Long nau, ol lida bilong graun, ol saientis, na ol lain bilong kamapim ol teknoloji i mekim komen long pawa bilong atifisol intelijens (AI). Ol i tokaut olsem em gutpela samting, tasol tu, ol i tok lukaut long hau ol man inap mekim wok nogut long en.

•   “AI em wanpela teknoloji i gat bikpela pawa long nau, em inap mekim i stap bilong ol manmeri i kamap gutpela moa  . . . Long wankain taim, AI i gat strong long tekewe seifti na bel isi bilong yumi, tekewe sampela raits na praivesi bilong yumi ol man na em inap mekim na i hatwok long yumi trastim demokratik wei bilong mekim wok gavman.”​—Kamala Harris, vice president of the United States, Me 4, 2023.

•   “Atifisol intelijens (AI) i tok long mekim helt-ke i kamap gutpela moa, tasol em inap kamapim sampela hevi long helt na i stap bilong ol manmeri,” em tok wanpela intenesenel grup bilong ol dokta na ol saveman bilong helt-ke em Dokta Frederik Federspiel i stap olsem gopas bilong ol i bin raitim long wanpela atikol em ol i pablisim long Me 9, 2023, long BMJ Global Health. a

•   “AI i ken stap olsem tul bilong spredim ol infomesen i no tru. I no longtaim, em i ken tekewe wok mani bilong ol man. Ol manmeri i save wok long teknoloji i wari olsem sampela taim bihain em inap bagarapim ol man.”​—The New York Times, Me 1, 2023.

 Ol man i ken yusim AI inap sampela haptaim na bai ol i ken save em bai kamapim gutpela samting o samting nogut. Baibel i tok wanem?

 Baibel i kamapim klia risen na ol man i no inap save sapos ol teknoloji ol i wokim bai kamapim gutpela samting tasol o nogat.

1.  1. Maski ol man i gat gutpela risen long wokim wanpela samting, ating ol i no inap save long samting nogut em wok bilong ol inap kamapim long bihain.

   •   “Long ai bilong man, i luk olsem rot em i bihainim i stret, tasol bihain em bai bringim man i go long dai.”​—Provep 14:12.

2.  2. Wanpela man i no inap kontrolim hau ol narapela inap mekim gutpela wok o wok nogut long teknoloji em i kamapim.

   •   “Mi mas lusim ol [wok bilong mi] i stap long man husat bai kam bihain long mi. Na husat i save, em i man i gat savetingting o em i longlong man? Tasol em bai bosim olgeta samting mi bin yusim bikpela strong tru na savetingting long kisim aninit long san.”​—Eklisiastis 2:18, 19.

 Yumi no save long wanem samting bai kamap bihain, em as na yumi mas larim Krieta bilong yumi i stiaim yumi.

 Man Bilong Wokim yumi i tok promis olsem em i no inap larim ol manmeri o ol samting ol man i wokim i bagarapim graun o bagarapim ol manmeri.

•   “Graun i save stap oltaim oltaim.”​—Eklisiastis 1:4.

•   “Ol stretpela man bai kisim graun olgeta, na ol bai stap oltaim long en.”​—Buk Song 37:29.

 Long rot bilong Baibel, Man Bilong Wokim yumi i givim yumi ol stiatok we bai helpim yumi long kisim bel isi na gutpela sindaun. Bilong kisim sampela save moa long tok Baibel i mekim, ritim atikol “Wanem Samting Bai Stiaim Yumi Long Kisim Gutpela Sindaun Long Bihain?” na “I Gat Ol Gutpela Samting Bai Kamap Bihain.”