Nicole em wanpela yangpela sista long Kolambia, em i tok: “Mi laikim tru Haus Kingdom bilong mi! Em ples we mi ken stap wantaim famili bilong mi long sait bilong bilip.” Yu pilim olsem tu?

 Long olgeta hap bilong graun, ol Witnes Bilong Jehova i save bung long klostu 63,000 Haus Kingdom. Ol dispela bilding em ples we yumi ken go long en bilong lotuim God. Tasol ol i mekim sampela samting moa. David em wanpela painia oltaim long Kolambia, em i tok: “Ol Haus Kingdom bilong yumi i kirapim ol man long amamas long putim yau long ol tok yumi skulim ol long en. Planti visita i save kirap nogut long lukim hau yumi lukautim gut ol bilding.” Dispela samting i no kamap nating. Yumi save wok hat long klinim na stretim ol Haus Kingdom bilong yumi. Hau yumi mekim gut dispela wok?

 Em wok bilong ol kongrigesen long lukautim gut ol Haus Kingdom ol i yusim. Em risen na oltaim ol bratasista i save klinim Haus Kingdom bilong ol. Na tu, ol i save mekim meintenens na bai ol samting i no ken bagarap na ol i stretim tu sampela samting i gat liklik hevi long en.

 Bilong helpim ol kongrigesen long lukautim gut ol Haus Kingdom bilong ol, Lokol Disain/Konstraksen Dipatmen (LDC) i makim ol brata long givim meintenens trening long ol pablisa. Wan wan brata i givim meintenens trening i save lukautim inap olsem 6-pela i go 10-pela Haus Kingdom. Ol i save go visitim na trenim ol pablisa long ol kongrigesen long hau ol i ken lukautim gut Haus Kingdom bilong ol. Long olgeta 3-pela 3-pela yia, ol i save skelim wan wan Haus Kingdom bilong lukim sapos i gat sampela samting i bagarap em ol i mas stretim.

 Ol bratasista bilong yumi i amamas tru long meintenens trening ol i kisim long ol dispela brata. Indhumathi em wanpela sista long India, em i tok: “Dispela trening em nambawan tru. Mipela i amamas tru long lain long hau mipela i ken lukautim gut Haus Kingdom bilong mipela.” Evans em wanpela brata long Kenya, em i tok: “Mipela i lain long hau mipela i ken abrusim pasin bilong tromoi nating bikpela mani long rot bilong stretim ol liklik hevi paslain long ol i kamap ol bikpela hevi.”

 Long olgeta wan wan yia, mipela i mas tromoi inap olsem planti handret o planti tausen dola a bilong yusim na lukautim ol Haus Kingdom, na tu, mipela i save skelim lokesen Haus Kingdom i stap long en, ol i wokim Haus Kingdom long wanem yia, na hamas kongrigesen i yusim. Hau mipela i kisim mani bilong baim ol samting?

 Ol donesen mipela i kisim i sapotim wok bilong mekim meintenens long ol Haus Kingdom. Alexander em wanpela brata long Kasakstan, em i tok: “Mipela i yusim hap mani long baim Intenet ekses na wara na pawa samting. Hap mani i stap yet, mipela i yusim long baim ol samting olsem ol pepa-taul, ol hanglav, ol klining saplai, na peint.” Ekstra mani i stap yet, mipela i donetim bilong helpim wok i kamap long olgeta hap bilong graun—ol i yusim dispela mani long sapotim ol bikpela meintenens projek i kamap long ol narapela hap we ol i mas tromoi bikpela mani moa long mekim olsem.

 Sapos ol i mekim meintenens long wanpela Haus Kingdom na mani ol i yusim i winim mani ol brata i putim i stap bilong mekim meintenens long dispela Haus Kingdom insait long 2-pela o 3-pela mun, orait ol elda bai toktok wantaim LDC meintenens trena. Sapos lain LDC i tok orait long mekim dispela projek, orait ol bai yusim ol donesen bilong helpim wok i kamap long olgeta hap bilong graun long mekim dispela projek. Insait long 2023 sevis yia, ol i mekim 8,793 bilong ol dispela projek, na ol i tromoi olsem 76.6 milion dola. Skelim 2-pela bilong ol dispela projek.

 Long Angola, wanpela Haus Kingdom i bin stap 15 yia na i gat sampela hevi long en. Pawa i no wok moa na ol i mas stretim, ol wol i gat bagarap long en, na ol neiba i tok tu olsem wara i pulap na i ron i go insait long haus bilong ol. Lain LDC i oganaisim wanpela projek bilong stretim dispela hevi. Ol i tromoi 9,285 dola long dispela projek. Ol neiba i tok tenkyu, na ol i amamas long lukim ol brata i mekim gut wok.

 Long Polan, rup bilong wanpela Haus Kingdom i lik, na ol kapet i bagarap olgeta na ol i no inap stretim. Lain LDC i tok orait long wanpela projek bilong stretim dispela Haus Kingdom we ol i wokim rup we i no inap lik, na tu, ol i putim nupela kapet. Ol i tromoi 9,757 dola long dispela projek. Olsem na bai i no gat wok long ol i mekim bikpela wok bilong stretim gen dispela Haus Kingdom inap sampela yia bihain.

 Wok meintenens i opim rot long yumi inap seivim gut mani yumi kisim long rot bilong ol donesen, na tu, yumi inap preisim Jehova. Shaun em wanpela brata long Tonga, em i tok: “Wok meintenens i opim rot long yumi inap lotuim Jehova long klinpela Haus Kingdom we ol samting i stap stret na olgeta samting i wok gut, na dispela i kirapim ol manmeri long komiuniti long givim biknem long Jehova. Mipela i no save surik long invaitim ol manmeri long kam long Haus Kingdom bilong mipela.”

 Yumi olgeta i ken helpim wok bilong klinim na mekim meintenens long ol haus o ol bilding yumi yusim bilong lotuim Jehova. Marino em wanpela brata long Australia na em i save givim meintenens trening, em i tok: “Yumi olgeta i ken insait long dispela gutpela privilis yumi gat long lukautim ol Haus Kingdom bilong yumi. Taim yumi mekim olsem, yumi inap seivim bikpela mani tru em yumi kisim long rot bilong ol donesen na yusim long mekim ol narapela bikpela projek.”

 Joel em wanpela brata long India, em i save amamas long mekim wok meintenens long Haus Kingdom bilong em. Em i tok: “Taim mi wok wantaim ol brata bilong mi, dispela i helpim mi long piksaim long tingting laip bai olsem wanem long nupela taim bihain.” Nicole em yumi kamapim tok bilong em pinis, em i tok: “I no longtaim i go pinis, mi bin mopim floa taim ol brata i stretim paip long batrum i gat lik long en. Em tru olsem mi no stretim dispela hevi, tasol wok mi mekim i pasim ol narapela long pundaun o kisim bagarap.”

 Sapos yu laik volantia long helpim wok meintenens long Haus Kingdom bilong yu, orait toktok wantaim ol elda long kongrigesen bilong yu. Na tu, ol donesen yu givim i sapotim wok meintenens bilong Haus Kingdom bilong yu, na tu, ol narapela Haus Kingdom i stap long graun olgeta. Yu ken putim ol donesen long ol kontribiusen boks i stap long Haus Kingdom bilong yu o yu ken givim long rot bilong donate.pr418.com. Mipela i laik tok tenkyu tru long gutpela pasin bilong yu long givim donesen bilong sapotim ol wok.