Musik em i naispela presen i kam long Jehova. Em inap mekim sampela samting long tingting bilong yumi, senisim filings bilong yumi, na strongim yumi. Dispela em tru long ol orijinel singsing. Ol dispela singsing inap mekim sampela samting moa long yumi: ol i bringim yumi i go klostu moa long Jehova.

 Kirap long 2014 na i kam, ol i wokim 70 orijinel singsing, na long nau sampela bilong ol dispela singsing i stap long winim 500 tokples! Tasol ating yu laik save, ‘Husat i wokim ol dispela singsing, na wanem ol wok i insait long kamapim ol dispela singsing?’

 Musik tim long dipatmen bilong wokim ol vidio (Audio/Vidio Service) i save wokim ol orijinel singsing, na dispela dipatmen i stap aninit long Komiti Bilong Wok Tisa bilong Gavening Bodi. I gat 13 brata na sista insait long musik tim na ol i save wokim musik, stretim musik, redim sediul bilong wokim musik, na ol narapela wok. Na tu, Komiti Bilong Wok Tisa i orait long ol volantia i stap long narapela narapela hap bilong graun long sapotim dispela wok, em ol lain bilong wokim musik, ol lain bilong pilai musik, na ol lain bilong singsing. Ol dispela bratasista i amamas long yusim save bilong ol long mekim dispela wok na ol i no laik kisim biknem long wok ol i mekim.

 Olsem wanem ol i save wokim wanpela orijinel singsing? Pastaim Komiti Bilong Wok Tisa i save makim ol skripsa i as bilong singsing na samting ol i laik bai man i harim singsing i pilim. Orait musik tim bai stretim rot bilong wokim musik bilong en na raitim ol tok bilong dispela singsing. Ol bai wokim musik na rekodim. Komiti Bilong Wok Tisa bai harim na skelim dispela rekoding na givim ol tok bilong stiaim musik tim. Orait musik tim bai stretim gen dispela singsing na rekodim gen. Ol i save rekodim ol dispela singsing long narapela narapela hap, na tu long ol brens ofis na long ol haus bilong ol man we i gat musik studio.

 Bilong wokim na rekodim ol orijinel singsing, ol brata i save yusim ol kain kain kompiuta program. Ol i mas yusim ol samting olsem ol instramen bilong wokim musik, ol mixing console, ol amplifier, ol spika, na ol maikrofon. Pe bilong ol maikrofon em inap olsem 100 dola i go 1,000 dola (U.S.). Long 2020, mipela i tromoi 116,000 dola (U.S.) long baim ol masin bilong wokim na rekodim musik.

 Ol i mekim wanem samting na bai ol i yusim gut ol donesen ol i kisim? Ol i no mekim wok long wanpela bikpela tim bilong wokim musik long Betel, nogat, ol i mekim wok long ol volantia i stap long haus bilong ol yet. Na tu, ol brata i yusim wanpela program long kompiuta we i wokim kain kain saun bilong ol instramen bilong wokim musik, na ol i no bungim planti man wantaim bilong wokim musik, nogat.

 Ol bratasista i save amamas tru long harim ol orijinel singsing. Tara i stap long Jemani i tok: “Taim mi tingting planti, ol dispela singsing i save helpim mi long stap bel isi. Ol dispela singsing i stap long tokples bilong mi na taim mi harim, i olsem Jehova i holimpasim mi.” Wanpela brata long Kasakstan, nem bilong em Dmitry, i tok: “Mi amamas olsem taim mi harim ol dispela singsing mi no gat wok long wari olsem ol dispela singsing bai kirapim mi long mekim ol samting i no stret olsem ol singsing bilong graun i save mekim. Na tu, ol dispela singsing i helpim mi long tingting strong long pas gut wantaim Jehova.”

 Delia, long Saut Afrika i stori long tingting bilong em long ol orijinel singsing. Em i tok: “Ol dispela singsing i strongim bilip bilong mi. Taim mi bel hevi o wanpela hevi i bungim mi, olgeta taim mi save tingim wanpela singsing we i stret long hevi bilong mi. Planti taim krai bilong musik i save senisim filings bilong mi!”

 Planti i gat ol feiveret orijinel singsing. Lerato, em tu i bilong Saut Afrika, i tok: “Dispela tupela singsing ‘Just Around the Corner’ na ‘The New World to Come’ i helpim mi long piksaim mi yet long taim we mama bai kirap bek na mi welkamim em. Olgeta taim mi harim dispela tupela singsing, mi piksaim mama i ran i kam holimpasim mi.”

 Wanpela orijinel singsing i bin helpim tru wanpela tineja long Sri Lanka. Em i tok: “Saiens tisa bilong mi i krosim mi long ai bilong ol wanklas bilong mi bikos mi wanpela Witnes Bilong Jehova. Mi pret na mi no save mi bai tok wanem. Taim mi go bek long haus, mama bilong mi i kirapim mi long harim dispela singsing ‘Study Makes Yu Strong.’ Dispela singsing i helpim mi long mekim wok painimaut na redim bekim bilong mi. Long neks de, mi toktok wantaim tisa bilong mi. Em i putim yau long mi na em i tok, nau em i kliagut long bilip bilong ol Witnes Bilong Jehova. Mi tenkyu long oganaisesen bilong Jehova long givim yumi ol kain gutpela singsing we i strongim yumi.”

 Mipela i kisim mani we bilong wokim ol dispela singsing? Long rot bilong ol kontribiusen ol bratasista i putim bilong sapotim wok long olgeta hap bilong graun. Ol i mekim olsem long ol kain kain rot yu inap lukim long donate.pr418.com. Tenkyu long ol kontribiusen yupela i save putim.