“Long bipo, em hat long tingim olsem yumi inap kisim ol buk na nius na vidio long rot bilong teblet o fon samting.” Yu wanbel long ol dispela tok? Dispela em ol hap tok bilong wanpela tok em Geoffrey Jackson i mekim long 2020 Gavening Bodi Apdeit #6. Em i tok moa: “Tasol nau bai yumi tingting, hau bai yumi kisim ol buk na nius long dispela taim bilong hevi sapos yumi no gat JW Library. Long ol yia i kam, Jehova i bin redim yumi long taim bilong kain hevi olsem.”

 Olsem wanem Jehova i wok long redim yumi? Wanem ol samting i insait long wok bilong redim JW Library app, na yumi ken mekim wanem bilong yusim gut dispela aplikesen na mekim i kamap gutpela moa?

 Long Me 2013, Gavening Bodi i askim MEPS Programming, em wanpela dipatmen long wol hetkota, long wokim wanpela aplikesen i gat rivais New World Translation. Paul Willies, em i save wok wantaim MEPS Programming, em i tok: “Paslain long dispela taim, mipela i no bin wokim na rilisim wanpela aplikesen bilong mobail long ol aplikesen stua long fon. Tasol mipela i kamapim wanpela tim, stopim ol narapela projek, na wok wantaim ol narapela dipatmen long disainim na wokim wanpela aplikesen na ol samting bai stap insait long en. Mipela i beten planti, na wantaim helpim bilong Jehova ol i rilisim dispela aplikesen long annual miting bihain long 5-pela mun tasol!”

 Neks hatwok em olsem, mipela i mas mekim dispela aplikesen i kamap wanpela laibreri tru tru we i gat planti pablikesen na planti moa tokples. Long Janueri 2015, planti bilong ol nupela pablikesen bilong yumi long tok Inglis i stap long dispela aplikesen, na bihain long 6-pela mun tasol, ol man i yusim inap daunlodim ol dispela pablikesen long planti handret narapela tokples.

 Kirap long dispela taim na i kam, ol brata bilong yumi i mekim dispela aplikesen i kamap gutpela moa long planti rot, ol i putim tu ol vidio, ol pablikesen na midia samting bilong ol miting bilong kongrigesen aninit long wanpela tab, na opim rot tu long ol man i yusim long i go stret long Research Guide referens taim ol i ritim wanpela Baibel ves.

 Olsem 8 milion divais i yusim JW Library long olgeta de na winim 15 milion divais i yusim long olgeta wan wan mun! Ol i nidim wanem samting long mekim dispela aplikesen i wok gut long ol dispela divais? Brata Willies i tok: “Wanpela aplikesen bilong mobail i nidim yet planti wok. Mipela i wok yet bilong edim ol nupela samting i go insait na mekim i kamap isi moa long ol man i yusim. Planti taim ol i save apdeitim ol komesiol opereiting sistem bilong ol dijitol divais, olsem na mipela tu i mas apdeitim dispela aplikesen so em i ken wok gut wantaim ol dispela sistem. Na tu, mipela i mas stretim gut na apdeitim intenel softwe bikos namba bilong ol pablikesen na ol rekoding long JW Library i wok yet long i go antap.” Na ol tokples ol i stap long en em inap olsem 200,000 pablikesen na winim 600,000 odio na vidio rekoding long JW Library!

 Bilong sapotim yet dispela aplikesen, mipela i nidim ol kompiuta hadwe na sampela samting moa. Bilong yusim sampela laisens bilong softwe, mipela i mas baim. Laisens bilong yumi i kostim olsem 1,500 US dola long olgeta yia. Na tu, MEPS Programming i save spendim olsem 10,000 US dola long olgeta yia long ol divais bilong ol narapela narapela kampani na bai dispela aplikesen i ken wok gut long ol nupela kompiuta, ol teblet, na ol fon.

 JW Library i daunim tru pe bilong mani em yumi spendim long prinim, baindim, na sipim ol litresa. Eksampel, skelim dispela buklet Skelim Sampela Tok Bilong Baibel Long Olgeta De. Mipela i prinim klostu olsem 12 milion kopi bilong Skelim Sampela Tok Bilong Baibel—2013. Tasol long 2020, mipela i prinim olsem 5 milion buklet—maski mipela i gat olsem 700,000 pablisa long olgeta hap bilong graun. Wai na mipela i mekim dispela senis? Planti bilong ol brata na sista bilong mipela i save ritim teks bilong de long JW Library. a

 Na tu, JW Library i save helpim ol man i yusim long planti rot. Geneviève, em i save stap long Kanada, em i tok dispela aplikesen i mekim na em inap stadi long olgeta taim. Em i tok: “Tru, sapos mi mas kisim olgeta buk bilong mekim stadi, mi no ting mi inap stadi long olgeta moning. Tasol wantaim dispela aplikesen, mi holim tasol teblet bilong mi na olgeta samting mi nidim i stap insait. Pasin bilong stadi oltaim i strongim bilip bilong mi na mi go klostu moa long Jehova.”

 Dispela aplikesen i helpim tru ol man long taim bilong COVID-19 pendemik. Charlyn, em i save stap long Amerika, em i tok: “COVID-19 i wok long i go bikpela long olgeta hap bilong graun, na winim 1-pela yia nau mi no lukim ol pablikesen bilong yumi em ol i prinim. Tasol JW Library i helpim yumi long kisim ol samting yumi nidim bilong stap strong long bilip, na mi tenkyu long Jehova long dispela naispela blesing.”

 Faye, em i save stap long Filipins, em i kamapim tingting em planti man i gat. Em i tok: “Mi yusim dispela gutpela aplikesen long pas gut wantaim Jehova. Em fes samting mi save ritim long moning. Mi save harim taim mi mekim ol wok. Mi save yusim long mekim stadi long ol miting. Mi save yusim long redim Baibel stadi. Mi save lukim ol vidio long en long ol fri taim bilong mi. Mi save ritim ol atikol o Baibel taim mi sanap long lain. Em i dia tumas.”

 Dispela aplikesen i helpim gut mipela tu long wok autim tok. Olsem, wanpela sista long Kamarun i autim tok, na em i laik yusim wanpela skripsa we em i lukim narapela sista i yusim long ol wik paslain. Tasol em i no inap tingim dispela ves. Em i tok: “Gutpela tru olsem, mi tingim wanpela hap tok bilong ves. Mi opim aplikesen, go long Baibel, na painim dispela hap tok. Hariap tru mi painim dispela skripsa. Dispela aplikesen i helpim mi long painim planti skripsa em planti taim mi no save tingim.”

 Gutpela pasin bilong yupela long givim donesen long rot bilong yusim ol narapela narapela wei bilong givim donesen i stap long donate.pr418.com i bin helpim mipela long wokim, lukautim, na mekim kamap gutpela moa JW Library app bilong ol bratasista bilong yumi long olgeta hap bilong graun. Tenkyu long gutpela pasin bilong yupela long givim donesen.

1. Oktoba 2013—Rilis bilong aplikesen wantaim rivais New World Translation

2. Janueri 2015—Ol narapela pablikesen i stap long tok Inglis, na bihain planti handret tokples

3. Novemba 2015—Mipela i putim ol kala bilong makim ol tok

4. Me 2016—Mipela i putim Meetings tab

5. Me 2017—Mipela i putim hap bilong kisim ol nout

6. Disemba 2017—Mipela i putim sapot bilong Study Bible

7. Mas 2019—Mipela i stretim rot bilong daunlodim ol odio rekoding, i go long strim vidio, na lukim tu referens bilong Research Guide

8. Janueri 2021—Mipela i putim seksen bilong buklet Stap Amamas Oltaim!