Jehova i save amamas tru long skulim lain bilong em. Em as na oganaisesen bilong em i kamapim sampela skul bilong trenim ol sumatin long mekim ol asainmen bilong ol. Wanpela bilong ol em Skul Bilong Ol Kingdom Evanselis (SKE). Long ol yia i no longtaim i go pinis, oganaisesen bilong God i wok strong long stretim gut ol kos na ol bilding bilong mekim dispela skul tiokratik i kamap gutpela moa. Wanpela mak mipela i laik winim em long helpim ol instrakta long mekim gut wok tisa na helpim ol sumatin long lain gut. Hau ol donesen yu givim i helpim mipela long winim dispela mak?

 Inap planti yia, ol i bin mekim ol skul tiokratik long ol Haus Kingdom na ol Haus Kibung. So bilong wanem mipela i wokim o stretim sampela moa bilding em nau mipela i yusim bilong mekim tasol ol skul tiokratik? Skelim 3-pela risen.

 Bikpela nid moa. Christopher Mavor em helpim bilong Sevis Komiti Bilong Gavening Bodi, em i tok: “Ol brens ofis i tokim mipela olsem ol i nidim planti moa brata na sista long helpim wok autim tok. Olsem, long 2019, Brasil brens i tok ol bai nidim inap olsem 7,600 moa bratasista em ol i grediuet pinis long SKE long helpim wok autim tok long brens teritori bilong ol.” Brens ofis long Amerika i tok ol i gat bikpela nid long ol ekspiriens painia long trenim ol narapela long insait long wok bilong autim tok long ol pablik ples, long ol bikpela siti, autim tok long ol haba, na long ol haus kalabus. Na tu, i gat bikpela nid long ol brata long wok wantaim Lokol Disain/Konstraksen Dipatmen na insait long ol Hospital Liesen Komiti. Ol sumatin i grediuet long SKE i ken helpim long mekim ol dispela wok.

 Planti moa sumatin. Planti brens ofis i kisim ol aplikesen long planti sumatin moa winim namba bilong ol sumatin ol i ken enrolim ol long dispela skul. Olsem, long Brasil, brens ofis i kisim olsem 2,500 SKE aplikesen insait long wanpela yia tasol. Tasol brens i no gat planti bilding long mekim dispela skul, so brens i enrolim 950 sumatin tasol.

 Ples slip. Taim ol sumatin i atendim dispela skul long wanpela Haus Kingdom o long wanpela Haus Kibung, planti taim ol i stap long haus bilong ol lokol bratasista. Dispela arensmen i wok gut long sampela kantri bikos ol i sediulim 2-pela o 3-pela klas tasol insait long wanpela yia. Tasol long ol kantri we ol i sediulim planti klas, em i hatwok long ol lokol pablisa i givim ples slip long ol sumatin insait long planti mun long wanpela yia. So ol i wokim ol bilding klostu long ol klasrum bilong ol sumatin i ken yusim.

 Ol bai skelim ples em bilding bai sanap long en na ol narapela samting, na ol inap yusim sampela milion dola (bilong Amerika) long wokim wanpela bilding i gat wanpela klasrum, na tu, ples slip bilong ol instrakta na 30 sumatin na ol narapela samting em ol instrakta na ol sumatin bai nidim.

 Planti taim ol i save putim ples bilong mekim skul ausait long siti we i no gat planti nois, na klostu long ol ples i gat pablik trenspot. Na tu, ol i save makim ol ples i gat planti pablisa em ol i ken helpim skul long ron gut na helpim wok bilong mekim meintenens long ol bilding na ol ikwipmen.

 Ol bilding bilong skul i gat ol laibreri, ol hap bilong stadi, ol kompiuta, ol printa, na ol narapela ikwipmen. Planti taim i gat ples bilong kaikai we ol sumatin na ol instrakta i ken bung na kaikai wantaim. Na tu, i gat hap bilong eksasais na kisim amamas tu.

 Na tu, mipela i save plenim gut ol klasrum. Troy i wok wantaim Wolwaid Disain/Konstraksen Dipatmen long Warwick, New York, em i tok: “Mipela i askim ol brata long Dipatmen Bilong Ol Skul Tiokratik long helpim mipela long disainim ol klasrum long rot we em bai isi long ol sumatin i lain gut. Ol dispela brata i givim mipela ol gaidlain long sais bilong ol klasrum, disain bilong ol, na tu, wanem kain ol lait na odio-vidio ikwipmen em ol bai nidim.” Long sait bilong ol odio ikwipmen, Zoltán em wanpela SKE instrakta long Hangari, em i tok: “Pastaim mipela i no gat ol maikrofon, so planti taim mipela i kirapim ol sumatin long toktok strong. Tasol nau wan wan desk i gat maikrofon, so mipela i no gat dispela hevi nau!”

 Ol instrakta na ol sumatin i pilim olsem wanem long wok bilong wokim gut ol bilding bilong mekim ol skul tiokratik? Angela i bin go long SKE skul long Palm Coast, Florida, long Amerika, em i tok: “Bai yu stap bel isi tru long hap. Ol i plenim gut olgeta samting long ol klasrum na ol rum bilong mipela bambai mipela i ken putim tingting olgeta long stadi na long lainim samting.” Csaba em i wanpela instrakta long Hangari, em i amamas tru long bung na kaikai wantaim ol sumatin. Em i tok long ol kain taim olsem, “planti sumatin i save stori wantaim mipela long laip bilong ol na ol samting i bin kamap long ol. Long dispela rot, mipela i save gut long ol sumatin. Dispela i opim rot tu long mipela i ken yusim kos bilong skul long helpim gut ol long ol samting ol i nidim.”

 Ol sumatin na ol instrakta i tingim ol dispela gutpela bilding bilong mekim ol skul olsem blesing i kam long “Nambawan Bikpela Tisa” bilong yumi, Jehova. (Aisaia 30:20, 21) Wanpela sista long Filipins husat i bin go long SKE skul long wanpela eria em ol i bin senisim i kamap wanpela skul, em i tok: “Dispela bilding we skul i kamap long en i helpim mipela long tingim olsem mipela i no ol sumatin tasol, nogat, mipela ol spesel gest bilong Jehova. Em i laik bai yumi amamas taim yumi stadi gut long tok bilong em long Baibel.”

 Mipela i sanapim, stretim, na mekim meintenens long ol bilding bilong mekim skul bikos long ol donesen yupela i givim, planti bilong ol dispela donesen i kam long rot bilong donate.pr418.com. Tenkyu tru long gutpela pasin bilong yupela long amamas long givim samting.