Wastaua bilong Jun 1, 1912 long tok Inglis i tok: “Ating planti bilong ol manmeri i ritim pablikesen bilong yumi, ol i save long ol manmeri husat i aipas. Ol i ken kisim fri dispela pablikesen bilong ritim . . . Ol i prinim rait bilong dispela litresa long wei we ol aipas inap ritim.” Wastaua i tok moa: “Planti bilong ol aipas i amamas long save olsem ol manmeri bilong graun inap kisim planti blesing.”

 Taim ol i raitim ol dispela tok, long olgeta hap bilong graun, i no bin i gat wanpela stail stret bilong raitim tok bilong ol aipas inap ritim long tok Inglis. Tasol ol Witnes Bilong Jehova i wokim pinis ol pablikesen bilong Baibel long rait brel bilong ol aipas. Na mipela mekim olsem yet long nau! Mipela i wokim ol pablikesen long rait brel long winim 50 tokples. Hau ol i save wokim?

 Fes step bilong wokim rait brel em long senisim ol teks i go kamap rait brel. Michael Millen i wok long Text Processing Services long Patterson, New York. Em i tok: “Long pastaim, mipela i save yusim softwe ol narapela oganaisesen i wokim na putim ol teks i go long rait brel, tasol dispela softwe i no inap wok long rait brel bilong ol narapela tokples. Nau mipela i yusim Watchtower Translation System, na dispela softwe i wok gut long rait brel bilong planti tokples long graun olgeta. Mi bilip olsem i no gat wanpela softwe i olsem dispela.”

 Taim ol i wokim ol litresa long brel, ol i wokim tu ol stori bilong ol piksa long rait brel. Kain olsem, rait brel i stori long piksa i stap long fran pes bilong Stap Amamas Oltaim! i tok: “Wanpela man i stat long wokabaut i go daun long rot we i baut baut i go namel long ol naispela plaua na diwai, ol liklik maunten, na ol bikpela maunten.” Jamshed em wanpela kongrigesen sevan na painia. Em i tok: “Dispela stori bilong piksa em bikpela samting tru long mi.”

 Taim ol i redim pinis ol teks bilong wokim i kamap brel, orait ol i save salim ol dispela fail i go long ol brens ofis i save wokim rait brel. Long ol dispela hap, ol bai wokim pablikesen long rait brel long wanpela kain pepa we bai i no gat hul o seip bilong en i no bagarap. Bihain, ol bai bungim ol pes, pasim ol pes bilong en, na salim wantaim ol oda bilong ol kongrigesen o yusim fri meil bilong ol aipas na salim sapos pos ofis i gat dispela sevis. Sapos i stret long mekim, ol brens ofis inap stretim rot long salim kwik ol brel pablikesen na bai ol brata husat i aipas o i no inap lukluk gut, ol inap kisim ol pablikesen ol i nidim bilong yusim ol miting bilong kongrigesen.

 Ol i save lusim bikpela haptaim na mani long mekim dispela wok. Kain olsem, haptaim ol i lusim long prinim 50,000 Baibel long Wallkill, New York, ol i save lusim wankain haptaim long wokim tasol 2-pela Baibel long rait brel. I gat 25 volium long wan wan bilong Inglis Baibel long rait brel, na mani ol i tromoi bilong baim ol samting ol i nidim bilong wokim ol dispela volium em 123 taim moa winim mani ol i tromoi bilong wokim ol nomol Baibel. a Pe bilong wan wan fran pes bilong 25 volium em K533!

 Ol lain i helpim long wokim ol pablikesen long rait brel i pilim olsem wanem? Nadia i wok long Saut Afrika brens i tok: “Ol bratasista bilong yumi husat i aipas o ol i no inap lukluk gut, laip bilong ol i hatwok, olsem na mi holim tingting olsem em wanpela blesing long wokim wanpela samting we i helpim ol. I klia tru olsem Jehova i laikim ol tru.”

 Tasol olsem wanem sapos man husat i aipas i no save long ritim rait brel? Sampela yia i go pinis, mipela i rilisim wanpela buklet Learn to Read Braillewe, na ol tok bilong en i stap long teks ol i wokim long rait brel na long teks ol i prinim. Ol i wokim bilong man husat inap lukluk na man husat i aipas. Dispela i makim tu ol tul aipas man bai yusim bilong rait long brel. Man bilong lainim rait brel bai yusim ol dispela tul long raitim ol leta long brel. Long dispela rot, em inap tingim gut ol leta long rait brel na dispela bai helpim em taim em i tatsim rait brel bilong ritim.

 Olsem wanem ol bratasista i aipas o ol i no inap lukluk gut i kisim helpim long dispela pablikesen? Ernst i stap long Haiti na em i save go long ol miting bilong kongrigesen, tasol em i no gat ol pablikesen long rait brel. Olsem na em i save tingim gut olgeta tok bilong mekim taim em i gat asainmen long hap bilong skul na taim em i laik bekim tok long ol miting. Em i tok: “Tasol nau mi no gat wok long tingim gut olgeta wan wan tok, mi inap putim han na bekim tok tasol. Mi pilim olsem mi pas gut moa wantaim ol bratasista. Mipela olgeta i kisim wankain tok bilong strongim bilip!”

 Jan em wanpela elda long Ostria na em i save lukautim Wastaua Stadi na Baibel Stadi Bilong Kongrigesen, tasol ai bilong em i bagarap na em i no inap lukluk gut. Em i tok: “Brel pablikesen bilong yumi em isi long kliagut long ol tok bilong en winim ol narapela buk long rait brel em mi bin ritim. Kain olsem, pablikesen bilong yumi i gat pes namba, ol futnot we em isi long painim, ol stori bilong piksa we i stori gut long olgeta samting.”

 Seon-ok em wanpela painia long Saut Korea husat i aipas na mauspas. Pastaim em i save nidim wanpela long holim han bilong em na muvim na wokim sain na bai em i save long wanem tok i kamap long ol miting, tasol nau em yet inap ritim brel Baibel. Em i tok: “Ol narapela buk long rait brel em hatwok long ritim bikos ol dot i no stap, ol lain i krungut, o pepa i no strong. Tasol ol Witnes Bilong Jehova i yusim bes pepa na wokim gut ol leta na em isi long mi ritim.” Em i tok moa: “Long pastaim, mi nidim ol narapela long helpim mi long stadi long ol pablikesen bilong Baibel. Tasol nau, mi yet inap stadi. Dispela i mekim na mi amamas olsem mi inap redim ol miting na insait long ol miting. Mi ritim olgeta brel pablikesen bilong yumi. Mi no inap stop long ritim ol pablikesen bilong yumi.

 Ol brel pablikesen bilong yumi i gat dispela toksave: “Mipela i no salim dispela pablikesen. Em i bilong helpim olgeta man long kisim save long Baibel, na ol man yet i givim donesen bilong helpim dispela wok.” Dispela wankain toksave i stap tu long ol pablikesen ol i prinim. Tenkyu tru long givim ol donesen olsem long ol rot i stap long donate.pr418.com. Pasin bilong yu long givim i helpim long wokim ol pablikesen bilong Baibel na bai olgeta i ritim, dispela i makim tu ol aipas na ol manmeri i no inap lukluk gut.