WAS I STAP!
Ol Man i Bagarapim Graun—Baibel i Tok Wanem?
“Klostu nau yumi bai bungim klaimet disasta. Ol bikpela siti i stap aninit long wara. Ples i kamap hat nogut tru. Ol traipela stom. Planti hap ol man i sot tru long wara. Planti milion plant na animal i dai na pinis. Dispela em i no wanpela stori giaman. Dispela samting ol saientis i tok long em bai kamap sapos ol gavman i no was gut long hau ol i yusim eneji.”—Tok em António Guterres, sekreteri-jeneral bilong Yunaitet Nesen,i mekim long Intergovernmental Panel on Climate Change ripot bilong Epril 4, 2022.
“Ol saientis i tok lukaut olsem long ol yia i kam, ol bagarap bilong klaimet senis bai go kamap long olgeta 423 nesenel pak [bilong Amerika], ol dispela pak inap bagarap taim ples i kamap hat moa yet. Ol samting nogut i laik kamap i olsem ol stori yumi ritim long Baibel: paia na bikpela taitwara, bikpela ais i melt, mak bilong solwara i go antap na ples i hat nogut tru.”—“Flooding Chaos in Yellowstone, a Sign of Crises to Come,” The New York Times, June 15, 2022.
Yu ting i gat rot bilong stretim hevi bilong envairomen long graun? Sapos i gat rot bilong stretim, orait husat inap stretim? Skelim tok Baibel i mekim.
Tok profet bilong envairomen bai bagarap
Baibel i tok olsem God bai “bagarapim ol man i wok long bagarapim graun.” (Revelesen 11:18) Dispela ves bilong Baibel i skulim yumi long 3-pela samting:
1. Pasin em ol man i mekim bai bagarapim graun.
2. Pasin bilong ol man long bagarapim graun bai pinis.
3. God, na i no ol man, bai stretim hevi bilong envairomen i bagarap.
Graun bilong yumi bai stap gut long bihain
Baibel i tok olsem “graun i save stap oltaim oltaim.” (Eklisiastis 1:4) Oltaim bai i gat ol man i stap long en.
“Ol stretpela man bai kisim graun olgeta, na ol bai stap oltaim long en.”—Buk Song 37:29.
Graun bilong yumi bai kamap gutpela olgeta gen.
“Ples nating na ples em graun i drai, ol bai amamas, na ples drai nating bai amamas na ol plaua bai karamapim ples olsem plaua safron.”—Aisaia 35:1.