Wanpela samting ol Witnes Bilong Jehova i bin luk fowed tru long lukim long dispela yia em Episod 1 bilong Gutnius Bilong Jisas. Planti milion manmeri i lukim pinis. Dispela em namba 1 episod bilong 18 episod! Ol bratasista i mekim wanem ol samting bilong sapotim projek bilong wokim dispela vidio siris, na hau yu bin sapotim dispela wok?

 Planti hap bilong vidio Gutnius, ol i kisim long Australia na inap olsem 50 i go 80 manmeri i save stap long ples bilong kisim vidio. a Ol bratasista i save redim kaikai na ol bisket samting long belo, apinun, na moning. Ol i makim pinis wanem ol kaikai bilong kaikai paslain long ol i redim. Esther em sista i wok long Food Service Department i tok: “Mipela i baim kaikai long narapela narapela kampani bambai mipela ken kisim ol gutpela kaikai long gutpela prais. Na oltaim mipela senisim stail bilong kukim kaikai na bai mipela i no westim nating kaikai.” Wan wan de wanpela man i kisim kaikai inap long mak bilong K16.

 Ol lain bai ektim dispela drama i no nidim tasol kaikai, ol i nidim tu ol man long was long ol. Was long ol long wanem samting? San bilong Australia i mekim ples i hat na skai em klia, tasol mak bilong strong bilong lait bilong san i antap moa. Bilong lukautim olgeta long hat bilong san na bai ol i no ken hot, ol bratasista redim ol haus sel na ol ples we bilong sindaun malolo long en, na ol i save redim pinis ol krim bilong lukautim bodi long lait bilong san, ol ambrela, na ol kol wara. Kevin i wok wantaim Audio/Video Services i stori olsem: “Planti bilong ol dispela bratasista em ol i slip long haus bilong ol yet na ol i save kam wok long Betel. Ol i daunim laik bilong ol yet na ol i amamas long mekim ol dispela wok. Mipela i pinisim dispela projek wantaim helpim bilong ol.”

 Sampela hap bilong vidio bai i no luk olsem long taim bilong Jisas maski ol i kisim vidio long studio o long wanpela hap long brens we ol i wokim bilong kisim dispela vidio. Long kain taim olsem, ol i muv i go long narapela hap. Bilong kisim wanpela vidio we bai i luk olsem long taim bilong ol man i raitim Baibel we i no gat pawa lain, rot i gat kolta, na ol stail haus bilong nau, ol ekta na ol kru i mas i go long ol ples i stap longwe. Ol i mas pekim gut olgeta klos, tebol na kamera samting na kisim i go long ples bilong kisim hap bilong vidio. Paslain long ol i kirap long kisim vidio, helpim bilong prodaksen kodineta bai sekim sapos ol jenereta, klinpela wara, na ol toilet samting em redi pinis. Ol ekta na ol kru i slip long haus bilong ol asples Witnes, long ol trela, o long ol hotel na ol liklik haus.

 Bilong i go long longwe hap bilong kisim vidio, dispela i save kisim bikpela taim, strong, na bilong ol lain husat i mas go bilong kisim dispela vidio. So, long 2023, Gavening Bodi i tok orait long baim vidio wol bilong soim vidio long bekgraun, em mani mak bilong en i winim 9 milion kina. Dispela teknoloji i gat vidio skrin we ol piksa i kamap em klia tru na lait we i wankain long lait bilong vidio i kamap long skrin na bai i luk olsem ol i bin kisim stret wanpela vidio. Long dispela rot, yumi no tromoi bikpela mani long go long wanpela longwe ples bilong kisim tasol wanpela hap bilong vidio. Darren em brata i mekim wok long Brens Komiti Bilong Australasia i tok: “Vidio wol i helpim na ol ekta i no kisim taim long san, na tu, ol brata inap kisim wanpela hap bilong vidio planti taim. Kain olsem, sapos yu stap ausait na kisim vidio, yumi bai i gat sampela minit tasol long kisim vidio bilong san i go daun paslain long san i hait. Tasol wantaim vidio wol, yumi inap wokim gen piksa bilong san i go daun inap planti taim tru inap long yumi kisim wanpela we i stret long yusim.”

 Ol i nidim planti ekta na planti moa kru long wan wan episod bilong siris Gutnius. Ol i pilim olsem wanem long ol samting ol brata i mekim bilong lukautim ol?

 Amber i lusim haus bilong em long Melbourne na flai long balus inap 435 mail bilong i go sapotim dispela projek, em i tok: “Taim mi go kamap long ples balus, ol brata long Betel i lukautim mi gut. Planti bratasista long Betel i invaitim mi long kaikai o dring ti wantaim ol. Long ples bilong kisim vidio, olgeta i mekim mi pilim olsem ol i laikim mi na mi no tingting planti. Mi kisim planti blesing long dispela raun bilong mi. Mi pilim olsem mi yet i no givim wanpela samting!”

 Derek i wok wantaim prodaksen tim. Em i tok: “Planti dipatmen i sapotim mipela kirap long stat bilong dispela projek. Mi amamas tru olsem mi gat ol bratasista husat i givim taim, strong, na ol samting ol i gat bilong sapotim dispela projek. Ol i gat pasin bilong givim sapot, redi long wok, na pasin helpim. Tru tumas Jehova i blesim ol na mipela tu. Mi bilip olsem em i tingim hau mipela i wokim dispela vidio na vidio i kamap olsem wanem.”

 Tenkyu long sapot yupela i givim long dispela vidio siris long rot bilong donesen, na tu, donesen yupela givim long rot bilong jw.org.