Long Janueri 2021, lain Gavening Bodi i toksave olsem ol i rilisim nupela buk bilong stadi, em buk Stap Amamas Oltaim! a Yu pilim olsem wanem taim yu harim dispela toksave? Matthew i stap long Kanada, na em i tok: “Mi amamas tru! Na amamas bilong mi i go bikpela moa taim mi watsim ol tok na ol vidio i stori long risen na ol i wokim dispela pablikesen na hau ol i bin mekim traim long en. Mi laik stret long kisim dispela buk na stat long yusim.”

 Buk Stap Amamas Oltaim! i kamapim nupela wei bilong mekim ol Baibel stadi. Tasol i no dispela tasol i mekim na dispela nupela buk em i narapela kain long ol buk bilong stadi em pastaim yumi bin yusim. Sapos yu yusim kopi bilong buk Stap Amamas Oltaim! em ol i bin prinim, ating yu luksave olsem lukluk bilong en i narapela kain. Yumi ken stori moa long hau ol i bin wokim dispela buk.

 Pepa i hevi moa. Wai na dispela em i bikpela samting? Buk Stap Amamas Oltaim! i gat winim 600 piksa i gat ol naispela kala, dispela namba i winim namba bilong ol piksa i stap long buk Skulim Yumi inap 10-pela taim moa! Na tu, ol pes bilong dispela nupela buk i gat planti waitpela spes—em ol spes i no gat ol rait o piksa long en. Dispela 2-pela samting i kamapim hevi: Sapos pepa i no hevi, yu inap lukim ol piksa long narapela sait bilong pepa. Bilong abrusim dispela hevi, ol brata long International Printing Department (IPD), long Wallkill, New York, long Amerika, i traim 4-pela narapela narapela pepa em nau mipela i yusim long ol faktori bilong prinim ol pablikesen bilong yumi. Komiti Bilong Raitim Tok bilong lain Gavening Bodi i skelim wan wan bilong dispela 4-pela pepa na ol i makim pepa we yu no inap lukim ol piksa long narapela sait bilong en. Pe bilong dispela pepa em 16 pesen moa winim pe bilong pepa em yumi save yusim bilong prinim ol narapela pablikesen bilong yumi. Tasol dispela pepa i mekim na ol Baibel sumatin i ken ritim wan wan pes bilong buk Stap Amamas Oltaim! na ol i no inap lukim ol piksa long narapela sait bilong pes.

 Narapela kain laminate karamap. Karamap bilong dispela nupela buk i narapela kain long ol karamap bilong ol narapela buk bilong yumi bikos ol i yusim narapela kain laminate long en. Ol i no yusim nomol gloss laminate we bai mekim karamap i sain, nogat, ol i yusim matte laminate long karamap na bai piksa i luk nais tru. Ol i leminetim karamap bilong buk na dispela i protektim buk long no ken bagarap hariap maski ol man i yusim inap planti taim. Tasol pe bilong matte laminate em i 5-pela taim moa winim pe bilong gloss laminate. So sampela brens i wok bung wantaim long baim matte laminate long liklik pe.

 Wai na yumi makim ol samting i gat bikpela pe bilong wokim dispela nupela buk? Wanpela brata i wok wantaim IPD i tok: “Mipela i save planti man bai yusim gut dispela buk, so mipela i laik bai dispela buk i luk nais yet maski ol man i yusim inap planti taim.” Eduardo i wok long Printing Ofis long Brasil brens, na em i tok: “Mipela i amamas tru long lukim oganaisesen bilong Jehova i yusim ol gutpela gutpela samting bilong wokim dispela buk i luk nais tru na isi long ol man i yusim inap longpela taim, na long wankain taim mipela i yusim gut ol donesen mipela i kisim.”

 Mipela i stat long prinim buk Stap Amamas Oltaim! long Mas 2021. Em long taim bilong COVID-19 pendemik, so i bin gat sampela hatwok. Betel i stap long lok-daun, so ol Betel komiuta i no inap helpim wok long ol printing faktori bilong yumi, na tu, Betel i no inap invaitim ol nupela Betelait. Em risen na sampela printing faktori bilong yumi i no gat planti wokman, na sampela printing faktori i pas inap sampela haptaim bikos gavman i putim ristriksen.

 Hau ol i winim ol dispela hatwok? Taim ol printing faktori i kirap mekim wok gen, ol i asainim ol brata na sista long ol narapela dipatmen long Betel long helpim wok bilong prinim ol pablikesen. Joel i wok wantaim IPD, em i tok: “Ol i lusim sampela samting bilong ol yet na redi long lain long mekim nupela asainmen bilong ol na ol i bin helpim gut mipela long pinisim wok.”

 Maski i gat sampela hatwok, mipela i prinim pinis planti milion kopi bilong buk Stap Amamas Oltaim! Bilong prinim ol dispela buk, mipela i mas baim planti samting olsem ol printing plet, laminate film, pepa, ing, na glu. Insait long fes 5-pela mun long wok bilong prinim dispela buk, mipela i tromoi winim 2.3 milion dola bilong Amerika long baim ol dispela samting. Bilong seivim mani, mipela i prinim ol dispela buk inap stret long hamas namba em ol kongrigesen i nidim.

 Ol Baibel tisa na ol sumatin bilong ol i pilim olsem wanem long dispela nupela buk bilong stadi? Paul em wanpela brata long Australia, na em i tok: “Buk Stap Amamas Oltaim! em naispela buk na mi amamas tru long yusim bilong mekim ol Baibel stadi. Disain bilong en i pulim ai bilong ol man na dispela buk i kirapim Baibel tisa na sumatin long toktok gut wantaim. Ol tok bilong en i klia, na i gat ol askim bilong kirapim tingting bilong sumatin, ol vidio, ol piksa, o sat, na ol mak em sumatin i ken winim. Ol i wokim gut tru dispela buk na dispela i kirapim mi long mekim wok tisa bilong mi i kamap gutpela moa.”

 Wanpela Baibel sumatin long Amerika i tok: “Mi laikim tru dispela nupela buk. Ol piksa i helpim mi long kliagut long ol bikpela poin. Mi pilim tru long bel ol vidio na ol i kirapim mi long mekim ol senis.” Dispela sumatin i save stadi 2-pela taim insait long wik na oltaim em i save go long ol miting bilong kongrigesen.

 Bikpela wok i stap yet bilong prinim planti milion kopi bilong buk Stap Amamas Oltaim! long planti tokples. Lain Gavening Bodi i tok orait long pablisim dispela buk long 710 tokples. Dispela i makim olsem ol i tok orait long pablisim dispela buk long 340 moa tokples winim long buk Skulim Yumi!

 Hau mipela i kisim mani bilong prinim ol pablikesen? Long rot bilong ol donesen em ol manmeri i givim bilong sapotim wok i kamap long olgeta hap, planti i mekim donesen long rot bilong donate.pr418.com. Mipela i tenkyu tru long ol donesen yu givim we i helpim mipela long wokim ol pablikesen bilong stadi bilong ol manmeri em ol i laik kisim save long Jehova na bai ol i ken “stap gut inap oltaim oltaim.”​—Buk Song 22:26.