I hatwok tru long ol man long olgeta hap bilong graun long kisim inap mani bilong lukautim ol yet, na dispela hevi i wok long i go bikpela moa.

•   I no longtaim i go pinis ol i bin mekim wanpela ripot a long graun olgeta, na ol i painimaut olsem “veliu bilong mani em ol man i kisim long olgeta wan wan mun olsem pe long wok ol i mekim em i go daun tru.” Dispela ripot i tok lukaut olsem sapos i no gat senis i kamap, orait “ol maniman bai kisim planti mani moa na ol taranguman bai stap rabis tru” na “planti em ol i wok mani, ol wantaim ol famili bilong ol bai bungim hevi bilong mani na dispela bai afektim sindaun bilong ol.”

 Yu ting ol gavman inap stretim dispela hevi bilong ekonomi we i wok long i go bikpela long graun olgeta, o pinisim dispela hevi?

 Baibel i tok long wanpela gavman we i ken na em bai pinisim olgeta hevi bilong ekonomi, dispela i makim tu hevi we sampela man i kisim planti mani moa na ol narapela i stap rabis tru. Em i tok olsem “God bilong heven bai kamapim wanpela kingdom,” em wanpela gavman tasol we bai bosim olgeta samting i kamap long graun olgeta. (Daniel 2:44) Aninit long wok bos bilong dispela gavman we bai bosim graun olgeta, God bai tingim olgeta manmeri. (Buk Song 9:18) Olgeta manmeri i daun long wok bos bilong Kingdom Bilong God, ol bai kisim olgeta samting ol i nidim bilong stap amamas. Olgeta man bai amamas long gutpela pe ol i kisim long ol wok ol i givim bel long mekim.—Aisaia 65:21, 22.