain stori long dispela vidio tasol no ken pilaim vidio long soim.

15. Bihain long singsing, i gat 15 minit bilong dispela hap ol bai kamapim wanpela o tupela hap bilong helpim odiens long bihainim Tok Bilong God. Sapos wok buk i no makim husat i mas mekim dispela tok, orait wanpela elda o kongrigesen sevan husat inap givim gut tok i ken lukautim dispela hap. Tasol wanpela elda i mas mekim hap tok bilong helpim kongrigesen. Sapos wanpela hap em bilong askim na bekim, brata i lukautim dispela hap i ken tromoi ol narapela askim em yet i kamapim wantaim ol askim stret i stap. Kirap bilong tok bilong em i no ken longpela tumas na bai i gat taim long karamapim gut ol mein poin na bilong odiens i ken insait tu long bekim. Sapos i gat wok long intaviu long pablisa, orait sapos inap, i gutpela moa pablisa i stap long stes na i no sindaun long sia bilong em namel long odiens.

  16. Baibel Stadi Bilong Kongrigesen: 30 minit. Ol i mas makim wanpela elda i winim mak long mekim dispela hap. (Sapos ol i no gat planti elda, ol i ken givim dispela asainmen long ol kongrigesen sevan husat inap mekim gut wok tisa.) Lain elda i mas skelim husat i winim mak bilong lukautim Baibel Stadi Bilong Kongrigesen. Ol brata i kisim tok orait long mekim, ol i mas inap long lukautim dispela stadi long pasin i gat savetingting bambai ol i ken mekim stadi insait long taim ol i bin makim na no ken kalapim dispela taim, na kamapim klia ol skripsa i stret long dispela stadi, na helpim olgeta long pilim tru gutpela helpim ol inap kisim long ol tok bilong stadi. Ol dispela brata bai painim sampela gutpela stiatok bilong helpim ol long ol buk samting i toktok long pasin bilong lukautim ol hap i gat askim na bekim. (w23.04 p. 24, boks) Sapos brata i karamapim gut olgeta hap bilong stadi long dispela wik, orait i no gat wok long pulim stadi i go yet. Sapos inap, olgeta wik kongrigesen i ken yusim narapela narapela brata bilong lukautim stadi na ritim paragraf. Sapos siaman bilong Kristen Laip na Wok Autim Tok i toksave long sotim stadi, orait brata i lukautim i mas skelim olsem wanem em i ken sotim. Ating em bai ­makim olsem ol bai no ritim sampela paragraf.

17. Em 3 minit. Siaman bilong Laip na Wok Autim Tok Miting bai mekim riviu long sampela gutpela poin bilong miting. Em i mas kamapim tu sampela hap bilong miting we bai kamap narapela wik. Na sapos i gat taim, em i ken kolim nem bilong ol sumatin bilong narapela wik. Sapos ol i no bin makim narapela samting, orait siaman i mas mekim ol toksave bilong kamapim, na ritim ol pas long kongrigesen em i mas ritim taim em i mekim ol tok bilong pinisim miting. I no gat wok long mekim toksave antap long stes long ol infomesen em yumi save bihainim olgeta taim, kain olsem sediul bilong wok autim tok na bilong klinim Haus Kingdom; ol dispela kain toksave ol brata i ken putim tasol long notisbot. Sapos i gat sampela toksave o pas bilong ritim na siaman i no inap mekim insait long hap taim ol i bin makim bilong mekim ol tok bilong pinisim miting, orait siaman i mas askim ol brata i mekim ol tok long hap bilong miting Bihainim Pasin Kristen, long sotim hap bilong ol. ( Lukim paragraf 16 na  19.) Bilong pinisim miting, mekim singsing na beten.

18. Taim ol wan wan sumatin i mekim pinis asainmen bilong ol, siaman bilong Laip na Wok Autim Tok Miting i gat olsem 1 minit long givim tok amamas na sampela tok kaunsel long sumatin, olsem i stap stadi poin. Taim siaman i singautim wanpela sumatin long mekim asainmen bilong em, em bai kolim poin bilong stadi em sumatin i wok long en. Tasol bihain sumatin i mekim pinis hap bilong em na em i kisim pinis tok amamas, orait siaman i ken tokaut long stadi poin na stori long wai na sumatin i bin mekim gutpela wok long dispela poin bilong stadi, o long gutpela pasin isi em i ken tokim sumatin long wai na olsem wanem em i ken wok yet long stretim dispela samting. Siaman inap toktok tu long sampela samting moa bilong dispela soim sapos em i ting dispela bai helpim sumatin o odiens. Siaman i ken givim sampela moa gutpela kaunsel em buklet Laikim Ol Man, Skulim Man o buk Skul Tiokratik Bilong Autim Tok i as bilong en bihain long miting o long narapela taim. Siaman i ken givim tok long stadi poin sumatin i wok long en o narapela stadi poin.—Bilong kisim sampela moa infomesen long wok bilong siaman bilong Laip na Wok Autim Tok Miting na wok bilong namba tu brata bilong givim tok kaunsel, lukim  paragraf 19,  24, na  25.

19. No ken abrusim taim, na toktok bilong siaman bilong Laip na Wok Autim Tok Miting i no ken kalapim ol minit bilong en. I tru Kristen Laip na Wok Autim Tok Miting Wok Buk i kamapim klia minit bilong wan wan hap, tasol sapos ol lain i gat hap i karamapim gut hap bilong ol, orait i no gat wok long kamapim sampela moa infomesen bilong inapim minit bilong dispela hap. Sapos wanpela i gat hap long miting i kalapim minit bilong en, orait, siaman bilong Kristen Laip na Wok Autim Tok o namba tu brata bilong givim tok kaunsel i mas givim sampela kaunsel wantaim husat i kalapim minit bilong em . (Lukim  paragraf 24 na  25.) Miting olgeta, na tu, singsing na beten, i mas kamap insait 1 aua na 45 minit.

20. Taim wasman sekit i go lukim kongrigesen, ol i mas mekim program bilong kongrigesen olsem i stap long Laip na Wok Autim Tok Miting Wok Buk, tasol i gat sampela senis olsem: Dispela 30 minit Sevis tok bilong wasman sekit bai kisim ples bilong Baibel Stadi Bilong Kongrigesen long hap bilong Bihainim Pasin Kristen. Paslain long sevis tok, siaman bilong Laip na Wok Autim Tok Miting bai mekim riviu bilong miting na stori liklik long miting bilong wik antap, na mekim ol toksave, ritim ol pas, na em bai singautim wasman sekit long mekim tok. Bihain long sevis tok, wasman sekit bai pinisim miting long wanpela singsing em yet i makim. Em i ken makim narapela brata long pinisim miting wantaim beten. Sapos i gat ol namba tu klas long tok ples bilong kongrigesen, ol i no ken mekim long taim wasman sekit i visitim kongrigesen. Grup bilong narapela tok ples i ken mekim miting bilong ol, maski wasman sekit i mekim visit long kongrigesen. Tasol grup i mas bung gen wantaim kongrigesen bilong harim sevis tok bilong wasman sekit.

21. Long wik bilong kibung sekit o rijinel kibung, bai no gat ol miting bilong kongrigesen. Rimaindim kongrigesen olsem wan wan yet o famili i ken skelim hap bilong ol miting bilong dispela wik.

22. Taim Memorial i kamap long wanpela de namel long wik, bai i no gat Laip na Wok Autim Tok Miting.

23. Wanpela elda em lain elda i makim, em bai stap wasman bilong Laip na Wok Autim Tok Miting. Em i gat wok long stretim gut ol samting bambai miting i ken wok gut na olgeta samting i kamap stret wantaim ol dispela instraksen bilong mekim miting. Em i mas toktok gut wantaim namba tu brata bilong givim tok kaunsel. Taim kongrigesen i kisim pinis Laip na Wok Autim Tok Miting Wok Buk, orait wasman bilong Laip na Wok Autim Tok Miting bai makim ol pablisa husat bai mekim wan wan hap insait long dispela tupela mun. Dispela i makim ol hap we i no bilong ol sumatin long mekim na ol siaman bilong miting namel long wik em lain elda i tok orait long ol, na tu, hap em ol sumatin bai mekim. (Lukim  paragraf 3-16 na  24.) Taim em i laik givim asainmen long ol sumatin, em i mas tingim krismas bilong sumatin, save em i gat, na em i fri long toktok long dispela poin long asainmen. Na wasman i mas tingim tu ol dispela samting taim em makim ol brata long lukautim ol narapela hap bilong miting. Ol i mas givim asainmen long olgeta wan wan inap 3-pela wik paslain long det bilong asainmen. Ol sumatin i mas kisim ol asainmen long fom Kristen Laip na Wok Autim Tok Miting Asainmen (S-89). Wasman bilong Laip na Wok Autim Tok Miting i mas putim kopi bilong sediul bilong asainmen bilong olgeta miting long notis bot. Lain elda i ken makim narapela elda o kongrigesen sevan long helpim em. Tasol ol elda tasol inap makim husat inap mekim ol hap we i no bilong ol sumatin long mekim.

24. Long olgeta wik, wanpela elda bai stap siaman bilong Laip na Wok Autim Tok Miting. (Sapos ol i sot long ol elda, ol i ken makim sampela kongrigesen sevan husat inap mekim gut wok tisa.) Em i gat wok long redim ol tok bilong kirapim miting na ol tok bilong pinisim miting. Na em bai singautim olgeta brata bilong mekim ol hap bilong miting, na sapos lain elda i no planti, ating em bai lukautim sampela hap bilong miting, moa yet long hap we i gat vidio bilong lukim na i no gat wok long stori long en. Mekim sotpela tok tasol namel long ol hap bilong miting. Lain elda bai skelim wanem ol elda i winim mak bilong mekim wok siaman. Ol elda i winim mak ol bai mekim wok siaman long taim sediul i makim ol. Sapos i no gat planti elda, ating ol bai makim wasman bilong Laip na Wok Autim Tok Miting long i stap siaman inap planti taim, winim ol narapela elda i winim mak. Sapos wanpela elda i winim mak bilong lukautim Baibel Stadi Bilong Kongrigesen, yumi ken ting em i winim mak bilong i stap siaman bilong miting. Plis tingim gut olsem elda i mekim wok siaman, em i gat wok long givim gutpela tok amamas, na sapos i gat wok em mas givim tok kaunsel bilong helpim ol lain husat i bin kisim asainmen bilong sumatin. Na siaman i gat wok tu long was gut na bai miting i pinis long taim stret. (Lukim  paragraf 17 na  19.) Sapos siaman i laik, na sapos i gat spes, ol i ken putim long pletfom wanpela maikrofon i save sanap na bai em i ken tokaut long ol wan wan hap bilong miting taim brata bilong mekim tok i kam sanap long hap bilong em long mekim tok. Na sapos siaman i laik, em i ken sindaun long tebol long pletfom long taim bilong sumatin long mekim Baibel Ritim na long hap bilong miting Mekim Wok Autim Tok. Dispela bai mekim na ol minit i no lus nating.

25. Sapos inap, i gutpela long makim wanpela elda i gat save pinis long mekim tok na em i ken mekim dispela wok. Wok bilong namba tu brata bilong givim tok kaunsel i olsem: Sapos i gat wok long mekim, em i mas givim tok kaunsel bihain long miting long ol elda na kongrigesen sevan husat i bin lukautim hap bilong miting. Em bai givim dispela kaunsel long ol brata i bin mekim tok long Laip na Wok Autim Tok Miting, pablik tok, na lukautim o ritim ol paragraf long Stadi Wastaua o long Baibel Stadi Bilong Kongrigesen. (Lukim  paragraf 19.) Sapos i gat sampela elda long kongrigesen ol i save gut long mekim tok na skulim ol man, orait long olgeta yia ol i ken makim narapela narapela elda i winim mak na bai em i stap namba tu brata bilong givim tok kaunsel long wan wan yia. I no gat wok long dispela brata long givim tok kaunsel olgeta taim long ol brata bihain long ol i mekim hap bilong ol.

26. Sapos ol sumatin i planti liklik, ol kongrigesen i ken wokim namba tu klas bilong ol sumatin. Wan wan namba tu klas i mas i gat wanpela brata husat i winim mak bilong givim tok kaunsel, na i ­gutpela sapos inap em wanpela elda. Sapos nogat, ol i ken givim dispela wok long wanpela kongrigesen sevan husat i ken mekim gut dispela wok. Lain elda bai skelim husat inap mekim dispela wok, na asainmen bai senis senis o nogat. Brata bilong givim tok kaunsel i mas bihainim pasin bilong mekim ­dispela wok olsem i stap long  paragraf 18. Sapos i gat namba tu klas, ol i mas askim ol sumatin long go long rum bilong namba tu klas bihain long hap Mekim Wok Painimaut, insait long hap bilong miting Gutpela Save i Kam Long Baibel. Ol i mas i kam bung gen wantaim kongrigesen bihain long laspela sumatin i mekim hap bilong em long miting.

27. Ol bai makim sampela vidio bilong yusim long dispela miting. Ol inap painim ol vidio bilong miting bilong namel long wik long JW Library^® app na bilong pilaim ol dispela vidio, ol i ken yusim ol mobail fon masin samting..

© 2023 Watch Tower Bible and Tract Society of Pennsylvania

S-38-MP 11/23