Long Me 19, 2022, United Nations Security Council i kisim tok i kam long winim 75 nambawan ofisa olsem “hevi bilong kaikai i sot, we COVID-19 na senis long klaimet i bin kamapim, dispela hevi i go bikpela moa bikos long woa i kamap long Yukren.” Bihain long dispela, The Economist magasin i tok “bikos long woa, hevi bilong kaikai i sot bai i go bikpela na ol man bai stap hangre.” Baibel i tok profet olsem dispela kain hevi bilong kaikai i sot bai kamap long taim bilong yumi, tasol em i stori tu long rot bilong karim dispela hevi.

•    Jisas i tok profet olsem: “Wanpela kantri bai pait long narapela kantri na wanpela kingdom bai pait long narapela kingdom. Na bai i gat taim bilong ol bikpela hangre.”​—Matyu 24:7.

•    Buk Revelesen i stori long 4-pela man i ron long hos we i makim ol bikpela hevi. Wanpela bilong ol dispela man i ron long hos i makim ol pait bai kamap. Bihain long en, i gat narapela man i ron long hos na dispela i makim taim bilong ol bikpela hangre, em taim we ol man bai hatwok long kisim kaikai na ol narapela bai salim kaikai long bikpela pe. “Mi lukim wanpela blakpela hos, na man i sindaun antap long en i holim wanpela skel long han bilong em. Mi harim olsem vois bilong wanpela man i toktok . . . Em i tok, ‘Pe bilong 1 kwat wit em pe man i kisim long de! Pe bilong 3 kwat bali em pe man i kisim long de tu.”​—Revelesen 6:5, 6, Contemporary English Version.

 Ol dispela tok profet bilong kaikai bai sot i kamap tru long dispela taim nau em Baibel i kolim olsem “las de.” (2 Timoti 3:1) Sapos yu laik kisim sampela save moa long “las de” na 4-pela man i ron long hos em buk Revelesen i stori long ol, orait watsim vidio Kirap Long 1914 Ol Samting Long Dispela Graun i Senis na ritim atikol “Fopela Man Long Hos—Ol i Husat?”

•    Baibel i gat ol gutpela edvais we inap helpim yumi long karim ol hevi, kain olsem hevi bilong pe bilong kaikai i go antap o kaikai i sot. Lukim sampela eksampel long atikol “How to Live on Less.”

•    Baibel i givim yumi hop na i tok tu olsem bihain ol samting bai kamap orait. Baibel i tok promis long wanpela taim we “bai i gat planti wit samting long graun” na olgeta manmeri bai i gat planti kaikai. (Buk Song 72:16) Sapos yu laik kisim sampela save moa long ol tok promis bilong Baibel long ol samting bai kamap bihain na yu ken trastim ol dispela tok promis, orait ritim atikol “A Real Hope for a Better Tomorrow.”