Long Oktoba 9, 2024, World Wild Life Fund i kamapim wanpela ripot nogut we i soim hau ol man i wok long mekim ol samting i bagarapim laip bilong ol animal. Ripot i soim olsem “insait long 50 yia (1970-2020), namba bilong ol animal i stap nau em i go daun inap 73 pesen.” Dispela ripot i tok lukaut olsem: “I stret yumi ken tok ol samting i kamap insait long neks 5-pela yia bai mekim na bihain bai i gat ol samting i gat laip i stap long graun o nogat.”

 Olsem na i stret planti manmeri i kirap nogut long harim kain ripot olsem. Yumi laikim tru naispela planet yumi stap long en na yumi no laik lukim bagarap i painim ol animal long graun. Yumi pilim olsem bikos God i laik bai yumi stap na bosim ol animal.​—Stat 1:27, 28; Provep 12:10.

 So ating yu laik save, ‘Yumi inap mekim sampela samting bilong lukautim ol animal long graun? Baibel i tok wanem?’

 Maski yumi wok strong long mekim ol samting bilong lukautim ol animal na bai ol i stap yet long bihain, God tasol bai mekim samting i stret bilong lukautim ol. Baibel i tok long samting bai kamap bihain, olsem i stap long Revelesen 11:18, God bai “bagarapim ol man i wok long bagarapim graun.” Dispela ves i helpim yumi long luksave long 2-pela samting:

1.  1. God bai stopim ol man long bagarapim graun olgeta.

2.  2. Klostu nau God bai mekim samting bilong stretim ol samting i bagarap long graun. Hau yumi save long dispela? Yumi save long dispela bikos long nau ol samting ol man i mekim inap bagarapim olgeta animal winim long bipo.

 God bai mekim wanem bilong stretim dispela hevi? Em bai yusim gavman bilong em long heven, o Kingdom, long bosim graun olgeta. (Matyu 6:10) Dispela gavman bai skulim na trenim ol man i daun long God long bosim na lukautim ol animal long graun.​—Aisaia 11:9.