Long sevis yia bilong 2021, a ol manmeri long graun olgeta i karim hevi bilong COVID-19 pendemik. Olsem atikol “Global Relief for a Global Pandemic” i tok, yumi tromoi planti milion dola b long helpim ol man i karim hevi bilong pendemik na kamapim winim 950 Disasta Rilif Komiti.

 Pendemik i wok long putim hevi long ol manmeri, na tu, ol netrol disasta na ol disasta em ol man yet i kamapim i putim hevi long ol bratasista bilong yumi long graun olgeta. Bilong lukluk long winim 200 bilong ol kain disasta, Komiti Bilong Ol Kodineta bilong Gavening Bodi i tok orait long yusim 8 milion dola wantaim rilif wok ol i kamapim bilong helpim ol lain i karim hevi bilong COVID-19. Lukim hau mipela i yusim ol donesen yu givim bilong helpim ol lain i bungim hevi long 2-pela disasta i kamap i no longtaim i go pinis.

 Long Me 2, 2021, Maunten Nyiragongo, wanpela volkeno long Demokratik Ripablik Bilong Kongo i pairap. Lava i kamaut long volkeno i bagarapim ol haus, ol skul, na wanpela bikpela dem. I no lava tasol i kamapim bagarap. Planti de bihain long volkeno i pairap, das nogut bilong volkeno i pundaun antap long taun Goma na planti liklik guria i bin kamap. Winim 50 pesen bilong ol manmeri long dispela taun i mas lusim dispela ples. Planti handret tausen manmeri i ranawe, sampela i krosim boda na go long Ruanda.

 Namel long ol manmeri i lusim dispela taun em klostu 5 tausen Witnes Bilong Jehova. Sampela bilong ol em haus bilong ol i bagarap taim volkeno i pairap; ol narapela em ol raskol i kam na stilim ol samting long haus bilong ol taim ol i ranawe. Ol rilif komiti long Ruanda na Demokratik Ripablik Bilong Kongo i oganaisim rilif wok. Kongo (Kinsasa) brens i stori long wanpela rilif komiti olsem: “Maski bikpela hevi i kamap long taun na paslain long ol manmeri i kisim toksave long lusim taun, komiti i kirap pinis long tilim kaikai, wara, ol betsit, na ol klos.” Long wanpela taun we winim 2,000 bratasista bilong yumi i go stap long en, wanpela rilif komiti i sanapim ol haus sel, ol i tilim ol mask, na ol i stori gut long rot bilong abrusim sik COVID-19 na kolora.

 Insait long 3-pela mun bihain long disasta i kamap, ol brata bilong yumi i tilim rais em hevi bilong en winim 6 ton, plaua em hevi bilong en 6 ton, oil bilong kukim kaikai em hevi bilong en 3 ton, na wara em hevi bilong en 3 ton. Bilong seivim mani, brens i stretim rot long baim planti kaikai long asples na i no gat wok long odaim ol ekspensiv kaikai long narapela kantri.

 Wanpela sista em nupela haus bilong em i bagarap taim volkeno i pairap, em i tok, “Mipela i bel hevi nogut tru.” Tasol famili bilong em i kisim helpim long sait bilong skin na bilip tu. Nau em i tok: “Jehova i helpim mipela na mipela i kisim ol samting mipela i nidim. Mipela i lukim olsem Jehova i karim hevi bilong mipela na hevi i no daunim mipela.”

 Veneswela i karim bikpela hevi long sait bilong ekonomi inap planti yia. Ol bratasista long dispela kantri i karim planti hevi, ol i sot long kaikai, na pasin raskol i kamap bikpela tru. Maski i olsem, oganaisesen bilong Jehova i helpim ol.

 Long las sevis yia, yumi tromoi winim 1.5 milion dola long baim na trenspotim ol kaikai na sop i go long ol famili i sot long ol samting. Veneswela brens i tok: “Em i no isi long trenspotim kaikai em hevi bilong en 130 ton i go long 4-pela kona bilong kantri long olgeta mun na tilim long ol bratasista i sot long kaikai.” Bilong kaikai i no ken bagarap, planti taim ol brata i salim ol kaikai we bai stap longpela taim. Brens i tok: “Mipela i save baim planti kaikai tru na long sisen we dispela kaikai i redi na taim pe bilong en i no antap. Bihain mipela i trenspotim kaikai long rot we mipela i seivim bikpela mani.”

 Leonel em i insait long Disasta Rilif Komiti long Veneswela na em i laikim tru asainmen bilong em. Em i tok: “Rilif wok em spesel wok. Dispela gutpela wok i strongim mi tru kirap long taim meri bilong mi i dai long sik COVID-19. Mi bisi tru na mi pilim olsem mi inap mekim planti wok bilong helpim ol wanbilip i sot long ol samting. Mi lukim stret hau Jehova i truim tok promis bilong em long em i no inap givim baksait long ol manmeri bilong em.”

 Wanpela brata husat i kisim helpim i bin insait long wanpela rilif komiti long pastaim. Em i tok: “Nau em taim bilong mi long kisim helpim. Mipela i kisim ol samting bilong skin na i no dispela tasol. Ol brata i helpim mi na meri bilong mi long stap bel isi. Ol i lukautim mipela, mekim gut bel bilong mipela, na strongim mipela.”

 Sampela disasta i save kamap wantu tasol o taim yu no ekspektim. Tasol oganaisesen bilong Jehova i save kisim na tilim ol saplai hariap tru bikos long ol donesen yupela i givim bilong sapotim wok i kamap long olgeta hap bilong graun. Sampela rot bilong givim donesen i stap long donate.pr418.com. Mipela i laik tok tenkyu long ol donesen yu givim.