Winim 130 yia, ol Witnes Bilong Jehova long i bung wantaim long ol kibung yumi save mekim long olgeta yia. Ol dispela program i gat winim 40 narapela narapela tok, na tu, ol musik, ol intaviu, na ol vidio. Bilong dispela program i ken helpim na strongim ol lain i go long dispela kibung, olgeta i mas “harim na lukim” gut ol samting i kamap long program. (Luk 2:20) Hau mipela i yusim ol donesen yupela i givim na bai olgeta manmeri i ken kisim helpim long ol dispela kibung, maski ol i stap long wanem wanem hap?

 Planti stediam long nau long ol kantri i stap long Yurop na Amerika samting, ol i gat pinis ol odio/vidio sistem. So taim yumi rentim ol dispela stediam long mekim kibung, wai na planti taim yumi save instolim ol odio/vidio ikwipmen bilong yumi yet? David i wok wantaim Wol Hetkota Brodkasting Dipatmen, em i tok: “Sampela ol stediam mipela i rentim, ol i disainim long wei we odiens i mas putim yau long ol man i mekim ol tok winim 6-pela aua. Olsem, ol stediam we ol i pilai spots, ol i save yusim pablik atres sistem bilong mekim ol sotpela toksave na long pilaim ol sotpela musik. Ol vidio skrin i save soim ol sko bilong ol tim i pilai, ol edvetaismen, na ol riplei bilong ol gem. Tasol yumi laik bai odiens i watsim ol longpela vidio na harim na kliagut long olgeta tok em ol brata i mekim long pletfom.”

 Disain bilong ol stediam ol i yusim long mekim kibung i narapela narapela kain, so wei ol i instolim ol odio/vidio ikwipmen long wanpela hap i no wankain long narapela hap. Taim ol brata i makim pinis ol stediam ol bai yusim, ol Brodkasting Dipatmen long ol brens ofis bilong yumi i save makim hap we odiens bai sindaun long en, tasol paslain long ol i mekim olsem ol i traim long tingim hamas manmeri bai kam long kibung na hamas manmeri inap sindaun long olgeta sia long dispela stediam. Na bihain ol brata i save skelim we ol bai instolim ol odio spika na ol vidio skrin, ol i tingim hau ol bai konektim ol, na ol i wokim lista bilong olgeta samting ol bai nidim na long dispela rot olgeta manmeri inap long lukim na harim program.

 Ol i yusim ol bikpela odio/vidio sistem i gutpela moa long ol kibung we ol bai mekim program long winim wanpela tokples. Sapos ol i mas trensletim program i go long narapela tokples, ol trensleta i mas harim odio na lukim vidio na ol brata i mas salim trenslesen i go long narapela redio senol long ol lain i mekim dispela tokples. Yumi amamas olsem i gat ol spesel midia pleia, na bai ol i ken pilaim ol vidio long wankain taim long odiens i ken lukim, maski ol i trensmitim odio long 8-pela narapela narapela tokples. David i tok: “Ol i yusim ol sistem i gat planti wok bilong en na planti koneksen, na ol volantia i yusim ol dispela ikwipmen i nidim planti trening.”

 Planti brens ofis i gat ol saplai bilong ol ikwipmen bilong odio/vido em ol i save yusim long olgeta yia. Long kain taim olsem, ol brata i save wokim arensmen bilong salim olgeta ikwipmen ol i yusim bilong odio/vidio i go long wanpela rijinel kibung na i go long neks rijinel kibung. Long olgeta yia, Brens long Amerika i save tromoi winim 200,000 a dola long sipim ol ikwipmen bilong odio/vidio. Tasol taim ol i skelim mani ol i tromoi long sipim ol dispela samting i go wantaim mani ol bai tromoi long baim na lukautim ol samting ol i yusim long odio/vidio, pe bilong en i no antap tumas. Steven i mekim wok olsem ovasia bilong odio/vidio dipatmen long wanpela kibung long Kanada, em i tok: “Vidio tim bilong mipela i sekim gut na pekim olgeta ikwipmen bilong odio/vidio—ol liklik samting tu olsem ol kod na ol skru—na bai mipela i ken yusim long neks kibung.”

 Mipela bai tromoi bikpela mani tru sapos mipela i rentim ol odio/vidio ikwipmen, na planti taim ol dispela samting i bagarap o i no wok gut. Em as na mipela i save baim ol ikwipmen bilong odio/vidio. Long nau, mipela i tromoi inap olsem 24,000 dola long baim wanpela LED vidio wol em mesamen bilong en five by three mita, na 20 dola long baim wanpela maikrofon kebol em longpela bilong en 15 mita. Brodkasting i save wok wantaim Purchasing Dipatmen long “skelim gut pe bilong dispela samting” paslain long ol i baim. (Luk 14:28) Olsem, hamas manmeri bai kisim helpim long ol samting ol i baim? Sapos i gat nid long yusim ol dispela ikwipmen, ol i mas baim ol nupela iwkipmen o i gat narapela rot i gutpela moa winim dispela? Yumi gat gutpela hap long putim ol dispela ikwipmen, na yumi gat ol tul na ol volantia i kisim trening pinis long lukautim ol dispela samting?

 Bilong surikim haptaim bilong yusim ol dispela samting na seivim ol donesen yumi kisim, oltaim mipela i save stretim ol dispela ikwipmen. Na tu, mipela i putim ol long ol bikpela na strongpela boks taim mipela i sipim i go na bai ol i no ken bagarap, na sapos ol dispela boks i bagarap mipela i save stretim ol tu.

 Ol man i no Witnes, ol i amamas tru long gutpela quality bilong ol odio/vidio long ol kibung bilong yumi. Olsem, long wanpela kibung, wanpela wokman bilong wanpela bikpela brodkasting kampani i tok yumi wokim ol quality odio na vidio we i gutpela tru. Jonathan i save helpim wok bilong instolim na lukautim ol odio/vidio ikwipmen bilong ol kibung, na em i tok: “Dispela man i kirap nogut long save olsem ol lain insait long odio/vidio tim bilong mipela, olgeta em ol volantia na i no ol saveman bilong yusim ol odio/vidio ikwipmen. Em i tok long kampani em i wok long en, bilong ol i ken instolim ol samting em mipela instolim long 1 na hap de, ol bai kisim olsem 5-pela de long mekim olsem.” Long narapela kibung, maneja bilong dispela hap ol i mekim kibung long en i tok: “Planti ol hapman bilong pilaim musik na wokim ol vidio i bin kam long hia, tasol mi no bin lukim ol manmeri i mekim gut tru wok olsem yupela i mekim.”

 Yu kisim wanem helpim long ol odio/vidio sistem long ol kibung? Ating yu pilim wankain olsem David, em i stap long Inglan. Em i tok: “Mi gat 88 krismas na mi bin go long ol kibung long laip olgeta bilong mi. Tasol long nau em isi moa long mi inap putim gut tingting long ol samting i kamap long kibung. Ol naispela vidio i mekim na program i save pinis hariap na em isi long mipela i kliagut long ol bikpela tok i kamap long kibung.” Micheal em i stap long Naijiria, em i tok: “Bipo ol bratasista i save hatwok long harim gut tok ol brata i mekim o lukim ol vidio, tasol nau i no olsem. Ol inap putim gut yau na tingting i no wokabaut long taim bilong program bilong kibung.”

 Taim yu go long “Autim Gutnius”! Rijinel na Spesel Kibung bilong dispela yia, lusim sampela haptaim long tingim ol wok em ol volantia i bin mekim na bai yu ken harim na lukim program. Mipela i tenkyu olsem ol donesen yu givim, na ol donesen yu givim tu long rot bilong donate.pr418.com, i opim rot long kibung i ken ron gut. Tenkyu.