Ol Witnes Bilong Jehova i save tingim tru ol wanbilip bilong ol. (1 Pita 2:17) Planti bilong yumi i pilim wankain olsem Tannis, em yangpela sista long Kenya. Em i tok, “Mi laik tru long save long wanem samting i painim ol bratasista long olgeta hap bilong graun.” Olsem wanem Tannis na planti milion arapela Witnes i save kisim ol nius bilong ol samting i kamap? Kirap long 2013, yumi inap kisim ol nius long Newsroom seksen bilong websait, jw.org.

 Newsroom i stori long ol ripot bilong ol samting i kamap long Ol Witnes Bilong Jehova long ol kain topik olsem rilis bilong Baibel, disasta rilif wok, ol konstraksen projek, na ol narapela bikpela samting i kamap. Dispela seksen i stori long ol bratasista i kalabus bikos long bilip bilong ol. Na tu, Newsroom i kamapim ol gutpela samting i kamap long wok autim tok na bung bilong Memorial. Husat i save mekim wok painimaut long ol dispela nius atikol, na hau ol i save redim?

 Newsroom i stap aninit long lukaut bilong Ofis Bilong Pablik Infomesen (OPI). Dispela dipatmen i stap long wol hetkota na Komiti Bilong Ol Kodineta Bilong Gavening Bodi i stiaim dispela wok. Winim 100 bratasista i wok long OPI—planti i wok olsem rimot volantia—olsem ol lain bilong raitim ol tok, mekim wok painimaut, ol atis, na ol trensleta. Ol narapela i save toktok wantaim ol wokman bilong gavman, ol profesa, na ol nius lain. Winim 80 Pablik Infomesen Desk (PID) i stap long ol brens long olgeta hap bilong graun i save helpim OPI.

 Taim OPI i laik redim wanpela nius, ol i save wok bung wantaim ol PID. Taim ol brata i kisim save olsem i gat wanpela stori bilong kamapim, ol i save mekim wok painimaut long en na kisim ol infomesen. Dispela inap makim olsem ol bai mekim ol intaviu na toktok wantaim ol saveman. Taim ol i bungim pinis olgeta infomesen, ol bai raitim nius atikol, editim, ritim gen na skelim, wokim ol piksa, na salim i go long Komiti Bilong Ol Kodineta long skelim na givim tok orait.

 Ol wanbilip bilong yumi i pilim olsem wanem long Newsroom? Cheryl em wanpela sista long Filipins, em i tok: “Paslain long mi kirap mekim ol wok long de, mi save amamas long ritim nius i stori long oganaisesen bilong Jehova na ol manmeri bilong em.”

 Planti manmeri i luksave olsem nius i stap long Newsroom bilong jw.org em i no wankain long ol narapela nius lain. Tatiana long Kasakstan i tok: “Mi amamas olsem mi ken trastim nius i stap long jw.org. Dispela nius inap helpim mi na em ol trupela infomesen.” Wanpela sista long Meksiko nem bilong Alma, em i tok: “Ol stori i kamap long Newsroom i save strongim mi, em i no wankain long ol narapela stori nogut i kamap long ol nius.”

 Ol infomesen long Newsroom i bilong helpim yumi na strongim bilip bilong yumi. Bernard long Kenya i tok: “Newsroom i helpim mi long tingim ol bratasista long olgeta hap bilong graun olsem famili bilong mi, maski ol i stap long wanem wanem hap. Mi inap kolim nem bilong ol na ol samting i kamap long ol long beten bilong mi.” Wanpela sista long Kenya, nem bilong Bybron i tok: “Mi save amamas tru taim mi lukim atikol i stori long ol i rilisim Baibel long narapela tokples! Ol dispela atikol i save kirapim mi long tingim olsem Jehova i save mekim wankain pasin long olgeta manmeri.”

 Ol nius i stori long ol man i birua long ol bratasista bilong yumi, dispela inap strongim yumi. Jackline long Kenya i tok: “Taim mi tingim pasin bilong ol long strongim bel, dispela i save strongim bilip bilong mi. Planti taim mi laik painimaut wanem samting i helpim ol long karim hevi na sanap strong. Mi kisim save olsem ol liklik samting—olsem beten, ritim Baibel, na tu, singsing—i save helpim ol bratasista long sanap strong.”

 Wanpela sista long Kosta Rika nem bilong em Beatriz, i save laikim ol atikol i stori long ol disasta. Em i tok: “Newsroom i opim rot long mi inap luksave long hau oganaisesen i soim pasin laikim na kirap kwik long givim inap samting ol bratasista i nidim. Dispela i kirapim mi long bilip olsem dispela em oganaisesen bilong Jehova.”

 Yumi tenkyu tru olsem yumi inap kisim ol nupela nius long ol bratasista long olgeta hap! Dispela samting inap kamap bikos yupela i givim kontribiusen bilong helpim wok long olgeta hap, na planti i givim dispela donesen long rot bilong Intenet long donate.pr418.com. Tenkyu tru long pasin bilong yupela long givim kontribiusen.