Long dispela taim bilong las de, yumi bai “harim tok long ol woa i kamap klostu na ol woa i kamap longwe.” (Matyu 24:6) Maski i olsem, taim ol brata bilong yumi i karim hevi bikos long ol dispela woa, ol i kisim helpim ol i nidim. Dispela 2022 Gavening Bodi Apdeit #3 i bin stori long rilif wok i kamap long Isten Yurop bilong helpim ol bratasista i karim hevi bilong woa i wok long kamap long Yukren. Hau ol brata long dispela hap i mekim rilif wok maski woa i kamap long hap bilong ol? Dispela rilif wok i mekim wanem long ol brata bilong yumi long Yukren?

 Long Februeri 24, 2022—em long dispela de woa i kirap long Yukren—Komiti Bilong Ol Kodineta i tok orait long wanpela rilif baset bilong helpim ol bratasista long Yukren. Wantu Yukren brens i stat long baim ol saplai insait long kantri bilong ol na ol i tilim long rot bilong 27 Disasta Rilif Komiti em ol i bin makim.

 Bilong givim sampela moa helpim, ol brata long Wol Hetkota Bilong Ol Witnes Bilong Jehova i traim long luksave long wanem helpim ol i ken givim long ol brata long Yukren. Komiti Bilong Kodineta na Pablising Komiti Bilong Gavening Bodi i askim Global Purchasing Dipatmen long wok wantaim ol brata em ol i makim ol long ol brens ofis long Yukren na Polan long painimaut wanem helpim ol i ken givim na wokim plen long hau long givim helpim. Ol brata long Purchasing, Siping, na Ligol dipatmen long ol wan wan brens, wanpela brata bilong Yukren Brens Komiti, na ol brata bilong Global Purchasing Dipatmen i bung long olgeta wan wan de bilong oganaisim dispela rilif wok.

 Jay Swinney i wok long Global Purchasing Dipatmen, na em i tok: “Namba 1 samting em mipela mas luksave long wanem ol saplai ol bratasista bai nidim. Mipela i laik tilim ol kaikai na sop samting em ol asples bratasista i save yusim. So em wanpela hatwok mipela i bungim long save long ol samting ol brata i nidim, tasol i gat narapela hatwok. Mipela i mas painimaut hau long salim ol dispela saplai i go long Yukren long taim bilong woa long rot we i seif na ol inap kisim kwiktaim.”

 Long Mas 9, 2022, ol brata i luksave long ol samting em ol brata long Yukren bai nidim. Ol i salim ol boks kaikai olsem tinmit na tinpis, ol wit, rais, na ol bin, na tu, ol i salim sop na toilet pepa samting long ol. Long dispela taim, ol brata i luksave olsem ol bai tromoi olsem 65 dola bilong Amerika long wan wan man bilong kisim saplai ol inap yusim insait long 4-pela wik. Komiti Bilong Ol Kodineta i luksave olsem planti tausen brata bai nidim ol saplai, so ol i tok orait long yusim bikpela mani bilong baset long mekim dispela rilif wok. Tasol hau bai ol brata i bringim ol dispela saplai i go long ol brata long Yukren long seif wei na ol i no kisim bagarap?

 Long Mas 13, 2-pela brata long Polan i mekim prektis long bringim ol saplai long Polan brens ofis i go long wanpela wea-haus klostu long Lviv, Yukren. Long ol de paslain long tupela i go, ol brata long brens long Polan na Yukren i helpim dispela 2-pela brata long redim ol yet long mekim dispela wok. Brens ofis i stretim ol ligol dokiumen em 2-pela brata bai nidim bilong kisim tok orait long mekim rilif wok, na ol trak ol i draivim i gat ol sain i soim klia olsem ol i mekim rilif wok, na brens ofis i wok wantaim ol asples brata long Yukren long lukim wanem rot 2-pela brata i ken bihainim taim ol i krosim boda bambai ol i ken go kamap hariap. Ol brata i redi gut na Jehova i blesim wok bilong ol, na dispela 2-pela brata i bringim ol saplai i go long ol Disasta Rilif Komiti insait long 24 aua taim ol i go kamap long Lviv, na 2-pela brata bilong yumi i go bek long Polan na ol i seif.

 Maski ol brata i bringim ol saplai i go festaim na ol i kamap gut, hevi bilong saplai ol i bringim i go i no winim 1-pela ton bilong Amerika. Ol i mas bringim i go saplai em hevi bilong en inap 220 ton bilong Amerika! Hau ol bai trenspotim na tilim planti saplai tru na mekim olsem kwiktaim?

 Ol manmeri long olgeta hap bilong graun i ritim ol ripot long jw.org olsem ol brata i karim hevi bikos long woa i kamap long Yukren, na dispela i kirapim ol long givim helpim. Planti em ol i stap longwe i givim mani olsem donesen bilong sapotim wok bilong ol Witnes Bilong Jehova i kamap long olgeta hap bilong graun, na ol i save donesen ol i givim bai mekim gutpela wok. Ol narapela em ol i stap long ol kantri i serim boda wantaim Yukren, ol i yusim taim, strong, na ol samting ol i gat long givim helpim. Hia em sampela eksampel.

 Long Polan, planti volantia i amamas long redim planti tausen rilif boks i gat ol saplai long en, na ol pikinini i droim ol kat. Bartosz Kościelniak em wanpela brata bilong Purchasing Dipatmen long Polan brens, em i tok: “Planti taim mi ritim tok bilong Buk Song 110:3, em i tok ‘ol manmeri bilong [Jehova] bai amamas long go wantaim yu na helpim yu.’ Tasol taim mi lukim long ai bilong mi yet sapot ol narapela i givim, na planti handret volantia i redi long kam na wok, nau mi lukim stret truim bilong dispela ves.”

 Wanpela Witnes Bilong Jehova i gat wanpela intenesenel kampani we i save helpim ol narapela kampani long trenspotim ol samting, em i donetim ol trak bilong em na petrol tu long ronim ol trak, em i tok: “Mi tingim dispela olsem rot mi ken soim pasin laikim bilong mi long ol brata na long Jehova. Mi amamas long givim helpim.” I luk olsem dispela brata i donetim winim 7,700 lita petrol, na ol brata i yusim taim na strong bilong ol long draiv longwe inap olsem 48,000 kilomita bilong bringim ol saplai i go!

 Ol bratasista i redi na amamas long wok, olsem na long Mas 28—15 de bihain long ol i bringim fes saplai i go—ol brata i bringim i go long Yukren ol kaikai, ol sop samting, na ol medikal saplai em hevi bilong olgeta dispela saplai inap 110 ton bilong Amerika! Ol bratasista na ol saplaia i donetim planti samting, olsem na mani ol i basetim long baim ol dispela saplai i go daun tru, em mani ol i kisim long rot bilong ol donesen. Ol Witnes Bilong Jehova i salim i go long Yukren ol saplai em hevi bilong en inap 209 ton bilong Amerika. Olsem wanem ol dispela saplai i helpim ol brata bilong yumi?

 Taim ol rilif boks i kamap long Lviv, ol Disasta Rilif Komiti long olgeta hap bilong Yukren i tilim i go long ol manmeri i nidim. Ol i salim ol dispela boks i go long planti taun, sampela bilong ol dispela taun i stap longwe long Lviv winim 1,300 kilomita. Ol i mekim gut dispela wok, tasol sampela haptaim i bin lus long mekim olsem. a

 Markus Reinhardt, em wanpela memba bilong Yukren Brens Komiti i tok: “Long dispela taim bilong hevi, planti brata i lukim stret pasin laikim bilong Jehova na helpim ol i kisim taim ol i bihainim gut daireksen i kam long oganaisesen bilong God, paslain tu long wanpela disasta i kamap. Olsem, ol brata i kirapim olgeta long lukautim saplai bilong kaikai na wara long haus bilong ol we ol i ken yusim insait long sampela wik. Wanpela elda long Kyiv, nem bilong em Anton, i stori long dispela daireksen ol i kisim na em i tok: ‘Oganaisesen bilong Jehova i redim mipela long taim bilong hevi, na mipela i tok tenkyu long dispela. Mipela i gat saplai bilong kaikai na wara na wanpela redio tu na dispela i seivim laip bilong mipela.’ Mipela i amamas tru olsem ol brata i givim bel long bihainim dispela daireksen bikos sampela haptaim i lus long brens ofis i ken oganaisim ol samting ol i nidim.”

 Ol brata bilong yumi i pilim olsem wanem taim ol i kisim ol saplai? Mykola na Zinaida i stap long Kharkiv, na ol i tok: “Mipela i pilim tru pasin bilong yupela long tingim mipela. Tenkyu tru long kaikai na marasin. Tru tumas, mipela i lukim han bilong Jehova long dispela rot.” Valentyna i stap tu long Kharkiv. Em i tok: “Taim woa i kirap, ol man i sanap long ol longpela lain long baim kaikai samting. Sampela taim i hatwok long baim ol samting mipela i nidim. Tasol Jehova i save na em i lukim dispela hevi. Em i makim ol brata long tilim ol rilif boks long ol haus, na em ol samting ol manmeri i nidim stret! Long kain taim bilong bikpela hevi, taim i luk olsem i no gat rot long kisim helpim, yu bai pilim tru na lukim stret hau Jehova na oganaisesen bilong em i lukautim yu long spesel wei. . . . Mipela amamas tru long kisim helpim na sapot bilong em long taim stret.”

 Yevhen, Iryna, na Mykyta, em ol i ranawe lusim Mariupol, ol i tok: “Mipela i laik tok tenkyu tru long yupela i tingim na sapotim famili bilong mipela. Tru tumas, helpim i kam long taim stret. Yu save, pastaim mipela i ting ol dispela boks i gat tasol ol saplai, tasol taim mipela i opim, mipela i luksave olsem ol i gat pasin laikim bilong yupela tu i stap long en!”

 Yes, yu ken lukim hau holi spirit bilong Jehova na daireksen bilong em i stiaim dispela rilif wok long taim “ol woa i kamap klostu na ol woa i kamap longwe.” Ol donesen yu givim long sapotim wok i kamap long olgeta hap bilong graun, em planti i givim donesen long rot bilong jw.org, dispela tu i helpim tru dispela rilif wok. Mipela i laik tok tenkyu tru long gutpela pasin bilong yupela!

Givim Helpim Kwiktaim na long Seif Wei

1. Februeri 24, 2022: Komiti Bilong Ol Kodineta i tok orait long wanpela rilif baset bilong helpim Yukren, dispela i opim rot long brens i ken givim helpim

2. Februeri 24–Mas 8, 2022: Yukren brens i baim ol saplai insait long kantri bilong ol na ol i tilim long rot bilong ol Disasta Rilif Komiti. Na tu, brens ofis i redi long kisim ol saplai i kam long Polan bilong tilim

3. Mas 9, 2022: Komiti Bilong Ol Kodineta i tok orait long mekim rilif wok long salim ol saplai i go long Yukren

4. Mas 10–12, 2022: Ol i wokim ol plen long mekim fes raun bilong bringim ol kaikai na ol saplai long Polan i go long Lviv, Yukren

5. Mas 13, 2022: Festaim ol i bringim ol kaikai na ol saplai long Polan i go long Lviv, Yukren

6. Mas 14–16, 2022: Long wanpela Haus Kibung klostu long Poznan long Polan, ol i oganaisim ol volantia long Lokol Disain/Konstraksen long stretim ol boks i gat ol kaikai na ol sop samting

7. Mas 17, 2022: Fopela de bihain long ol i mekim fes raun bilong bringim ol kaikai i go na ol i bin kamap gut, ol i bringim ol rilif boks i go long Yukren boda na hevi bilong ol dispela boks em 14 ton bilong Amerika

8. Mas 21–27, 2022: Ol i mekim wankain samting, ol i stretim ol rilif boks i stap yet long Polan na salim i go long Yukren na bihain ol i tilim long ol manmeri insait long 24 aua

9. Mas 28, 2022: Insait long 20 de stat long taim ol brata i givim tok orait, ol i salim i go long Yukren ol kaikai, ol sop samting, na ol medikal saplai em hevi bilong ol inap 110 ton bilong Amerika

 Ol Witnes Bilong Jehova i salim i go long Yukren ol saplai em hevi bilong en inap 209 ton bilong Amerika.