HAU MIPELA I YUSIM OL DONESEN YU GIVIM
Mipela i No Lusim Tingting Long Ol Yaupas
JULAI 1, 2022
God Jehova i laik bai olgeta manmeri, maski ol i gat wanem kain sindaun, i kisim save long em na long Kingdom bilong em long heven. (1 Timoti 2:3, 4) Olsem na ol Witnes Bilong Jehova i wokim ol Baibel na ol buk na nius bilong Baibel long helpim planti manmeri, dispela i makim tu ol yaupas. Oganaisesen bilong mipela i wokim planti tausen pablikesen long rot bilong ol vidio bilong tokples sain, a em ol i stap long winim 100 tokples! Hau mipela i wokim na tilim ol dispela pablikesen? Na mipela i mekim wanem ol senis long ol yia i go pinis?
Hau Mipela i Wokim Ol Vidio Bilong Tokples Sain?
Ol trenslesen tim long olgeta hap bilong graun i wokim ol pablikesen bilong tokples sain. Ol wan wan insait long tim i save skelim gut ol pablikesen ol i mas trensletim. Bihain ol i save skelim olsem wanem ol inap kamapim gut dispela infomesen long tokples sain. Taim ol i mekim olsem pinis, ol i save rekodim dispela pablikesen long vidio. Long nau, i gat 60 fultaim tim i save trensletim ol buk na nius bilong Baibel i go long tokples sain, na i gat narapela 40 tim em ol i save mekim dispela wok olsem pataim.
Long bipo, ol i tromoi bikpela mani long wokim ol vidio bilong tokples sain. Pe bilong ol vidio kamera na lait samting i antap moa winim long nau. Na tu, mipela i save rekodim ol vidio long studio we mipela yet i bin wokim, sampela taim mipela i mas stretim gen wanpela bilding i stap pinis. Mipela i save spendim moa long 30,000 dola bilong Amerika b bilong redim olgeta samting bilong wanpela trenslesen tim bilong tokples sain.
Bilong yusim gut ol donesen, oganaisesen bilong mipela i wok hat tru long painim ol rot long mekim wok trenslesen i kamap gutpela moa na simpol. Olsem na long nau mipela i yusim ol kamera na lait samting we inap mekim gut wok na i no gat bikpela pe bilong en. I no gat wok long sampela trenslesen tim i yusim studio, ol i ken yusim grinpela bekgraun em ol i kolim grin skrin na rekodim ol vidio long ofis bilong ol. Taim i gat nid long planti lain bilong mekim sain, ol bratasista i ken rekodim hap ol bai sainim long pablikesen long ofis bilong ol o long haus bilong ol yet; i no gat wok long ol i go long studio.
Mipela i wokim tu ol program long kompiuta bilong helpim ol lain bilong mekim sain long mekim wok bilong ol. Kain ol gutpela senis i daunim olsem 50 pesen bilong haptaim ol trenslesen tim i lusim long wokim wanpela pablikesen bilong tokples sain. Ol bratasista bilong mipela i amamas long ol dispela gutpela senis. Wanpela brata nem bilong em Alexander, em i tok: “Long nau, ol i rilisim ol vidio bilong tokples sain planti taim moa winim long bipo. Mi amamas tru long dispela. Mi save lukim ol vidio long olgeta de.”
Long nau, mipela i spendim olsem 5,000 dola bilong redim wanpela trenslesen tim. Dispela i mekim na mipela inap wokim ol vidio bilong tokples sain long planti moa tokples.
Hau Mipela i Tilim Ol Vidio Bilong Tokples Sain?
Taim wanpela tim i pinisim rekoding bilong wanpela pablikesen bilong tokples sain, ol vidio i mas redi bilong ol manmeri i ken lukim. Long bipo, mipela i save wokim ol vidio kaset na ol DVD, tasol ol dispela samting i gat bikpela pe, bikpela haptaim i lus, na mipela i mas wok hat tru. Mipela i mas salim ol rekoding i go long wanpela kampani bilong wokim ol kopi. Na bihain, mipela i save sipim ol vidio kaset na ol DVD i go long ol kongrigesen. Long 2013 tasol, mipela i spendim moa long 2,000,000 dola bilong wokim ol DVD long tokples sain.
Ol yaupas i amamas tru long ol dispela blesing. Maski i olsem, em i no isi long yusim ol dispela vidio, moa yet taim namba bilong ol vidio kaset na ol DVD i go antap. Sampela taim, mipela i mas yusim planti DVD bilong rekodim wanpela buk bilong Baibel. Wanpela brata long Brasil, nem bilong em Gilnei, em i tok: “Taim mipela i laik ritim wanpela skripsa, mipela i mas painim rait vidio kaset na bihain painim dispela skripsa. Em i hatwok tru.” Wanpela sista nem bilong em Rafayane, em i save yusim ol DVD bilong tokples sain, em i tok: “Mi save pilim taiet long mekim pesenel stadi. Mipela i save lusim bikpela haptaim long painim ol skripsa o ol referens.” Na taim ol bratasista bilong mipela i autim tok, planti taim ol i save kisim ol vidio kaset na ol DVD i go wantaim ol, we ol i save pilaim long TV bilong wanpela man i laik harim tok. Sampela brata i save kisim ol DVD pleia bilong ol yet i go wantaim ol. Tasol i no longtaim, ol i wokim ol liklik DVD pleia i gat skrin em yu inap karim raun, na planti bratasista i yusim dispela. Bobby, em i stap long Amerika, em i tok: “Sapos yu stori long wanpela skripsa na yu laik stori long narapela, planti taim yu mas yusim narapela DVD. Dispela i kisim bikpela haptaim na mipela i no yusim tumas Baibel long toktok wantaim ol man.”
Long 2013, oganaisesen bilong Jehova i rilisim JW Library Sign Language aplikesen, we i opim rot long ol bratasista long daunlodim na pilaim ol vidio bilong tokples sain long ol smatfon na ol teblet bilong ol. Pastaim mipela i rilisim dispela aplikesen long Tokples Sain Bilong Amerika. Bihain long 2017, mipela i apdetim dispela aplikesen bilong sapotim olgeta tokples sain. Ol bratasista long olgeta hap bilong graun i amamas tru. Juscelino, wanpela brata long Brasil, em i tok: “Mi no inap bilipim! Mi wok long tingim tingim hau Gavening Bodi i soim pasin laikim long mipela ol yaupas na hau ol i laik mipela i kamap strong long bilip wankain olsem ol lain i save toktok. Mi amamas tru, na dispela aplikesen i kirapim mi long stadi moa long Baibel.”
Yusim JW Library Sign Language aplikesen
Long nau, mipela i save wokim olgeta vidio bilong tokples sain long rot bilong kompiuta samting na tilim long websait bilong mipela na long JW Library Sign Language aplikesen. Long dispela rot, mipela inap trensletim, rekodim, na tilim ol pablikesen bilong tokples sain insait long sampela de tasol, na i no insait long ol mun o ol yia. Na long planti tokples sain, ol i save rilisim ol pablikesen bilong tokples sain long wankain taim olsem ol pablikesen bilong ol narapela tokples.
Lukim tok em sampela yaupas bratasista bilong mipela i mekim. Wanpela sista nem bilong em Klízia, em i tok: “Wanem oganaisesen i save tingim tru ol yaupas na ol i redi long wokim ol pablikesen bilong strongim bilip bilong ol long rot we em isi tru long ol i kisim? No gat wanpela samting long dispela graun inap mekim samting em oganaisesen bilong Jehova i mekim bilong helpim mipela.” Vladimir i tok: “Ol dispela vidio i soim mi olsem Jehova i save tingim ol yaupas wankain olsem em i tingim ol lain i save harim.”
Planti taim, ol vidio bilong mipela long tokples sain i save mekim dispela tok: “Mipela i wokim dispela buklet bilong helpim ol man bilong olgeta hap long kisim save long Baibel, na ol man i save givim mani long laik bilong ol yet bilong helpim dispela wok.” Mipela i tenkyu tru long ol donesen yu givim, planti taim yupela i givim donesen long rot bilong donate.pr418.com. Ol dispela donesen i helpim mipela long wokim ol Baibel na ol buk na nius bilong Baibel long helpim olgeta manmeri, dispela i makim tu ol lain i mekim tokples sain.