WAS I STAP!
Ol Bikpela Tait i Kamapim Bikpela Bagarap—Baibel i Tok Wanem?
Long graun olgeta, planti man i karim hevi bilong ol bikpela tait. Skelim ol dispela ripot:
“Insait long ol de i go pinis bikpela ren tru i pundaun long biktaun bilong Saina, kain samting i no bin kamap long dispela biktaun insait long 140 yia samting. Kirap long Sarere i go inap Trinde, inap olsem 744.8 milimita ren i pundaun.”—AP News, Ogas 2, 2023.
“Fonde em namba 2 de bilong Typhoon Khanun long bringim bikpela win na ren long hap saut bilong Japan we i kilim i dai 2-pela man. . . . Ol i ting dispela bikpela win na ren bai bringim inap olsem 0.6 mita ren long ol ples maunten long sentral Taiwan.”—Deutsche Welle, Ogas 3, 2023.
“Long wiken, bikpela tait [long Nova Scotia] i kamap bikos bikpela ren i pundaun long rijen bilong Atlantik Kanada, kain samting i no bin kamap long dispela rijen insait long 50 yia.”—BBC News, Julai 24, 2023.
Baibel i tok wanem long ol dispela samting i kamap?
Wanpela mak bilong “taim bilong las de”
Baibel i tok haptaim yumi stap long en em “taim bilong las de.” (2 Timoti 3:1) Jisas i tok profet olsem long taim bilong yumi, yumi bai “lukim ol samting i mekim [yumi] i pret.” (Luk 21:11) Klaimet i senis na dispela i mekim na weda i senis olgeta. Weda i senis taim yumi no ekspektim na planti taim dispela i kamap na i kamapim bikpela bagarap tu.
Risen na yumi ken bilip na wet
Baibel i tok planti samting i kamap long nau na i mekim yumi pret, ol i kamapim gutpela risen na yumi ken bilip na wet. Wai? Jisas i tok: “Taim yupela i lukim ol dispela samting i kamap, yupela i mas save olsem Kingdom Bilong God i kam klostu.”—Luk 21:31; Matyu 24:3.
Ol samting i kamap long nau em yumi lukim, ol i soim olsem klostu nau Kingdom Bilong God bai kontrolim win na ren samting, na tu, raun bilong wara.—Jop 36:27, 28; Buk Song 107:29.
Bilong kisim sampela save moa long hau Kingdom Bilong God bai stretim bek envaironmen bilong graun, lukim dispela atikol “Who Will Save the Earth?”