Long Julai 2022, dispela pasin bilong ol man i yusim gan long kilim i dai planti man i go bikpela long olgeta hap bilong graun:

•   “Wanpela man i kilim i dai wanpela bikman bilong wok politik bilong Japan [olpela Praim Minista Shinzo Abe], em man planti man i save long em na dispela nius i bin mekim planti manmeri long kantri i pret nogut tru na ol manmeri long graun olgeta i kirap nogut long dispela samting, bikos kantri i gat strongpela lo long ol man i no ken yusim gan na planti taim i no gat kain pasin bilong kilim man.”​—Julai 10, 2022, The Japan Times.

•   “Ol manmeri bilong Denmak i kirap nogut tru long wanpela man i yusim gan long kilim i dai 3-pela manmeri long wanpela bikpela stua long Copenhagen.”​—Julai 4, 2022, Reuters.

•   “Saut Afrika: 15 manmeri i dai taim wanpela man i yusim gan long sutim nabaut ol manmeri long wanpela ba long taun Soweto.”​—Julai 10, 2022, The Guardian.

•   “Long Amerika, ol man i pait na sutim gan i go i kam na ol i kilim i dai winim 220 manmeri long Julai 4 holide wiken.”​—Julai 5, 2022, CBS News.

 Yu ting i gat as na yumi ken bilip olsem kain pasin pait bai pinis? Baibel i tok wanem?

 Baibel i kolim haptaim yumi stap long en olsem “taim bilong las de,” em wanpela haptaim we ol manmeri bai wail olgeta, ol bai pait na bagarapim ol man nabaut. (2 Timoti 3:1, 3) Ol kain pasin pait i mekim na ol man i pret nogut tru. (Luk 21:11) Tasol Baibel i tok promis long wanpela taim pasin bilong pait bai pinis na “ol manmeri . . . bai stap long wanpela ples i gat bel isi long en, long ol ples we i gat gutpela sindaun na ol gutpela ples malolo.” (Aisaia 32:18) Hau bai pasin bilong pait i pinis?

 God bai pinisim ol man nogut na bagarapim olgeta wepen bilong pait.

•   “Ol man nogut bai no i stap moa long graun.”​—Provep 2:22.

•   “[God] i save mekim i dai ol pait i kamap long olgeta hap bilong graun. Em i save brukim banara na spia; Em i save kukim ol karis bilong pait long paia.”​—Buk Song 46:9.

 God bai pinisim tru samting i save kirapim man long pait long rot bilong skulim ol man long stap bel isi wantaim ol narapela.

•   “Bai ol i no inap kamapim wanpela bagarap o bagarapim ol samting long olgeta hap bilong maunten holi bilong mi, long wanem, graun bai pulap long save bilong Jehova olsem wara i karamapim solwara olgeta.”​—Aisaia 11:9.

•   Long nau tu, God i skulim ol manmeri bilong em long heitim pasin bilong pait na pasin bilong yusim ol wepen, na long “paitim bainat bilong ol i kamap ain bilong brukim graun na paitim spia bilong ol i kamap naip bilong wokim gaden.”​—Maika 4:3.

 Bilong kisim sampela save moa long tok promis Baibel i mekim long wanpela taim we bai i no gat pasin bilong pret, ritim atikol “No Gat Moa Pret—Em Inap Kamap?”

 Bilong kisim sampela save moa long wanem samting bai pinisim tru pasin bilong pait, ritim atikol “Peace on Earth at Last!”