WAS I STAP!
Ol Kristen na Woa—Baibel i Tok Wanem?
Woa i kamap long Yukren i soim klia olsem planti lida bilong ol lotu Kristen i kirapim ol manmeri long pait long woa. Lukim olsem wanem ol pris pasto i sapotim wanpela sait long i go pait, na ol narapela pris pasto i sapotim narapela sait:
“Bikpela ona na tenkyu i go long olgeta strongpela man i pait bilong difendim kantri bilong ol Yukren long ol birua . . . Oltaim mipela i tingim yupela, beten long yupela, na sapotim yupela.”—Metropolitan Epiphanius I of Kyiv, ol i ripotim long The Jerusalem Post, Mas 16, 2022.
“Bikman bilong Misin Otodoks Bilong Rasia i mekim wanpela spesel bung bilong lotu long Sande bilong ol soldia bilong Rasia, na em i kirapim ol long difendim kantri bilong ol ‘olsem ol Rasia i save mekim’ taim Mosko i mekim yet militeri kempein bilong en long Yukren.”—Lain Reuters, Epril 3, 2022.
Yu ting i stret long ol Kristen i pait long woa? Baibel i tok wanem?
Tru tru Baibel i tok wanem?
Baibel i kamapim klia olsem ol disaipel tru bilong Jisas Krais i no save pait long woa.
“Putim bainat bilong yu i go bek long ples bilong en, long wanem, ol man i yusim bainat, ol bai dai long rot bilong bainat.”—Matyu 26:52.
Sapos wanpela i orait long ol man i go pait long woa o em yet i pait long woa, yu ting tru tru em i bihainim tok bilong Jisas?
“Mi givim nupela lo long yupela, olsem narapela i mas laikim narapela. Yupela i mas laikim narapela narapela olsem mi bin laikim yupela. Sapos pasin laikim i stap namel long yupela, orait olgeta bai save olsem yupela i disaipel bilong mi.”—Jon 13:34, 35.
Sapos wanpela i sapotim ol man i go pait long woa, yu ting em i kamapim dispela pasin laikim em Jisas i tok ol disaipel bilong em bai mekim?
Bilong kisim sampela save moa, ritim dispela atikol “Yu Ting Woa i Stret Wantaim Pasin Kristen?”
Ol Kristen na woa long nau
Yu ting i stret long ol Kristen i no ken pait long ol woa long nau? Yes. Baibel i tok profet olsem long taim bilong yumi, em long “taim bilong las de,” planti manmeri bai i no “skul moa long pait,” na dispela i stret wantaim tok Jisas i bin autim.—Aisaia 2:2, 4.
Bilong kisim sampela save moa, ritim long Wastaua dispela atikol siris “God i Gat Wanem Tingting Long Pait?”
Klostu nau Jehova, a em “God bilong bel isi,” bai yusim gavman bilong em long heven long kisim bek ol manmeri “long han bilong ol man i mekim nogut long ol na long ol man i pait na bagarapim ol.”—Filipai 4:9; Buk Song 72:14.
Bilong kisim save long hau God bai mekim olsem, watsim dispela vidio Kingdom Bilong God Em i Wanem Samting?
a Jehova em i nem bilong God.—Buk Song 83:18.